Pitla Storia bibia/A4

Adam y Dieva tumei tl picià.

L malan ova na gran nvidia dla fertuna d'Adam y Dieva, y l à zercà de i tré al picià. N di ie Dieva jita per l verzon a spaz y ie ruveda dal lën pruibì. Ëila i à cialà al lën y à udù na beca lessù, che à scumencià a rujené. L fova l malan aschendù tla beca.

La beca à damandà Dieva: "Percie ne maiëis nia ënghe de chësc lën?" Dieva à respundù: "Nëus maion dl frut de duc i lëns dl verzon, ma de chësc lën à Chël Bel Die dit, che ne maionse, acioche ne messons murì." – La beca à po' dit: "De segur ne muessëis murì, sce maiëis de chësc lën, se giaurirà vosc uedli y vo cunescerëis sche Idie l bën dal mel."

Śën à Dieva scumencià à cialé cun gola al lën. L frut ti plajova y ti parova tan bon y dëuc, che l'à n à tëut ju y n à maià. La n à po' dat n tòch a Adam che n à ënghe maià. Nscila iesi deventei dejubedienc a Idie y à fat picià. Pernanche i à abù maià, se à giaurì si uedli, ma dut autramënter, che la beca ova dit: i à śën cunesciù, che i ie desnuc, y percie che ëi se daudova un dal'auter, se ài cun pleces de fighes fat n gurmel. Tosc do ai audì la usc de Chël Bel Die y s'à aschendù danter la sienes dl verzon. Chël Bel Die à cherdà Adam: "Adam, Adam, ulà ies? Adam a respundù: "É audì ti usc y m'é aschendù, jache m'é temù, pervia che son desnut." Chël Bel Die à po' damandà: "Chi t'à pa dit, che tu ies desnut Es fosc maià dl lën, che t'é pruibì de no maië?" Adam à respundù: "L'ëila, che tu m'es dat, me n à dat y ie n é maià." Po' à Chël Bel Die damandà Dieva: "Percie es fat chësc?" Y Dieva à respundù: "La beca m'à ngianà, che n é maià."

NB! Idie vëija dut y sà dut. Nëus ne pudon fé n sëul pensier, che Chël Bel Die ne sebe. Perchël ne daussons mei fé dl mel, ënghe sce son sëui, percieche Chël Bel Die vëija dut cant.