Pitla Storia bibia/4

←3

Pitla Storia bibia 4. Adam y Dieva tumei tl picià

5→

grafia moderna

4. Adam y Dieva tumei tl picià.

Plën de nvidia cialova l malan ala fertuna d'Adam y Dieva. Per i tré al picià y al mel s'àl ël servì dla beca. La beca à dit a Dieva: "Ciuldì ve à pa Idie cumandà de ne maië de duc i lëns de verzon?"

Dieva a respundù: "Nëus maion di lëns dl verzon, ma dl lën tamez à Chël Bel Die cumandà de no maië, acioche ne messons fosc murì."

La bocia à po' dit: "De segur no ne messëis murì, sce n maiëis. Anzi vo giaurirëis i uedli y sarëis sche Idie."

Dieva i cialova śën al frut y cunscidrova che l fossa bel y bon. La n'à tëut ju y n à maià. Po' i n àla dat nce a si uem Adam y ël n à ënghe maià.

Śën ài giaurì i uedli y à cunesciù, che i ie desnuc. Y jache ëi se daudova un dal auter, ài tëut ca pleces de lën da fighes y se à fat gurmei dainora.

Canche i à po' audì la usc de Die, s'ài aschendù sota i lëns dl verzon ite.

Chël Bel Die à po' cherdà: "Adam, Adam ulà ies?" Adam à respundù: "Son bën tlo, ma me tëme y ne me nfide nia a me lascé udëi, pervia che son desnut. Davia de chël sons jit a m'ascuender."

Idie à po' dit: "Chi t'à pa dit che tu ies desnut? Iel vëira no, es tu forsci maià dl lën pruibì?"

Adam à respundù: "L'ëila, che tu m'es dat, Dieva, m'à dat y ie n é maià."

Po' à dit Idie a Dieva: "Ciuldì es tu fat chësc?" Dieva à respundù: "La beca m'à ngianà y ie n'é maià."