Prose e poesie bellunesi 2011/4
Jump to navigation
Jump to search
| ←Prose e poesie bellunesi 2011/3 | Prose e poesie bellunesi 2011 by L era l invern |
Prose e poesie bellunesi 2011/5→ |
L era l invern.
Nevere e giazoi
strade serade
te n bianch mondo fret.
La val sconduda
la canta scarzegna
sot a n lastron d arzent.
Par fontana
na salera
doi scorz inciadai
i trà acua.
Femene con seci e bigoi
barch malseguri te n troi stret
dalmede con balzoi e ranpoi
che vien e che và.
E, te na caspareza,
omi coi calzoi e scarpe da fer
i stroza
legne e fen.
Dai camin de le case
ciare neolete
le se leva leziere
te l silenzio
de na bianca pase.
(Gosalt-Gosaldo (Agordino) Piero Bressan Bernardi (n. 1920)