Sa mont l é ben bel

From Wikisource
Jump to navigation Jump to search
Sa mont l é ben bel  (1915) 
by Giacomo Colleselli
grafia moderna

Sa mont l é ben bel

Da ste bande l é ben bel,
no n' é degó de tal mont
che rue fin s' al ziel.
No se finis mai pì de i vardà
a ste mont cuscì aute,
l é proprio na rarità.
N' on dut intor de ste mont
bele verde o da bosch
da n zima fin jun font.
On ben incia crode
aute che fas spavent
con chi spiz sun dute le mode.
L é la Zuita, la Montagna e l Crot,
Sas Biench e Mondeval,
l é cheste cuscì da banda de sot.

Delà l é Versal,
pì insù la Lastia e Croda Rossa,
e po l é Pala dal Sal.
Fin de jugn no se pol jì su,
sun ste crode cuscì frede
l é la nef ncora n toch n ju.
Per esempio ntal Crot,
che mi el vede ogni dì,
l é la nef tan de sora che de sot.
Versal l é ncora pì aut.
Se abadé ben d' istà,
vedé le pegorare sun chel saut.
E po l é la Lastia,
l é incia na granda croda,
lassù l è incia na ostaria.
E Croda Rossa che i varde ogni dì,
la fà aspetto, massima co l sol va a fiorì.
Pala dal Sal l' à da esser incia bela,
se vede a vardà su,
mi no son mai jù sun chela.
E po l é Naolao
na mont tant nominada
per esempio incia Giao.
I prai da mont i é ben biei,
sun ste mont l é n piazer,
come sun Pieza e sun Melei.
Jalpè del dut l é Zopei,
e po l é Pore, Val Ciarnara
e su insom l é i Masarei.
L mes d' agosto duc va su,
sa mont a sié
e no se volesse pì vignì ju.
De domenie da sera l é alegria,
se ride, se scherza,
no se pensa pì a nia.
Da da sera se binon
de dies o dodes jovign
e jon a secà Ostazon.
Sa mont l é bel a fà na ridata
entel fen coi suoi amizi
ma pì bel l é co na tosata.