Säks kil de Friedrich telid reg de Pleusän

Friedrich gletik, alif ädalogom galefeli nulik älabom kösomi dunön ome säkis at kil: Lifayelis limödik labol? Sis tim limödik dünol obi? Li-getol nomiko soledi e kloti oliK? Flentel yunik sembal ädemanom nütlidön in galef regik. Demü logim jönik oma, pälensumom; ab no äkapälom vödi bal deutapüka. Katan oma änunom omi das reg, logöl omi, isäkomöv omi dö säks kil löpnik. Sikodo äkomedom ome lenadön nebuko gepükis kil, kelis imutomöv givön rege. Semdelo du dusük gletik Friedrich no äfögetom säkön solati yunik penömodöl; ab äbeginom de säk telid e äsagom ome: sis tim limödik dünol obi? Yels telsebal, flentel ägepükom. Reg senitöl yuni solata, no äkanom suemön liko at imekom ya düni so lonedik e pestunöl gletiko äsäkom ome: ab täno lifayelis limödik labol? Yeli bal, votikel ägesagom.

Friedrich nog pestunölum äsevokom: u ol u ob binobs fops zelado.

Solat, klödöl das vöds at äfomoms säki kilid, ägepükom nen tup: balim e votim, Mayed. Eko balidna, reg äsagom, das nemon fopi komü milit obik. Solat, kel ifinom stoki omik deutapüka, äinepükom, e ven reg, fleköl oki denü äl om, äsäkom omi al plänön kläni at, solat ägepükom ome flentapüko: Mayed, no kapälob vödi bal deutapüka.

Friedrich äsmilom ladliko dö jen at e ämogolom, konsälöl solate, lenadön püki keli äpükon in tats omik.

Alessandria (Täl)

GUERRA T.

Se Volapükabled Tälik 1889, Nüm: 15, Pad: 119-120.

Fomam votik vödema ot, se: Volapük: Gased bevünetik tedelik, nolik, literatik e gälodik.