Per l santinuem de Seniëur Pluan Andrea Pramstrahler da Santa Cristina

From Wikisource
Jump to navigation Jump to search
Per l santinuem de Seniëur Pluan Andrea Pramstrahler da Santa Cristina
by anonim
grafia moderna
Per l santinuem de Seniëur Pluan Andrea Pramstrahler da Santa Cristina.

Per Vosc santinuem nce nëus Ve bincion
Fertuna da Idie y si benedescion,
Y d’ autra gran cosses: dl bon y dl bën,
Con una parola: dut cant chël ch’ ëis gën.

Pra chëst’ ucajion nëus messon sentì gra
De dut cant l bën, che Vo nes ëis fà,
Con tan de paroles y tan dʼ instruzions
Ëis for me Vo ulù, che bravies restons.

Sce Vo nseniais, o sce Vo amuniais,
Dut me nfin de nosc bën Vo fajais
Scʼ che n pere y nʼ oma i uel bon a si fians
No manco nce Vo a vosta mutans.

Y mpono drë for nëus V’ on scutà su
Y a chëla maniera datrai ufendù
Ma ncuei perdonanza da Vo nëus perion,
Ve fé alegrëza da mo inlà uleron.

Bele plu ani sëis Vo ncruzià
Y mascimamënter de nëus festedià,
Che sce bravies y bones ie la mutans,
An po d’ aspitè nce de bona umans.

Y bona umans ‒ chël sà ugni un ‒,
Ie la fertuna per dut n comun,
Y tira da Idie la benedescion
a duta la cura y generazion.

Y chësc ie pur chël, che Vo dejidrëis,
De chël che da Idie ncontinuo pariëis,
Per l bën de nëus dutʼs, per l bën corporel,
Ma po mo de plu, per l bën spirituel.

Idie Ve merite y premie dut cant,
Che vosta fadies ne sibe debant,
Che Vo y nëus dutʼs on da goder tlassù
Tl premio eterno, che ne fina mei plu.