[ 165 ]
Importas distingar ta du vorti, qui du apartenas a la vulgara linguo, e ne povas havar la sama senco [1]. Guturo indikas l’interna kavajo supre en la kolo (ciencale : la faringo, la laringo e la supra ezofago) : ex. on parolas pri soni guturala (ciencale, li esas velala od uvulala). Fauco indikas l’extera ed antala parto di la [ 166 ]kolo (do anke la laringo, sed extere vidata) ; e, pro ke ta parto formacas kava profilo (inter la mandibulo o mentono e la pektoro), la vorto fauco uzesas per metaforo internaciona por expresar multa formi kava, en tekniko, en geografio (montala fauco), e c. En F. ta distingo esas proxime ta di gosier e gorge. Sed ni ne volas indikar nacionala equivalanti, qui riskus esar nejusta, e ni preferas definar la vorti en Ido, lasante a singlu la tasko tradukar oli en sua linguo, segun la kazi.
- ↑ To ne esas la kazo ex. di ventro e abdomeno, qui esas preske equivalanta, sed abdomeno esas nur ciencala.