Poetische Versuche in westfälischer Mundart/Brandewin
O Brandewin.
Nach der Melodie: „O Dannebaum, o Dannebaum, wu grön sind dine Twige.“)
O Brandewin, o Brandewin!
Bist manche Ehefrau tor Pin!
Gifft int Hus Krakailerie,
Gaiht he bi de Pulle bi;
Un Brandewin, un Brandewin,
De fänk dann an to slaohn!
O Brandewin, o Brandewin!
Du sast all fak de Aorsack sin,
Dat eener moss von Hof un Grund,
Wil he met di stonn in den Bund;
O Brandewin, o Brandewin,
Rittst een'n den Rock von'n Liwe!
O Brandewin, o Brandewin!
Wat sägg din Bror von Vader Rhin,
De mäck zwaor auk wull Snakerie,
Wän doch so kine Prüglerie;
O Brandewin, o Brandewin!
Du bist en grauten Sünder.
O Brandewin, o Brandewin!
Dat Menskenblod wät heet nog sin,
Giff doch de Prucklerie der an,
Wil et män alls verdiarwen kann;
O Brandewin, o Brandewin,
Verbrödre di met Water!