Pensirz sön Piz de Boà
Pensirz sön Piz de Boà.
Os superbuns insciöche paoms,
Lascedʼ chël bur picé bel snel!
Cherdemʼ, ne sëis co püri romuns,
Magari chʼ ëis valʼ püʼ de ciorvel.
Chiló gnidʼ sö, incërch ciaredʼ,
Y i sá sigü, che ves plachëis
Sciöche lʼ amarè fej dan dal medʼ;
Gnide y fajedʼ ci che messëis!
Os avaruns y sbordenuns,
Üsc grosc lascede, osc or y arjënt
Ascognü te casses y borduns,
Lascede osc gröm bënché liciorënt!
Chiló gnidʼ sö sön chësc bel col
Y la richëza comtempledʼ
De nosc signur; spo se pól
Ciamó, che lascëisʼ osc viz, cherdedʼ!
Y os maciá de ri pinsiers,
De ries aziuns, de bur piciá,
Plü stlec ciamó co tiers,
Os düc dl plü bur mal taciá:
Chiló gnidʼ sö sön chësc bel piz,
Injenedlá la santité
Che Dî desmostra te vigni piz
Amede y no chël bur picé!
Os invidiusc de vigni bëgn
Tut fora chël che toca a dʼ os,
Osc mormoré dá dër ri sëgn,
Dal blot stlafé ciafëise la tos:
Chiló gnidʼ sö pro lʼ armonia,
Ciaredʼ che döt se vëgn tan bel,
Ignó de mal ne vëigon nia,
De düc os canc miú é vigni vicel.
Mangiuns y düc os contentuns,
Dʼ osc vënter su bugn sorvidus,
Ince os de porcaria boiuns
Sciöche esses grosc da imparadus,
Chiló gnidʼ sö, la moderaziun
Podëis odëi pro i pici vicí,
Pro i bi ciamurc te chël valun,
Pro düc chi ciüfs sinziers y bi.
Os dessenusc y os zanusc,
Na moscia é bona de se fá mac,
Ince vigni niora sön Polusc,
Dodessʼ pa pö de chi bur ac!
Chiló gnidʼ sö, la ciarité,
Lʼ amur insëgna cez chʼ odëis,
Döt cant pordica santité,
Metede averda plü che podëis!
Y os fraidiuns, dl laur nemisc,
Nemisc dl bëgn, dl sant, dl dërt:
De gran fraidöm soltant amisc,
Scebëgn che sëis tʼ osc tëmp plü vërt,
Chiló gnidʼ sö, lʼ ativité
Natöra a düc cotanc che sëis
Insëgna; odede la maesté
De Dî te cez chʼ aldis y odëis!