Pitla Storia bibia/27

←26

Pitla Storia bibia Idie dà i diesc cumandamënc sul mont de Sinai

28→

Idie dà i diesc cumandamënc sul mont de Sinai.

Al scumenciamënt dl terzo mëns ie i Israelic ruvei pra l mont de Sinai. Iló po' ai metù su i "tabernaculi". Ma Mojé ie jit su sul mont y Chël Bel Die à dit ad ël: "Va ju y cumandi che i dëssa ncuei y duman se santifiché, che ëi dëssa se lavé si guant, y se njenië per l terzo di. Y canche sona la posaunes, po' dëssa l popul se fé daujin daujin dal mont." Mojé à fat, sche Chël Bel Die i à cumandà.

La duman dl terzo di ie unida. Eco po' al scumencià a tauné y a tarluië. Na nibla dut foscia curiva l mont de Sinai y dut l mont cialova ora da fé tëma: l tremova, l fumova y vardova. La posaunes sunova dassënn y si sonn chersciova for plu y plu. L popul fova plën de spavënt y se temova drët.

Po' à Mojé menà l popul a pe dl mont. Śën à po' rujenà da mez l fuech ora y à dit:
"Ie son l Seniëur, ti Die. Tu ne dësses avëi degun autri dieies dlongia mé. Tu ne dësses te fé deguna statua zipleda per l aduré.
No nominé l inuem de Die, ti Seniëur, zënza bujën.
Recordete de santifiché l di de Sada.
Unora ti pere y ti oma, acioche la te vede bën y che te vives giut, sula tiera.
No mazé!
No cumëter adultere!
No rubé!
No dé testemone fauz contra ti proscimo!
No dejidré la cësa de ti proscimo, no si ciamp, no si fant, no si fancela, no si bo no si musciat, no velch autra cossa, che ie sia!"

Plën de spavënt dijova l popul: "Dut ulonse fé, cie che l Seniëur à dit." Po' ie Mojé inò jit su sul mont y ie restà lassù caranta dis y caranta nuetes. Ël ne maiova no pan no buvova ega. Chël Bel Die i à po' dat doi tofles de sas, sun chëles che l dëit de Die ova scrit su i diesc cumandamënc.