Ra grotes de Volpera

by Bruno Apollonio

Śon ades a visità col pensiero ra Grotes de Volpera.

Sote Crepa, (Bélvedere) verso el pian de Cianpo (villaggio), 'l é un bel bosco, ma canche se và inze, se vede sasoi che fesc paura, toche de croda un sora 'l outro che i s' à destacà in tempe antichissime da ra montagnola de Crepa; e i disc ch' i èbe seporì un vilagio. Sote chera rovina de crepe se vede de ra gran cavernes e de ra conca magnifiches cuertes de erba. Inze meśo a chel caos de sasc; de buje e de cavernes, ch' i ciama ra Grotes de Volpera, se ciata un bel sito che vien nominà: - ra Gejia de Maria de Śanin.

Riguardo a r' origine de sto gnon, eco ra storiela che se sente contà.

- I Romane par śì a ra piaza fortificada de Auguntum i vegnia pa ra strada nominada Via Claudia che ra passaa par Anpezo, e anzi ca i aea betù na compagnia de melitare. Un comandante de sti soldade romane el s' aea inamorà d' una bela tosa, na zerta Maria de Giovanino. Era però ra no vorea i n saé e ra no i dajea bada; ma el 'l i śia sempre daos e 'l no ra lasciava mai in pasc.

Par scampà da chel insolente chera por' tosa ra se ritiriaa a preà inze pa ra Grotes de Volpera ch' es non ea tanto in dalonse da ra so ciasa; e ancora al di d' ancoi un de chi luoghe, d' un aspeto imponente e romantico, i lo ciama col gnon de chera por' perseguitada: - ra Gejia de Maria de Śanin.