Pened telid de ‚Paulus‛ elanes di Corinthus

From Wikisource
Jump to navigation Jump to search

KAPIT: I[edit]

  1. ‚Paulus‛: ma vil Goda paostolan Yesusa: Kristus, e hisvist: ‚Timotheus‛ komote Goda in ‚Corinthus‛, ed i saludanes valik in Lagayän lölik.
  2. Benäd e püd binonsöd lü ols dub God: Fat obas e Söla: Yesus Kristus!
  3. Palelobomöd God ä Fat Söla obsik: Yesus Kristus, Fat miseröl ä God mu trodöl,
  4. kel trodom obis pö dränäl valik obsik, sodas kanobs trodön utanis, kels sufons dränäli alseimik me trod, me kel obs it petrodobs fa God.
  5. Ibä, leigoäsä suf Kristusa edrefon bundano obis, so i petrodobs bundano fa Kristus.
  6. Va nu padränälobs, binos ad trod e beat olas, kelos davedon in sufäl sufa ot, keli mutobs sufön, e spel obsik in ols binon fümik; u va patrodobs, binos ad trod e beat olas,
  7. bi sevobs, das leigoäsä kompenols pö suf, so i kompenols pö trod.
  8. Ibä no vilobs vedükön olis nesevikis, o svists! dö dränäl obas in ‚Asia‛; bi us pefledobs me töb mu vemik, kel ätuikon tefü näm obsik, sodas ädäsperobs, va ökanobs dakipön lifi.
  9. Si! ispetob ya ninälo deadacödeti, dat no ökonfidobs obis it, ab Godi, kel lelifükom deadanis,
  10. kel esavom obis se deadamariskäd so gretik, e nog ai savom, ed obs de om spelobs, das osavom fovo obis,
  11. du i ols kevobols benü obs dub plek olsik, dat demü legivot benädik obes pegevöl, mödikans danonsös gönü obs!
  12. Ibä pleidülobs ga, das konsien obsik temunon, das ekosädobs balugiko e ko stedäl lo God, no ko sap midik, in vol, e pato ko ols.
  13. Ibä no penobs oles bosi, äsä utosi, kelosi sevols e suemols, e spelob, das osuemols osi lölöfiko;
  14. leigoäsä ya esuemols obis diliko: das pleidülols demü obs, leigoäsä pleidülobs demü ols ün del Söla: Yesus.
  15. E pö konfid at, ävilob büiko kömön lü ols, dat dagetolsös legivoti benädik telid,
  16. e dutevön ve zif olsik lü Makedonän, e täno golön dönu lü ols, ad posedugädön fa ols lü Yudän.
  17. Ebinob-li tän läcerik, ven ävilob dunön atosi? ud edesinob-li atosi, soäsä dunoy suvo osi; das ädesinob ninälo nu ad dunön, täno ad no dunön osi?
  18. Äsä God binom fiedik, i vöd obsik lü ols no äbinon nu: si! e täno: nö!
  19. Ibä pö Son Goda: Yesus Kristus, kel penotükom bevü ols fa ob, ‚Silvanus‛ e ‚Timotheus‛, no äbinos sio e no, ab pö om äbinos ai sio.
  20. Ibä proms valik Goda binons in om siiks, e sekü atos sagobs: So binosös! stimü God.
  21. Utan, kel nu yümätom obis ko ols in Yesus, e leüledom obis, binom God,
  22. ed estäpedom sui obs snili okik, ed egivom ladäles obsik as penot Lanali okik.
  23. Nu lüvokob Godi asä temunani lo lan obik, das ad spalön oles, no nog egolob lü ‚Corinthus‛;
  24. efe no ad bemastön lekredi olsik; binobs güo kekompenans pö fred olsik; ibä laidälols in lekred.

KAPIT: II[edit]

  1. Nu isludob ad no kömön dönu glumo lü ols.
  2. Ibä if glumükob olis, kin dabinon-li üfo, kel kanon fredükön obi, äsä utan, kel peglumükon fa ob?
  3. Ed atosi epenob ebo oles, ad no tuvön pö köm obik glumi de utans, kels mutons fredükön obi, bi labob konfidi in ols valik, das fred obik i binon fred olas valik.
  4. Ibä epenob oles ko drens mödik, se dränäls e töböfs valasotiks ladäla, no dat glumikolsös, ab dat sevolsös löfi gretik, keli senälob pro ols!
  5. If ek nu ekodon glumi, tän no eglumükon te obi, ab i dilo (ad no tuükön) olis valik.
  6. Pro soman blam de pluamanum saidonös!
  7. sodas nu güo pardolsös e trodolsös buikumo oni, dat no päridikonös sekü glum tu gretik!
  8. Sekü atos konsälob oles ad gevön one löfi olsik.
  9. Ibä diseinü atos epenob oles, dat sevobös natäli olsik, va binols lobediks in dins valik!
  10. Kine pardols bosi, ome i ob pardob osi; ibä if epardob bosi, tän edunob atosi demü ols, äsva stadob lo Kristus;
  11. dat no pabemastobsös fa diab! ibä no nesevobs zeilis omik.
  12. Ven äkömob ini ‚Troas‛ ad notükön gospuli Kristusa, e do yan pimaifükon obe fa Söl, ninälo no älabob takedi, bi no ätuvob us blodi obik: ‚Titus‛,
  13. e, posä ileditob de elans di ‚Troas‛, ädetävob lü Makedonän.
  14. Dani lü God, kel koedom levikodön obis nämätü Kristus, e sevädükom valöpo dub obs benosmeli lejona omik!
  15. Ibä binobs benosmelasakrifot Kristusa lü God pro utans, kels padakipons, e pro utans, kels päridikons;
  16. pro atans benosmel deada pro deadam, e pro etans benosmel lifa pro lifans. E kin fägon-li ad atos?
  17. Obs, ibä no selobs, äsä mödikans dunons, vödi Goda, ab spikobs stedäliko, äsvo se God, lo God, in Kristus.

KAPIT: III[edit]

  1. Primobs-li dönu ad komandön obis it? U neodobs-li bo, äsä mens semik, komandapenädis pro ols u de ols?
  2. Penäd obsik ols binols; penäd, kel pepenon ini ladäls obsik, kel sevädon pö mens valik e pereidon fa valans.
  3. Vö! kleilos, das binols penäd Kristusa, kel pelauton in dün obsik, kel no pepenon me nig, ab me Lanal Goda lifik; no sui stons, ab sui stons midik ladäla.
  4. Konfidi at nu labobs dub Kristus pö God.
  5. No binos, das fägobs se obs it ad datikön bosi, äsva atos süikon se obs it, ab fäg obsik kömon se God,
  6. kel efägükom obis ad binön dünans diateka nulik, no diateka tonatas, ab lana; ibä tonat deidon, lan lifükon.
  7. Ven nu dün bosa deadöfik me tonats sui stons peglivöla evedon bos glorik, sodas cils Yisraeläna no äkanons sufidön logami logoda ela ‚Moyses‛, demü nid logoda omik, kel omoikon;
  8. dün lana no obinon-li täno nog glorikum?
  9. Ven ga dün bosa, kel pemicödon, binon glorik, vio plüo bundaniko dün bosa gidik opluon leigodü on in glor!
  10. E glor et igo omoikon demü glor mu gretikum at.
  11. Ven nu nelaidikos binon glorik, vio plüo mödikumo laidikos binon glorik!
  12. Bi nu labobs speli somik, spikobs vemo nenplafiko,
  13. e no dunobs, äsä ‚Moyses‛, kel äpladom veali sui logod okik, dat cils Yisraeläna no ölogons, ad kis nelaidikos öfinikon.
  14. Ab tikäl onsik edölikon. Ibä jü atim pö reid diateka vönik veal ebleibon seatön, no pemoükon, ibä pas palivükon fa Kristus.
  15. Ab jü atim, ven el ‚Moyses‛ paloreidon, veal seaton su ladäls onsik:
  16. Ven äflekom oki lü Söl, veal pämotovon.
  17. Söl nu binom Lanal, ed utöpo, kö Lanal Söla binon, lib dabinon.
  18. Obs valik nu, kels labü logod pesävealöl logobs äsä in lok glori Söla, cenobs mago de glor bal ad glor votik dub näm Lanala Söla.

KAPIT: IV[edit]

  1. Demü atos, nü pemiserobs e labobs düni at, no säkuradikobs,
  2. ab eklemobs dinis jemodik, ad duinön käfodis ud ad dobükön vödi Goda, ab komandobs obis, dubä notükobs verati, yufidölo konsienis valik menas lo God.
  3. Ed if gospul obsik binon klänedik, tän binon klänedik pro utans, kels opäridikons,
  4. pö nenlekredans kelik god timäda at ebleinälükon täläktis onas, dat no ölogonsös nidi gospula glora Kristusa, kel binom mag Goda.
  5. Ibä no predobs obis it, ab Kristusi: Yesus, Söli, du obs binobs dünans olsik demü Yesus.
  6. Ibä God, kel esagom, das se dag lit ostralon, estralom ini ladäls obsik, dat ölogobsös glori Goda in logod Yesusa: Kristus!
  7. Ab dalabobs divi at in gefs taimik, dat klülädosös, das näm plödakösömik obsik binon se God, e no se obs!
  8. In dins valik padränälobs, ab no peditretülükobs; no sevobs säditretamedi, ab no däsperobs;
  9. papöjutobs, ab pö riskäd no palüvobs; padojedobs, ab no paperädükobs;
  10. ai labobs deadi Yesusa in koap obsik, dat i lif Yesusa sevädikonös in koap obsik!
  11. Ibä, du lifobs, palovegivobs demü Yesus laiduliko deade, dat i lif Yesusa sevädikonös in mid deadöfik obas!
  12. Somo dead vobedon in obs, e lif in ols.
  13. Bi nu labobs lüäli ot lekreda ma utos, kel pepenon in bibapenäd: ‚Elekredob, sekü atos espikob‛, i obs lekredobs, e spikobs sekü atos,
  14. bi sevobs, das om, kel elelifükom Yesusi, i olelifükom obis ko Yesus, ed opladobs obis ko ols lo om.
  15. Ibä val jenon demü ols, dat dub benäd bundanik mödikanes, dan gretikumonös ad glorükam Goda!
  16. Sekü atos no säkuradikobs, alo, ifi men plödik obas päridikon, men ninälik nulikon aldeliko.
  17. Ibä dränäl leitöfik atimik prodon mödoti laidüpik mu bundaniki glora,
  18. bi no demobs dinis logädik, ab nelogädikis, ibä dins logädik binons nelaidiks, e dins nelogädik laidüpiks.

KAPIT: V[edit]

  1. Sevobs, das ven tänad taledik obsik pasäregulon, labobs de God lödi laidüpik no me nams pebumöli in süls.
  2. E du nog binobs in at, seifobs sekü desir ad paklotön me löd sülik,
  3. bi jenöfo i dub klotam at no obinobs nüdiks.
  4. Ibä obs, kels binobs in tänads, seifobs vemo, bi no vilobs pasäklotön, ab paklotön, dat deadöf paslugonös dub lif!
  5. Utan, kel epreparom obis ad atos binom God, kel egivom obes i panoti lanana.
  6. Sekü atos labobs ai kuradi gudik, ifi sevobs, das dü tim, kü stebobs in koap, stebobs plödü Söl;
  7. (ibä zigolobs in lekred, ab no in logamov),
  8. labobs nu kuradi gudik, e buükobs ad segolön se koap e lügolön lü Söl.
  9. Demü atos labobs stimiäli, va binobs in lomän u plödü lomän, ad plitön omi.
  10. Obs valik mutobs ga dajonön obis foi cödalastul Kristusa, dat alan obas dagetonös dilodi okik, ma utos, kelosi edunon in stad koapik, va atos binon gudik u badik.
  11. Bi kludo sevobs dredi Söla, süadükobs menis, ed obs pasevädükobs fa God; e nu spelob, das pasevädükobs i in konsien olas.
  12. No komandobs obis it dönu oles, ab givobs oles pöti ad pleidülön demü obs, dat labolsös bosi ad sagön utanes, kels pleidülons demü dins logamovik, ab no demü uts ladöfa!
  13. Ibä if stadobs plödü tikäl, atos jenon stimü God; ed if binobs süeniks, atos binon frutü ols.
  14. Ibä löf Kristusa müton obis ad tikön, das if balan edeadom pro valans, tän valans edeadons.
  15. Ed edeadom pro valans, dat utans, kels lifons, no olifonsöv pro oks it, ab pro om, kel edeadom, ed elelifikom pro ons.
  16. Klu denu no sevobs plu eki ma mid; e do esevobs Kristusi ma mid, nu no plu dunobs atosi.
  17. Klu, if ek binon in Kristus, evedon täno jafäb nulik: vönäd epasetikon, e val vo evedon nulik.
  18. Atos valik edavedon se God, kel erekosilom obis ko ok dub Yesus: Kristus, kel ekonfidom obes düni rekosila,
  19. bi God erekosilom dub Kristus volanefi, dubä no äkalükom one midunis onik, ed egevom obes vödi rekosila.
  20. Dub Kristus nu binobs lesedäbs, äsva God it medamü obs meibom olis. Lebegobs oles nämätü Kristus: Rekosilolsöd olis ko God!
  21. Om, kel no esinom peträitom demü obs, äsva esinom; dat pögidükobs fa om lo God.

KAPIT: VI[edit]

  1. Bi nu binobs kevobans, dabegobs, das no egetols vaniko benädi Goda.
  2. (Ibä sagom: ‚Ün tim plitik elilidob oli, e tü del dabena eyufob olis‛. Ekö! nu binos tim plita; ekö! nu binos del dabena).
  3. Kodobs pö dinäd no bal skäni anik, dat kultipläg no pablamonös!
  4. ab in dins valik kondötobs as dünans Goda: pö sufäl mödasotik, dränäl, ditret, teifül,
  5. batams, fanäbams, volut, letöbid, neitogal, cun,
  6. medü pued, nol, lunasufäl, flenöf, lüäl saludik, löf stedälik,
  7. dub predam verata, dub näm Goda, ko vafs, me kels komipoy pro gid, e demü tatak e demü jelod,
  8. zänodü stim e lunof, blam e lob, va palecedobs as cütans ud as veratiälans,
  9. as nesevädans ud as sevädans, as deadölans ud, ekö! äs obs, kels lifobs, kels palepönobs e ga no pedeidobs,
  10. kels glumobs, e ga ai fredobs, kels binobs pöfiks, e ga liegükobs mödikanis, kels binobs nedalabans e ga labobs vali.
  11. Emaifükobs mudi pro ols, o elans di ‚Corinthus‛! spad dabinon in ladäl obsik.
  12. No labols spadi nabik in obs, ab ols binols smalaladäliks.
  13. Bläfolsöd nu atosi! (spikob oles äsä lü cils obsik); spadolsöd i ols pro obs in ladäl olsik!
  14. No balädolsöd ko nenlekredans! ibä komun kinik dabinon-li bevü gid e negid? rölet kinik dabinon-li bevü lit e dag?
  15. Kisi Kristus ed el ‚Beliar‛ laboms-li kobädiko? U kisi lekredan e nenlekredan labons-li kobädiko?
  16. Lio nu tem Goda lönedon-li lä lugods? Binobs ga tem Goda liföl, äsä God sagom: ‚Olödob in ons, ed okosädob ko ons; obinob God onas, ed ons obinons pöp obik‛.
  17. ‚Segololsöd kludo se zänod onas, soalükolsöd olis! Söl sagom, no doatolsöd neklinikosi! ed olasumob olis‛.
  18. ‚Ed obinob Fat pro ols, ed ols obinols sons e dauts pro ob, Söl: Valanämädal sagom‛.

KAPIT: VII[edit]

  1. Bi nu labobs promis at, o löfäbs! klinükobsöd obis it de miot alik mida e lanöfa, e lölöfükobsöd saludükami obas in dred Goda!
  2. Spadolsöd pro obs in ladäl olsik! Eträitobs neki negidiko, epäridükobs neki, ecütobs neki tuflagedo.
  3. No sagob atosi ad micödön olis; ibä ya büo esagob, das binols in ladäls obsik ad deadön kobo ud ad lifön kobo.
  4. Spikob vemo stedäliko lü ols, pleidülob vemo dö ols; fulob me trod, e fred bundanon in obs pö dränäl valik obas.
  5. Ibä ven ikömobs ini Makedonän, leno elabobs takedi, ab äteafülobs in tefs valik: plödo komip ädabinon, e ninälo dred.
  6. Ab God, kel trodom mükikanis, ägevom obes trodi dub köm de ‚Titus‛;
  7. e no te dub köm omik, ab i dub trod, keli etuvom lä ols, du änunom obes dö desir olsik, dö viam olsik, dö lanäl olsik demü ob, sodas äfredob plüo mödikumo.
  8. Das eglumükob olis dub pened obik, atosi no lepidob; ed ifi ilepidob osi (ibä logob, das pened et eglumükon olis, ifi atos ejenon pro tim brefik),
  9. nu fredob, no bi peglumükols, ab bi dub glum et edagetols dasevi; ibä eglumikols ma plid Goda, sodas leno elabols dämi kodü obs.
  10. Ibä glum ma vil Goda dugon ad lecen nenlepidik lü beat, du glum volädik kodon deadi.
  11. Ibä ekö! kiogretik glum at ma vil Goda esüükon pö ols! paologi, skani, dredi, desiri, zili, pönidi! Pö val ejonols, das binols kliniks in din at.
  12. Nu no epenob oles ad spikön dö utan, kel enegidükon, ni dö negidükäb, ab ad notükön lo God kälöfi, ko kel edunols gönü obs.
  13. Sekü atos petrodobs. E lä trod at obas, fredob nog mödikumo dö fred ela ‚Titus‛, bi lanöf omik piklieton fa ols valik.
  14. Ibä, if epleidülob lä om boso dö ols, tän nu no binob jemik, bi leigo val, keli esagobs oles ebinon veratik, so i pleidül obsik lä ‚Titus‛ eklülädon binön veratik.
  15. E meugom plüo lü ols, nü memom lobedi olas valik, vio egetedols ko dred e drem omi.
  16. Fredob, das dalob konfidön olis in dins valik.

KAPIT: VIII[edit]

  1. Sevädükobs nu oles, o svists! benädi kinik God egivom komotes Makedonäna:
  2. pö dadämükam gretik dub dränäl, äfredons bundaniko, e to pöf susgretik okas ejonülons liegöfi ladäla stedälik okas;
  3. ma fäg, si! (dalob sagön) sus fäg, oksao
  4. ebegons mu draniko obes göni, ad dalön kompenön pö yuf pro saludans,
  5. e no edunons te utosi, kelosi äspelobs, ab egivons okis it, büiko Söle, täno obes ma vil Goda.
  6. So estigädobs eli ‚Titus‛ ad lölöfükön göni et, keli primo igivom oles.
  7. Klu leigoäsä bundanols in dins valik, in lekred, in vöd, in sev, in kälöf pö dins valasotik, in löf olsik pro obs, spelob, das bundanols i pö givot at.
  8. No sagob atosi as büd, ab te ad bluföfükön, leigodü zil votanas, stedäli löfa olsik.
  9. Sevols ga benädi Söla obsik: Yesus Kristus, das om, kel äbinom liegik, evedom pöfik demü obs, dat liegikolsös dub pöf omik!
  10. Gevob te cedi obik in din at, ibä atos binon frutik lü ols, kels pas bü yel bal eprimols no te ad dunön osi, abi ad vilön osi!
  11. Benö! ledunolsöd nu duni, dat ledun baiädonös ko klien vila olsik, efe se ut, keli dalabols!
  12. Ibä if klien dabinon, tän givot ma ut, keli dalaboy, binon benokömik, no ma ut, keli no dalaboy.
  13. Ibä no jenosös, das säditretikam binon pro votan, e ditret pro ols, ab das dalab binon leigik, e das ut, keli labols ün tim gönik bundaniko, pagebon pro def votanas!
  14. dat i bundan votanas, pagebädonös pro def olsik, sodas leig davedonös!
  15. Soäsä pepenos: ‚Utan, kel älabon mödiko, no älabon tu mödiko, ed utan, kel älabon nemödiko, no älabon tu nemödiko‛.
  16. Danob nu Godi, das egevom zili ot pro ols ini ladäl ela ‚Titus‛,
  17. sodas älilidom dabegi obik, ed ätävom okao leziliko lü ols.
  18. Ko om elesedobs hisvisti, kel palobom in komots valik demü predam omik gospula.
  19. (E no te atos. Pedavälom i fa komots as ketävan obsik pö löfavobod, keli dunobs ad glorükam Söla it, e bai vip obas).
  20. Dunobs so, dat nek miniludükonös obis demü givots bundanik, kelis loveblinobs.
  21. Ibä kälobs benorepüti obas, no te lo Söl, ab i lo mens.
  22. Elesedobs ko oms i hisvisti votik obsik, keli eseivobs suvo pö jenets mödik as man zilik, kel nu binom nog mödiko zilikum sekü konfid gretik okik in ols.
  23. Va tefos eli ‚Titus‛: kekompenan obik ä kevoban pro ols, u va tefos hisvistis obsik: lesedäbs komotas, binoms glor Kristusa.
  24. Jonülolsöd täno lo komotans löfi olsik, e blöfi, das epleidülobs gideto lo oms demü ols!

KAPIT: IX[edit]

  1. Binos ga nezesüdik lü ob ad penön oles tefü yufiduin pro saludans.
  2. Ibä sevob klienöfi olsik, demü kel epleidülob tefü ols lo Makedonänans. Äsagob ones, das Lagayän ya äblümon bü yel bal; e zil olsik estigädon mödikanis.
  3. Lesedob kluo hisvistis, dat pleidül obsik tefü ols no binonös nenkodik in dinäd at, e dat jenöfo, äsä esagob, blümolsös!
  4. Voto, if Makedonänans anik okömonsöv bo ko ob, e no otuvonsöv, das binols blümiks, obs (u buikumo: ols) pojemükobsöv dinädü konfid at obas.
  5. Demü atos ecedob osi zesüdiki ad stigädön hisvistis ad büogolön lü ols, ed ad koedön blümükön legivoti benedik büo pinotädöli, sodas binon blümik as givot benedik e no as givot lavarana.
  6. Betikolsöd: Utan, kel sovon späliäliko, oklopom i späliäliko; utan, kel sovon giviäliko, oklopon i giviäliko!
  7. Ek dunonöd kludo, soäsä edesinon ninälo, no ko pid u sekü müt! ‚ibä God löfom givani fredaladälik‛.
  8. God fägom ad gevön oles bundaniko gönodi alik, sodas ols it, in tefs valik dalabölo saidiko, labols bundani pro vobod gudik alik.
  9. Soäsä pepenos: ‚Eseastürülom, ed egivom pöfanes; gid omik dulon laidüpio‛.
  10. Om, kel blünom sovane sidi, e givom one bodi as zib, olegivom oles sidi, omödükumom oni, ed obundanükom sekis gida olsik.
  11. So obinols in tefs valik saidiko liegiks pro benods valik, kels ovobedons medamü obs danöfi lü God.
  12. Ibä föl kultiduina at no binon te läfulükam defa saludanas, ab labon sinifi gretikum dub danems mödik lü God.
  13. Ibä dubä ebenosufols blufi pö yufiduin at, lelobons Godi, demü lobed olsik lü lekoef olsik gospula Kristusa, e demü stedäl olsik in kompen ko ons e ko valans.
  14. Ed in pleks pro ols, ledesirons lü ols demü benäd susgretik Goda lü ols.
  15. God padanomöd demü legivot nesagovik oka!

KAPIT: X[edit]

  1. Ob it, ‚Paulus‛, kel binob-la mükik komü ols, e kuradik fagü ols, nämätü sofäl e däläl Kristusa,
  2. lebegob oles ad no mütön obi ad jonülön kuradi, ven binob lä ols, keli desinob ad gebön kol semans, kels cedons, das bitob ma mid.
  3. Ibä, ifi dunobs midiko, no komipobs me meds midik.
  4. (Vafs, me kels komipobs ga no binons midiks, ab pö God saidiko nämiks ad däbreikön fortifis).
  5. Me ons däbreikobs blöfädis e möni alik, kel palöodon ta nol Goda; dugobs tikodis valik lü lobed Kristusa,
  6. e blebobs blümiks ad pönön duni nelobedik alik, ven lobed olsik uvedon valemik.
  7. Demolsöd utosi, kelos binon klülik! If ek cedon, das duton lü Kristus, tän betikonös ninälo, das leigo, äsä on it duton lü Kristus, i obs dutobs lü om!
  8. Igo if pleidüloböv nog mödikumo demü nämäd, keli Söl egevom obe ad devodükön olis, e no ad päridükön olis, no jemoböv;
  9. voto süükoböv jini, das ästeifob ad jeikön vemo olis medü peneds.
  10. Ga sagoy: Peneds binons sio mu veütiks ä seväriks, ab bit pösodik omik binon fibik, e vöd omik no labon völadi.
  11. Utan, kel sagon somikosi, betikonös, das binob man ot, kel fagobinöl lüspikob oles in peneds, e kel komöl bitob dunölo!
  12. No künobs ad dütedön obis it somanes, kels komandons okis, ud ad leigodön obis ko ons; ab bi cödons okis ma oks it, e leigodons okis ko oks it, no binons täläktiks.
  13. Leno vilobs pleidülön demü obs susmafiko, ab ma mafäd, äsä God egevom obes ad kömön lü ols.
  14. Ibä no sustöbidobs, äsva no kanobs rivön olis; ibä jenöfo ekömobs lä ols dub predam gospula Kristusa.
  15. No pleidülobs susmafiko demü utos, kelos pedunon fa votans, du labobs speli, das dub glof lekreda olsik, olabülobs pladi mu gretiki bevü ols,
  16. ad notükön gospuli ini tops bei ut olas, no ad pleidülön demü utos, kelos ya pedunon fa votans.
  17. ‚Utan, kel pleidülon, pleidülonöd demü Söl‛!
  18. Ibä no utan, kel komandon oki it digädon lobi, ab utan, keli Söl komandom.

KAPIT: XI[edit]

  1. Viloböv, das sufälols bosi fopa de ob! Ab sio bo sufälols atosi de ob.
  2. Vö! jaludob demü ols, äsä God jaludom, ibä eyümätob olis ko man bal, ad blinön olis, as jigam puedik, lü Kristus.
  3. Dredob ye, das, äsä snek ecüton eli ‚Eva‛ dub lekäf okik, i meug olsik leigo orübikon ed odeikon boso de balug, kel binon in Kristus.
  4. Ibä if ek kömomöv e notükomöv Yesusi votik, keli no enotükobs, u dagetolsöv Lanali votik, keli no edagetols, u gospuli votik, keli no elüsumols, ols sufälolsöv osi mu gudiko.
  5. Ga cedob, das no läsob-la leigodü paostolans mu gretiks ets.
  6. Ifi binob neskilik pö spikam, sevi labob saidiko; alo esevädükobs obis oles in dins valik.
  7. Ud edunob-li sinodi, ven ädonükob obi, dat älöpikolsös, dubä epredob glato gospuli Goda?
  8. Komotis votik eberavob, bi elüsumob mesedi ad kanön dünön olis, e ven äbinob lä ols, ed äneodob bosi, eböladob neki demü atos,
  9. ibä uti, keli äneodob, hisvists eblinoms, kels äkömoms se Makedonän. So ekälälob in tefs valik ad no belodön olis, e so obleibob dunön.
  10. So fümiko äsä verat Kristusa binon in ob, so fümiko no oleadob moükön de ob pleidüli at oba in topäds Lagayäna.
  11. Kikodo-li? Bi no löfob-li olis? God sevom osi.
  12. Kelosi dunob, utosi obleibob dunön, ad mosumön dinädi de utans, kels sukoms dinädi ad kanön pleidülön, das binoms-la leigans oba.
  13. Ibä somans binoms paostolans dobik, vobans cütik, kels bitoms, äsva binoms paostolans Kristusa.
  14. Atos no binon stunidabik; ibä i diab lasumom logoti silanana lita.
  15. Klu no binos bos patik, das i dünans oma bitoms äsä dünans gida; fin omas ye obinon ma vobods omsik.
  16. Dönu sagob: Nek lecedonöd obi fopani! If no, benö! lecedolsöd täno obi fopani! dat i ob kanobös pleidülön boso!
  17. Kelosi nu osagob, utos no binon ma suem Söla, ab äsva sagob as fopan, bi tefos nu pleidüli.
  18. Bi mödikans pleidülons ma mid, nu i ob odunob atosi.
  19. Ibä sufälols blesiro fopanis, bi binols sapiks.
  20. Ibä sufälols, if ek sumätükom olis, slugom olis, fopülükom olis, träitom ludigidälo olis, flapom sui logod olas.
  21. Jemo mutob sagön, das äbinobs tu fibiks pro atos. Ab demü utos, demü kelos votan künon ad pleidülön (spikob as fopan), i ob künob ad pleidülön.
  22. Binons-li hebreyans, i ob binob utan. Binons-li Yisraelänans, i ob binob utan. Binons-li posbinükäbs de ‚Abraham‛, i ob binob utan.
  23. Binons-li dünans Kristusa, (spikob as fopan) ob binob mödikumo utan; evobob töbikumo, esufob lebatamis bundaniko, estebob in fanäböps mödik, dönuamo ebinob in deadamariskäd.
  24. (De yudans egetob lulna flapis foldeg nä bal,
  25. kilna stafaflapemis, balna pestonob, kilna enafädob, balna elifädob deleneiti in gufur).
  26. Pö tävs mödik obik ebelifob riskädis: su flumeds, dub ravans, de kelomänans, de pagans, in zif, in däsärt, su mel, bevü svists dobik;
  27. pö vobod töbik e ditret, pö neitogals ömik, pö faem e soaf, pö cuns suvik, pö kold e nüd.
  28. Zuo labob aldeliko bundano kudis demü komots valik.
  29. Kin binon-li so fibik, äsä ob binob? Kin skanon-li, äsä ob dunob? Nö! binob mu leskanik!
  30. If mutob pleidülön, tän vilob pleidüön demü fib obik.
  31. God ä Fat Söla obsik: Yesus Kristus; om, kel palelobomöd laidüpio! sevom, das no lugob.
  32. In ‚Damascus‛ seimna provinaguveran hirega ‚Aretas‛ äbüedom galädön zifi: ‚Damascus‛ ad fanön obi,
  33. e da fenät in mön päsädob in bäset, ed äskeapob so se nams oma.

KAPIT: XII[edit]

  1. If mutob pleidülön, do atos no fruton obi, tän nu kömob ad visions e dasevädükams Söla.
  2. Sevob mani: Kritan, kel bü yels degfol (va atos ejenon in koap u plödü koap, no sevob; God sevom osi), pedugom lü sül kilid.
  3. Sevob tefü man at (va atos ejenon in koap u plödü koap, no sevob; God sevom osi),
  4. das pedugom lü parad ed älilom us vödis nesagovik, kelis men no dalon notodön.
  5. Demü somans opleidülob; demü ob it no opleidülob, pläsif in fibäl.
  6. Ibä if viloböv pleidülön, no binoböv fopan, bi sagoböv täno verati. Onedunob ye atosi, dat nek dacedonös plu obi, äsä decedon obi ma utos, kelosi logon u lilon.
  7. E dat no pleidobös demü veüt dasevädükamas, spin pegivon obe in mid, silanan diaba ad lebatön obi, dat no vedobös tu pleidik!
  8. Demü atos ebegob kilna Söle, dat at moikonös!
  9. Ed obe esagom: Benäd obik saidonös pro ol! ibä näm obik paduinon in fib. Sekü atos opleidülob plu in fibäl obik, dat näm Kristusa binonös in ob!
  10. Sekü atos plidob fibälis, miträitis, mekädis, pöjutis e teifülastadis demü Kristus; ibä if binob fibik, tän binoböv nämik.
  11. Evedob fopan, ols emütols obi. Imutoböv palobön fa ols, ibä leno läsob leigodü paostolans mu gretiks, do binob i nos.
  12. Val, dub kel paostolan binom sevädovik, peduinon bevü ols ko sufäd gretik: mals, milags, näms.
  13. Ibä in kis ebinols-li läsiks leigodü komots retik, pläs no ebelodob olis pro ob it? Säkusadolsös obe negidi at!
  14. Ekö! kilidnaedo blümob ad kömön lü ols, e dönu no obelodob olis; ibä no sukob uti, kel duton lü ols, ab olis. Ibä cils no sötons spälön pro pals, ab pals pro cils.
  15. Nu plidoböv ad pelön frädis, ed igo sakrifön obi it pro lans olsik, ifi, dubä löfob olis mödikumo, palöfoböv nemödikumo.
  16. Binosös-la soik! No obelodob olis, ab bi binob jäpan voik, lukäfo eslopükob olis.
  17. Ga no etuflagob-li de ols dub balan lesedäbas obik?
  18. Edabegob eli ‚Titus‛, ed elesedob hisvisti et ko om. El ‚Titus‛ ga no etuflegom-li bosi de ols? No ekondötobs-li in lüäl ot? No ebegolobs-li vegi ot?
  19. Cedols ya, das jelodobs obis lo ols. Spikobs ye lo God nämätü Kristus. Val, o löfäbs! jenon ad devodükön olis.
  20. Ibä dredob, das, ven ukömob seimna, no otuvob olis so, äsä viloböv, ed ob no potuvob fa ols so, äsä ols vilolsöv. No dabinonsöd feits, jaluds, lezuns, teläl, slän, mispikam, pleidäl, brul!
  21. dat, ven kömob, God no mükükomös dönu obi lo ols, ed ob no lügobös demü mödikans, kels esinons büikumo, e no edeflekons okis de nepued, dulter e nestön, demü kels ädöbikons!

KAPIT: XIII[edit]

  1. Klu binos nu naed kilid, das kömob lü ols; cödäd alik pefidunon ma temunods temunanas tel u kilas.
  2. Äsä esagob büo, ven äbinob pö naed telid lä ols, sagob nu dönu büo, du fabinob, utanes, kels esinons büiko, e votanes valik, das, ven kömob dönu no ospalob ones bosi,
  3. bi flagols blöfi, das dub ob Kristus spikom, kel no binom fibik cedü ols, ab kel dunom nämiko bevü ols.
  4. Ibä, do pekrodom, bi äbinom fibik, lifom ga sekü näm Goda; so i obs binobs fibiks in om, ab dub näm Goda olifobs ko om pro ols.
  5. Blufolsöd olis it, va binols in lekred, xamolsöd olis it! No küpols-li in ols it, das Yesus: Kristus binom in ols? Pläsif bo no binols bluföfiks.
  6. Spelob ye, das osevols, das no binobs nebluföfiks.
  7. Nu lebegob Gode, das no dunolsös badi anik, no dat klülädobsös, das ebenosufobs blufi, ab dat dunolsös jöni, ifi binobsöv nebluföfiks!
  8. Ibä no fägobs ad dunön bosi ta verat, ab sio gönü verat.
  9. Ibä fredobs, if binobsöv fibiks, ed ols binolsöv nämiks; demü atos ga lebegobs gudikumami olas.
  10. Demü atos penob oles, du fabinob, dat no ozesüdosös, ad bitön seväriko, ven binob lä ols! ma gitod, keli Söl egivom obe, ad devodükön e no ad dämükön.
  11. Fovo, o svists! fredolsöd, gudikumolsöd, petrodolsöd, balälolsöd, kipedolsöd püdi! e God löfa e püda obinom lä ols.
  12. Glidolsöd odis ko kid saludik! Saludans valik glidons olis.
  13. Benäd Söla: Yesus Kristus, löf Goda, e kobäd Saludalanala binonsös lä ols valik!


(Pened telid at elanes di ‚Corinthus‛ pepenon in ‚Philippi‛ in Makedonän fa ‚Titus‛ e ‚Lucas‛).

---------- oOo ----------


Ninädalised

Retrieved from "https://wikisource.org/w/index.php?title=Pened_telid_de_‚Paulus‛_elanes_di_Corinthus&oldid=211685"