Saldo de fitt
Hin tucc bei robb quist chì che la dis lee,
Gh'hoo l'omm a spass e gh'hoo el bagai malaa...
A a mì, quel che me prèmm hin i danee...
E, senza ciaccer, mi vuj vèss pagaa...
– Ch'el senta, sur padron, per caritaa,
Ch'el speccia anmò on quai dì... – Ghe n'hoo assee...
– Fin tant che nun emm poduu, quaicoss gh'emm daa...
Incœu gh'hoo nanca el pan in del vestee?...»
Che bocca de basitt quella che prega!...
Che bei oggioni quij che piang inscì!...
El remolla el padron... e a dì el pessega:
De fà on piesè, sigur, sont bon anmì...
Se lee la vœur... se lee l'è minga intrega...
La me capiss... s'impáttom on quai dì...
Ma minga col marì!...
La caparra... on basin? «–s'ciacch on s'giaffon!...
«Adess, ch'el ciappa, l'hoo pagaa de bon!...»