Resposta a Ironem Biragh

by Giorgio Giulini

On virtuos by Giorgio Giulini

Giorgg Giulin (1714-1780)

Resposta a Ironem Biragh

Sora el sò proponiment de no fà pu rimm.

Sur don Ironem, me specciava ben
de legg dopo i vacanz quejcoss del sò,
ma ch'el voress scrivem a mi nò ben,
quest che chì pœù no m'el specciava nò.

Lu no l'usa a mandà i sœu poesij
che a certi personagg ben grand e degn,
e ch'el m'abbia tegnuu per vun de quij
l'è ona finezza che la passa el segn.

M'hin arrivaa i sœu vers che seva in lecc,
e mia miee, quand nominè Cologn,
la soltè su in setton benchè el fass frecc,
fregand i œucc tra la vigilia e el sogn.

Senza dì con permess, la me strappè
quell palpee grazïos fœura di man,
e la vœuss leggel tutt de cap a pè
bettegand mitaa fort e mitaa a pian.

[...]