Ra toses da Cortina
Ra toses da Cortina
Ra śoentù d' Anpezo
Stà senpre sa ra piazes
Ma el par de no crede
Chi che no pó vede
Ch' 'es posse fei coscì.
See vea, see festa,
'Es và a piena testa
De bujeles e buscetes
Poco oro ma tropo arśento
'Es và via come el vento.
De fazorete non é da portà
Prin de duto 'es pensa là,
Ma se soldi 'es no ghin à
Debito 'es farà.
De palegrès un burò pien
I é là folade come el fen,
E zoletes e zoletoi
Par se strenśe su i galoi.
De magnes e mesa magnes
E de jaides no vardon
Che vien infin pascion
A vede tanta roba
Par scuerśe chera goba.
'Es à anche ra bustines
Sta nobil signorines
E ce tirà sora ch' 'es farà
Parcé che i tosc vade là.
E canche i s' à sposades
I à un puin de bacalà.
De ciameśes 'l é da vardà sora
Chi globe che pendora
E chi strasces verde, ros e śal
Somea senpre carnaal.
De calzes no rajonon
Che i ome no pó vede
E stizà nos fajon
Ma ra pì outes
'Es và fin al galon.
I scarpe s' i vede na fre
I é tirade sun chel pe.
Ma che śone agnó che voron,
Come zertes anpezanes
Una meo no ghin ciaton.
Ades ci àres betù su
Arloe e mantelines
I guadagnes de sta nines
I é dute intor el….
Ades 'es se dà anche el sbeleto
Par se bete su museto
Se vede da bonora a sera
Che 'es se canbia de ziera.
'L é proprio un gran consumo
De muscio e glicerina
No fajonse de mereea
Se 'es é pienes de gartures.
'Es laora duto 'l an
Par vestirse an par an.
De ra ciadeneles no vardon
Che res porta par mostron
Ma veramente 'l é ben algo
Tanto piombo a pendoron.
Ancora algo m' é resta in drio
Sul ciapel 'es à un deśio,
E s' à da dì el vero
'Es vorae el struzo intiero.
Sarae ancora algo
Ma duto no dijon
Che se una o r' outra
Restasse brandol
'Es me fajarae bete in prejon.
Sae śà da ve sliscià
Vardà de me avisà
Che una peso de chesta ca
Vedaré che r' à ciapà.
Se v' in aé amal
Ve preo de me pardonà
Se chesto carnaal
Ve voré maridà.
El par proprio de no crede,
Duto cuanto chesto ca
Ma 'l é robes che se vede
E che se parla in verità.
Aldidancuoi
'Es no sà pì de ce ver śì
E s' 'es seguita coscì….
Poco ben i śirà un di.