Sù i mezzanitt
Hin quist i ôr, o Togn, de vegnì a cà
Cott masaraa e ras come on vassell?
E mi, povera crista, chi sguggià,
A panscia vœuia, senza nanca on ghell...
– Comencia minga, voj, a resegà...
Mett minga giò in piesè tanto spuell...
– L'è ona vergogna, sì... – Ti vœut ciappà?...
Va' che tej pondi e te ne doo on sfragell...
Lù el va in lecc, l'animâl, lee, poveretta,
Coi gotton che ghe borla fina in scoss,
La sguggia anmò là, su la cadreghetta,
Freggia, affamada, con tucc rott i oss...
E pœu el Signor l'è giust!... O malarbetta,
Perchè nol crèppa, allora sto baloss!...