Paokalüp de ‚Ioannes‛

KAPIT: I

1. Dasevädükam Yesusa: Kristus, keli God egevom ome, ad jonön dünanes okik utosi, kelos ojenon suniko, e keli dub silanan okik, keli elesedom demü atos, enunom hidünane okik: <Ioannes>.
2. Atan esevädükom vali, keli elogom dö vöd Goda e dö temunod tefü Yesus: Kristus.
3. Beatik utan binon, kel loreidon, ed utans, kels lilons vödis profetama, e kels demons utosi, kelos pepenon in at; ibä tim binon nilik.
4. <Ioannes> komotes in Lasiyän: benäd e püd binonsöd lü ols de om, kel binom, ed äbinom, ed obinom, de lanans vel, e kels binons fo tron omik,
5. e de Yesus: Kristus, temunan fiedik, balid-motäb se deadans ä plin regas tala; de om, kel esavom obis de sinods obsik dub blud okik,
6. e kel evedükom obis regäni e kultanis pro God ä Fat okik. Lü om glor e nämäd ai binonsöd laidüpio! So binosös!
7. Ekö! kömom me lefogs, log alik ologon omi, ed i utans, kels edusteigoms omi. Tribüts valik tala olügodons demü om. Si! so binosös!
8. «Binob el <Alpha> ed el <Omega>» [prim e fin] Söl: God sagom: «om, kel binom ed äbinom, ed obinom, Valanämädal».
9. Ob, <Ioannes>, hisvist olsik ä kekompenan olsik pö dränäl, e regam, e sufäl in kobäd ko Yesus: Kristus, äbinob su nisul: <Patmos> demü vöd Goda e temunod tefü Yesus: Kristus.
10. Ven äbinob seimna tü del Söla [sudel] in on in stäat, älilob po ob vögi so laodiki äsä uti posuna,
11. kel äsagom: »Penolöd utosi, kelosi logol ini buk e sedolöd oni lü komots vel: <Ephesus>, <Smyrna>, <Pergamum>, <Thyatira>, <Sardis>, <Philadelphia> e <Laodicea>».
12. Ad atos ägüflekob obi ad logön, kiöpao vög äkömon, e ven igüflekob obi, älogob litikipianis goldik vel,
13. e zänodü litikipians vel eki labü logot Sona mena, peklotöla me klot jü futs dolagöl, e kela blöt pizönon me zönül goldik;
14. kap e herem omiks äbinons vietiks, äsä lain nifavietik; logs äsümons ad filaflam,
15. futs omik äsümons, äsva äbinons de bronsöt in furnod peglütöl, e vög omik äbinon äsä lenoid vatas mödik;
16. nam detik omik äkipon stelis vel, e se mud omik gläv telkötik japik äkömon, e logot omik äbinon äs ut sola, ven nidon mu nämöfiko.
17. Älogölo omi, ädofalob, äsva ideadob, foi futs omik; äseitom ye nami detik sui ob, ed äsagob: «No dredolöd! binob balidan ä lätikan,
18. e lifölan; äbinob deadik, ed elifikob, ekö! ai lifob laidüpio, ed ob dalabob kikis e deada e disvola.
19. Penetolöd kludo utosi, kelosi elogol, e kelos ojenon poso!
20. Klän stelas vel, kelis elogol in nam detik obik, e litikipianas goldik vel atos binon: stels vel binons silanans komotas vel, e litikipians vel binons komots vel».

KAPIT: II

1. «Penolöd silanane komota di <Ephesus>: Atosi om spikom, kel kipom stelis vel in nam detik okik, kel zivegom zänodü litikipians goldik vel:
2. Sevob vobodis olik, vobi töbik olik, sufäli olik, i das no kanol sufälön badanis, das eblufol utanis, kels sagoms, das binoms paostolans, ab no binoms utans, e das eplakol, das binoms lugans;
3. binol sufälik, ed esufälob mödiki demü nem obik, nes fenikön.
4. Ab labob dodi ta ol, das eklemol löfi balid olik.
5. Betikolöd nivodi löpik, de kel efalol, votükolöd meugi olik e dunolöd vobodis ettimik! If no, tän kömob lü ol e sumob litikipiani de top onik, pläsif lecenol.
6. Ab labol dini gudik bal, das hetol vobodis elanas di <Nicolaus>, kelis i ob hetob.
7. Utan, kel labon lilis, lilonöd utosi, kelosi Lanan sagon komotes: Utane, kel vikodon, ogivob ad fidön de lifabim, kel binon in parad Goda.
8. Penolöd silanane komota di <Smyrna>: Atosi om spikom, kel binom balidan ä lätikan, kel äbinom deadik, ed evedom lifik:
9. Sevob vobodis olik, e dränäli, e pöfi (ab binol liegik), e släni utanas, kels sagons, das binons yudans, e kels no binons utans, ab sünagog diaba.
10. No dredolöd demü utos, kelosi omutol sufön! Ekö! diab ojedom ananis olas ini fanäböp, dat pablufolsös! ed olabols dränäli dü dels deg. Binolöd fiedik deadio! tän ogivob ole kronüli lifa.
11. Utan, kel labon lilis, lilonöd utosi, kelosi Lanan sagon komotes: Utan, kel vikodon, no olabon dämi sekü deadam telid.
12. Penolöd silanane komota di <Pergamum>: Atosi om spikom, kel labom glävi telkötik japik:
13. Sevob vobodis olik, ed utöpi, kö lödol, kö tron diaba binon. Ekipedol fümiko nemi obik, e no änoädol lekredi in ob, igo no dü dels, ün kels el <Antipas>: temunan fiedik obik pedeidom lä ol, kö diab lödom.
14. Ab labob dodis anik ta ol, sevabo, das labol us menis, kels bleibons slopön lejoni di <Balaam>, kel ätidom ele <Balac> ad seitön joikastoni lo cils Yisraeläna: fid sakrifota mita e nepuedam.
15. Somo labol i pösodis, kels slopons lejoni elanas di <Nicolaus>.
16. Votükolöd kludo meugi olik! If no, tän kömob suno lü ol ed okomipob ta ons me gläv muda obik.
17. Utan, kel labon lilis, lilonöd utosi, kelosi Lanan sagon komotes: Utane, kel vikodon, ogivob bosi manada peklänedöl; i ogivob one gronastoni vietik, e su gronaston at nem nulik pepenon, keli nek sevon, äsä utan, kel geton oni.
18. Penolöd silanane komota di <Thyatira>: Atosi Son Goda sagom, kel labom logis äsä filaflamis, e futis, äsva binons de bronsöt:
19. Sevob vobodis olik, löfi olik, lekredi olik, benodis olik, e sufäli olik; e vobods lätik olik binons gudikums ka büiks.
20. Ab labob dodi ta ol, das letol jäfön vomi <Iezabel>, kel nemof oki it jiprofetani, e kel tidof dünanes obik, e bätodof onis ad nepuedön ed ad fidön miti lugodes pesakriföli.
21. Egevob ofe timi ad lecenön, ab no vilof deflekön oki de nepued.
22. Ekö! ojedob ofi sui bed, ed odränälob utanis, kels odulteroms ko of, if no deflekoms okis de vobods ofik,
23. e cilis ofik odeidob. Somo komots valik osevons, das ob binob utan, kel zamob roinis e ladälis, ed obläfob alane olas ma vobods onik.
24. Oles, votanes in <Thyatira>, kels no dunols ma lejon ofik, e kels no sevols dibätis diaba (äsä nemoy atis); oles sagob: No ofledob olis me bligäd votik;
25. kipedolsöd te utosi, kelosi labols, jüs kömob!
26. Utane, kel vikodon e demon jü fin vobodis obik, ogevob nämädi löpü nets,
27. ed obäläton onis me staf ferik; podäbreikons äsä gefs taimik; nämädi kelik i ob egetob de Fat obik;
28. ed ogivob one gödasteli.
29. Utan, kel labon lilis, lilonöd utosi, kelosi Lanan sagon komotes»!

KAPIT: III

1. «Penolöd silanane komota di <Sardis>: Atosi om spikom, kel labom Lananis vel Goda, e stelis vel: Sevob vobodis olik; labol repüti, das lifol, e binol deadik.
2. Galolöd, e nämükolöd reti, kel odeadon! Ibä etuvob, das vobods olik no binons lölöfiks lo God obik.
3. Memolöd nu, vio egetol ed elilol vödi; kipedolöd oni e lecenolöd! If no galikol, okömob lü ol äsä tifan; e no sevol, tü düp kinik okömob lü ol.
4. Ab labol in <Sardis> pösodis nemödik, kels no emiotons klotis oksik. Ozivegons ko ob in klots vietik, bi digädons atosi.
5. Utan, kel vikodon, pokloton so in klots vietik, e no oduliunob nemi onik in buk lifa; olekoefob ye nemi onik lo Fat obik e lo silanans omik.
6. Utan, kel labon lilis, lilonöd utosi, kelosi Lanan sagon komotes!
7. Penolöd silanane komota di <Philadelphia>: Atosi Saludal, Veratal, spikom, kel labom kiki de <David>: om, kel maifükom, e nek ofärmükon; om, kel färmükom, e nek omaifükon.
8. Sevob vobodis olik. Ekö! ekälälob, das yan maifon lo ol, keli nek kanon färmükön; ibä, do labol nämi pülik, ekipedol vödi obik e no enoädol nemi obik.
9. Ekö! lovegivob ole ananis se sünagog diaba, kels lesagons, das binons yudans, e kels no binons utans, ibä lugons osi. Ekö! okodob, das prostärnons foi ol; osevons, das elöfob oli.
10. Bi ekipedol fiedo büdi ad sufälön ma sam obik, i ob okipedob oli ed osavob oli se blufod, kel okömon love vol lölik ad blufodön belödanis taleda.
11. Kömob suno. Dakipolöd utosi, kelosi labol, dat nek desumonös kronüli olik!
12. Utani, kel vikodon, ovedükob kölümi in tem Goda obik, e neföro olüvon oni; openob sui on nemi Goda obik, e nemi zifa Goda obik: <Hierusalem> nulik, kel odonikon se sül Goda obik, e nemi nulik oba.
13. Utan, kel labon lilis, lilonöd utosi, kelosi Lanal sagon komotes!
14. Penolöd silanane komota di <Laodicea>: Atosi Zepal, Temunal fiedik ä veratik, Jafäb balid jenotema Goda, spikom:
15. Sevob vobodis olik, sevob, das binol ni koldik ni hitik. Iviloböv, das binol u koldik u hitik.
16. Bi nu binol nelanälik; ni hitik ni koldik, ospukob oli se mud obik.
17. Bi sagol: Binob liegik, peliegükob, no labob defi bosa; no sevol, das ga binol miserabik e yamabik, e pöfik, e bleinik, e nüdik;
18. so konsälob ole ad remön de ob goldi in fil perafinüköli ad vedön liegik, e klotis vietik ad palenükön, dat jemod nüda olik no notikonös, e nugveti, ad nugvetön me at logis olik, dat logolös!
19. Kelis löfob, utanis pönob e lepönob; binolöd kludo zilik e lecenolöd!
20. Ekö! stanob len yan e nokob. If ek lilon vögi obik e maifükob yani, tän onükömob lä on, osänedob ko on, ed osänedon ko ob.
21. Utani, kel vikodon, okoedob seadön ko ob sui tron obik, leigoäsä i ob evikodob, ed eseidob obi lä Fat obik su tron omik.
22. Utan, kel labon lilis, lilonöd utosi, kelosi Lanan sagon komotes»!

KAPIT: IV

1. Pos atos, ekö! älogob yani maifik in sül, e vög balid, keli ilielob spikön lü ob ko vög so laodik äsä ut posuna, äsagon: «Xänolöd isio! ed ojonob ole utosi, kelos muton jenön pos atos».
2. Sunädo äreafob ini stäat, ed ekö! in sül tron ästanon, e su tron balan äseadom,
3. ed om, kel äseadom su on, äsümom ad yaspid e karneol, e zü tron reinabob äbinon, kel äsümon ad smaragoin.
4. Zü tron trons teldegfol ädabinons, e su trons teldegfol at bäldikünans teldegfol äseadoms, kels piklotoms in klots vietik, e kels älaboms kronis su kaps.
5. De tron leklärastrals, vögs e tonäratonäts äsejutons, e fo tron lampads flamöl vel äfilons; ats binons lanans vel Goda.
6. Fo tron bos, äsä mel glätik, ad kristad sümöl, ädabinon. E zänodü tron, e züo zü tron nims fol äbinons, kels äfulons föfo e pödo me logs.
7. Nim balid äsümon ad leon, telid ad bubül, kilid älabon logodi äsä uti mena, e folid äsümon ad kvil flitöl.
8. Al nimas fol älabon flitämis mäl, ed äfulon züo e nino me logs. Nenropo dü del e neit äsagons: «Saludik, saludik, saludik Söl: God, Valanämädal binom. Om, kel äbinom, e binom, ed obinom».
9. E ven nims ägevons glori, stimi e dani ome, kel seadom su tron, kel ai lifom laidüpio,
10. bäldikünans teldegfol ädofaloms loi om, kel seadom su tron, ed äprostärnoms foi om, kel ai lifom laidüpio, ed ädojedoms kronis oksik foi tron, äsagölo:
11. «O Söl ä God obsik! digädol ad getön glori, stimi e nämi, ibä ejafol levali; sekü vil olik ädabinon e pijafon».

KAPIT: V

1. Älogob in nam detik oma, kel äseadom su tron, buki plödo e nino pibepenöli, kel pisnilon me snils vel.
2. Ed älogob silanani nämädik, kel ävokon me vög laodik: «Kim digädom-li ad maifükön buki ed ad breikön snilis vel ona»?
3. E nek in sül, u su taled, u dis taled äfägom ad maifükön buki ed ad logön in on.
4. Ed ädrenob vemo, bi nek pälecedom digädik ad maifükön buki, ed ad logön in on.
5. E bal bäldikünanas äsagom obe: «No drenolöd! Ekö! leon se tribüt: <Iuda>, sprotan de <David>, evikodom, sodas kanom maifükön buki e snilis vel ona».
6. Tän älogob zänodü tron e nims fol, e zänodü bäldikünans hijipüli, kel älabon logoti, äsva pipugom, älabom honis vel e logis vel; ats binons lanans vel Goda, kels pelesedons lü läns valik.
7. Äföfiogolom ed älüsumom buki se nam detik oma, kel äseadom su tron.
8. E ven ilüsumom buki, nims fol e bäldikünans teldegfol äprostärnons loi hijipül, alan labü hap e köps goldik me boväl pifulüköls, ats binons pleks saludanas,
9. ed äkanitons hümi nulik ed äsagons: «Binol digädik ad lüsumön buki, ed ad breikön snilis onik, ibä pepugol, ed eremol pro God obsik tä blud olik menis tribütas, pükas, pöpas e netas valikas,
10. ed evedükol onis regis e kultanis pro God obsik, ed oreigons su taled».
11. Älülogob, ed älielob sagön silananis mödik zü tron, e nimis, e bäldikünanis, num onas äbinon degmils degmilatas e mils milatas,
12. ko vög laodik: «jipül pepugöl digädom ad getön nämädi, liegi, sapi, nämi, stimi, glori e lelobi»!
13. Ed älielob sagön jafoti alik, kel binon in sül, su taled, dis taled e su mel, e vali, kel binon in on: «Lü om, kel seadom su tron, e lü Jipül lelob, stim, glor, e näm ai binonsöd laidüpio»!
14. E nims fol äsagons: «So binosös»! e bäldikünans äprostärnoms.

KAPIT: VI

1. Tän älogob, das Jipül ämaifükom bali snilas vel, ed älielob sagön bali nimas fol me vög tonärik: «Gö»!
2. Älülogob, ed ekö! jevod vietik ädabinon; ed utan, kel äseadom su on, älabom cari, ed ome kronül pägivon; äbitom as vikodan ad vikodön nog mödikumo.
3. Ven ämaifükom snili telid, älielob sagön nimi telid: «Gö»!
4. E jevod votik äsüikon, kel äbinon filaredik; ed utane, kel äseadom su on, fäg pigevon ad mosumön püdi de taled, dat mens deidonsöd odis! Ome gläv gretik pägivon.
5. Ven ämaifükom snili kilid, älielob sagön nimi kilid: «Gö»! Älülogob, ed ekö! jevod blägik ädabinon; ed utan, kel äseadom su on, älabom in nam okik vätömi.
6. E se zänod nimas fol älilob äsä vögi, kel äsagon: «Grenamaf bal vuita tä denar bal, e grenamafs kil hoda tä denar bal! No dämükolöd leari e vitidi»!
7. Ven ämaifükom snili folid, älilob vögi nima folid, kel äsagon: «Gö»!
8. Älülogob, ed ekö! jevod faalik ädabinon, ed utan, kel äseadom su on, pänemon: Deadalanan, e disvolanef äsökon omi. Ed ones nämäd pigevon, ad päridükön foldili bal belödanas taleda dub gläv, dub faem, dub peideim, e dub nims sovadik.
9. Ven ämaifükom snili lulid, älogob dis latar lananis utanas, kels pideidons demü vöd Goda, e demü temunods, kelis ilekoefons.
10. Ävokons me vög laodik: «Lio lunüpo nog, o Söl saludik ä veratälik! onedunol-li ad gidükön obis, ed ad vinditön bludi obsik utanes, kels lödons su taled»?
11. Ed alane onas klot vietik pägivon, ed ones päsagos ad stebedön takediko nog dü brefüp, jüs num zesüdik kedünanas e svistanas onsiks, kels leigo äsä ons ämutons padeidön, püdageton.
12. Ven ämaifükom snili mälid, älogob, das taladrem vemik ädavedon; sol ävedon blägik äsä sak herik, e mun lölik ävedon bludaredik.
13. Stels sila äfalons sui tal, äsä figabim dub vien nämöfik pelemufüköl dejedon flukis nemadik okik.
14. Sil äyilidon, äsä buk, kel panürölon, e bels e nisuls valiks pämotirons de tops oksik.
15. E regs tala, cädans, lebüdans, liegans, nämädans, e slafans e lelivans valiks äklänedons okis in lekevs e slitods belas,
16. ed äsagons beles e klifes: «Falolsöd sui obs, e klänedolsöd obis demü om, kel seadom su tron, e demü lezun Jipüla!
17. Ibä del gretik lezuna omsik kömon, kin üfo okanon-li laidälön»?

KAPIT: VII

1. Pos atos äloegob stanön su guls fol taleda silananis fol, kels ädakipons vienis fol tala, dat ni su län, ni su mel, ni ta bim seimik vien ölebladonös!
2. Ed äloegob süikön lofüdao silanani votik, kel älabon snili Goda lifik. Ävokädon me vög laodik lü viens fol, keles fäg pigevon ad dämükön läni e meli:
3. «Dämükolsöd ni läni, ni meli, ni bimi, büä emäkobs me snil dünanis Goda obsik su floms onsik»!
4. Tän älelilob numi utanas, kels pimäkons me snil: mens baltumfoldegfolmil se tribüts valik cilas Yisraeläna pimäkons me snil.
5. Se tribüt di <Iuda> degtelmil, se tribüt di <Ruben> degtelmil, se tribüt di <Gad> degtelmil,
6. se tribüt di <Aser> degtelmil, se tribüt di <Nephthali> degtelmil, se tribüt di <Manasses> degtelmil,
7. se tribüt di <Simeon> degtelmil, se tribüt di <Levi> degtelmil, se tribüt di <Issacher> degtelmil,
8. se tribüt di <Zabulon> degtelmil, se tribüt di <Ioseph> degtelmil, se tribüt di <Benjamin> degtelmil pimäkons me snil.
9. Pos atos äloegob stanön lo tron Goda e lo Jipül lemödi so gretiki menas de nets, tribüts, pöps e püks valiks, das nek äkanon numön onis; piklotons in klots vietik, ed älabons pamatuigis in nams oksik.
10. Ävokädons me vög laodik: «Beat binonöd lü God obsik, kel seadom su tron, e lü Jipül»!
11. E silanans valik ipladons okis stanölo züo zü tron, bäldikünans e nims fol, äprostärnons su logods oksik lo tron ed äleplekons Godi,
12. äsagölo: «So atos binonöd! Lelob, glor, sap, dan, stim, näm e nämäd ai dutonsöd lü God obsik laidüpio»!
13. Bal bäldikünanas äprimom spikami, ed äsagom obe: «Utans, kels peklotons me klots vietik, kins binons-li e kiöpao ekömons-li»?
14. Äsagob ome: «O söl! sevol osi». Ed äsagom obe: «Atans binons utans, kels ekömons se dränäl gretik; elavons klotis oksik ed evietükons onis me blud Jipüla.
15. Demü atos dabinons lo tron Goda, e dünons omi dü del e neit in tem omik; ed om, kel seadom su tron, oregulom ones tänadis.
16. Leneföro ofaemons ud osoafons; ni vam sola, ni hit alseimik odrefons onis;
17. ibä Jipül, kel binom zänodü tron, obälätom onis ed odugom onis lü fons vatas lifa. E God odekluinom drenis valik de logs onsik».

KAPIT: VIII

1. Ven Jipül ämaifükom snili velid, stil ädavedon in sül dü za düp lafik.
2. Älogob silananis vel, kels ästanons lo God, e posuns vel pägivons ones.
3. Tän silanan votik äkömon ed äpladon oki ko bovälaskal goldik stanölo nilü latar, ed one boväl mödik pägivon, ad paseitön pro pleks saludanas valik sui latar goldik, kel äbinon fo tron.
4. E smok boväla älöpikon se nam silanana pro pleks saludanas lü God.
5. Tän silanan äsumon bovälaskali, äfulükon oni me fil latara, ed äjedon oni sui tal; e lenoid, tonär, leklär e taladrem ädavedons.
6. E silanans vel, kels älabons posunis vel, äblümükons okis ad posunön.
7. Balidan äposunon; e gräl e fil, pemigöls ko blud, ädavedons, e päjedons sui tal. Kildil bal gluna äfefilon, kildil bal bimas äfefilon, e yeb grünik valik äfefilon.
8. Silanan telid äposunon; e bos äsümöl ad bel gretik filöl päjedon ini mel, e kildil bal mela ävedon blud,
9. kildil bal jafotas liföl in mel ädeadon, e kildil bal nafas änafädons.
10. Silanan kilid äposunon; e se sil stel gretik äfalon, äsä flamot, sui kildil bal flumedas e sui vatafons.
11. Stel et pänemon Basänt, e kildil bal vatas ävedon basänt, e mens mödik ädeadons dub vat et, bi ibiedikon.
12. Silanan folid äposunon; e kildil bal sola, kildil bal muna e kildil bal stelas pädäflapons, dat kildil bal onas ödagikonös, e del mö kildil bal no ölitonös, e leigoso neit!
13. Tän äloegob ed älielob flitön in zänod sila kvili, kel ävokädon me vög laodik: «Vi! vi! vi! lü belödans taleda demü posunaton retik de silanans kil, kels nog oposunons»!

KAPIT: IX

1. Silanan lulid äposunon. Äloegob falön steli de sil lü tal, ed one kik fonäda gufura pägivon.
2. Ämaifükon fonädi gufura, e smok älöpikon se fonäd, äsä smok de furnod gretik. Sol e lutem pädagükons dub smok fonäda.
3. E se smok et carads äkömons sui taled, ed ones fäg pigevon, keli skorpions taleda labons.
4. Ones päbüdos ad no dämükön yebi, ni kebis, ni bimis, ab te menis ut, kels no älabons su floms oksik snili Goda.
5. Ones no nämäd pägevon ad deidön onis, ab sio ad tomön onis dü muls lul. E dol, keli kodons, sümon ad ut skorpiona, if stegülon meni.
6. Ün dels et mens osukons deadi, ab no otuvons oni; odesirons ad deadön, ab dead defugon de ons.
7. Carads älogotons äsä jevods krigio pevaföls, su kaps oksik älabons äsvo kronülis binü gold, logods onsik äsümons ad uts menas,
8. älabons heremi äsä uti vomas; tuts onsik äbinons äsä uts leonas,
9. älabons äsvo blötaharnadis ferik, e noid flitämas onsik äsümon ad vabs mödik ko jevods pebefimädöls, kels setevons krigio,
10. älabons göbis e stigämis äsä utis skorpionas; ed in göbs onsik fäg ädabinon ad dämükön menis dü muls lul.
11. Älabons as cif silanani gufura; nem onik in hebrey binon: <Abaddon>, ed in Helänapük: <Apollyon> (= distukan).
12. El vi! balid nu epasetikon; ekö! els vi! tel nog okömons.
13. Silanan mälid äposunon. Ed älilob vögi bal, kel äkömon se guls fol latara goldik fo God;
14. at äsagon silanane mälid labü posun: «Livükolöd silananis fol, kels pefimatanons lä flumed gretik: <Euphrates>»!
15. Tän silanans fol pälivükons, kels pikipons blümo jü düp, del, mul e yel, kü ödeidonsös kildili bal menas!
16. Num kavidanas, me kels milits äbinädons, äbinon: teldegmilna degmil. Älielob nunön numi.
17. So älogob visiono jevodis ed utanis, kels äseadoms su ons; äpoloms harnadis filaredik, hüasenakölik e sulfinakölikis; kaps jevodas äsümons ad kaps leonas, e se muds onsik fil, smok e sulfin äkömons.
18. Dub tomods kil at, fil, smok e sulfin, kels äkömons se muds onsik, kildil bal menas pädeidon.
19. Ibä nämäd jevodas äbinon in muds e göbs onsiks; ibä göbs onsik äsümons ad sneks labü kaps, e me ats äkodons dämi.
20. E mens retik; utans, kels no pideidons dub tomods et, no ädeflekons okis de vobots namas oksik; ab äbleibons kultön diabis e lugodis goldik, largentik, kuprinik, stonik e boadikis, kels kanons ni logön, ni lilön, ni golön;
21. i no äklemons sasenis oksik, ni magivadrinedis, ni nepuedi, ni tifi.

KAPIT: X

1. Äloegob donikön se sül silanani nämik votik, pivilupöl in lefog; sus kap onik reinabob äbinon, logod onik äsümon ad sol, e lögs onik ad kölüms fila;
2. in nam okik äkipon bukili pimaifüköl. Äpladon futi detik okik sui mel, e nedetiki sui län,
3. ed ävokädon me vög laodik, soäsä leon roron. E ven ävokädon, tonärs vel ävögons.
4. Ven tonärs vel äspikons, ävilob penetön päspikölosi; ab älielob sagön vögi se sül: «Snilolöd utosi, kelosi tonärs vel äsagons, ab no penetolöd osi»!
5. E silanan, keli äloegob stanön su mel e su län, ätovon nami detik okik lü sül,
6. ed äyulon nämätü om, kel lifom laidüpio, e kel ejafom süli ko val, kel binon in on, tali ko val, kel binon su on, e meli ko val, kel binon in on: «Tim no plu obinon;
7. ab ün dels, ün kels silanan velid ovögon, ven oposunon, müster Goda pufölon, keli enotükom hidünanes okik, profetanes».
8. E vög, keli ililob de sül, äspikon dönu lü ob ed äsagon: «Gö! sumolöd buki pemaifüköl, keli silanan, kel stanon su mel e su län, labon in nam».
9. Tän ägolob lü silanan ed äsagob one ad givön obe bukili. Äsagon obe: «Sumolöd oni, e fifidolöd oni! obinon biedik in bälid olik, ab svidik äsä miel in mud olik».
10. Äsumob kluo bukili se nam silanana, ed äfifidob oni, ed äbinon in mud obik so svidik äs miel; ab ven ififidob oni, ävedon biedik in bälid obik.
11. Tän äsagoy obe: «Mutol dönu profetön lü pöps e nets e püks e regs mödiks».

KAPIT: XI

1. Nu rid, kel äsümon ad staf, pägivon obe, ko vöds: «Löädolöd! e mafolöd temi Goda, latari, ed utanis, kels kultons us!
2. Ab pläolöd foyadi plödik tema; no mafolöd oni! ibä at pelovegivon paganes, kels obestepons zifi saludik dü muls foldegtel.
3. Ed ogevob temunanes tel oba pöti ad profetön, peklotölo in lügodaklotem, dü dels balmilteltummäldeg.
4. Atans binoms lears tel e litikipians tel, kels stanoms lo Söl taleda.
5. If ek vilon blinädön omes badi, tän fil kömon se muds omsik, e konsumon neflenis omsik. If ek vilon blinädön omes badi, tän muton padeidön.
6. Laboms nämädi ad färmükön sili, sodas no reinos dü dels, ün kels profetoms; i laboms nämädi ad ceinön vatis ad blud, ed ad tomön läni me tomods valasotik so suvo, äsä viloms.
7. E ven ufidunoms temuni oksik, tän lunim osükömon se gufur, okrigon ta oms, okonkeron omis, ed odeidon omis.
8. Funs omsik oseatons su piad zifa gretik, kel panemon nevoiko: <Sodoma> e Lägüptän, kö i Söl omas pekrodom.
9. E mens pöpas, tribütas, pükas e netas valasotikas oloegons seatön funis omsik dü dels kil e lafik, e no oletons, das pasepülons.
10. E belödans taleda ofredons tefü oms, ozelons, ed osedons odes legivotis, bi profetans tel et itomoms belödanis taleda.
11. Pos dels kil e lafik lifalanan de God äkömon ini oms, ed ästanoms su futs oksik; e dred gretik ädavedon pö utans, kels älogons osi.
12. Äliloms täno vögi laodik se sül, kel ävokädon lü oms: Löpikolsöd isio! id in lefog älöpikoms sülio, du neflens omsik älogons omis.
13. Ün düp ot taladrem vemik ädavedon, e degdil bal zifa ädofalon, e mens velmil pädeidons dub taladrem et, e votans ävedons vemo drediks, ed äjonülons stimi Gode süla.
14. So el vi! telid epasetikon. Ekö! el vi! kilid okömon sunädo».
15. Nu silanan velid äposunon, ed in sül vögs laodik ätonons, kels äsagons: «Regän vola evedon regän Söla obsik e Kristusa omik. Oreigom ai laidüpio».
16. E bäldikünans teldegfol, kels seadoms su trons lo God, äprostärnoms ed äleplekoms Godi,
17. äsagölo: «Danobs oli, o Söl: God ä Valanämädal! kel binol, e kel äbinol, das elasumol nämädi gretik olik ed eprimol regami.
18. Pöps äzunikons, ab zun olik äkömon e tim ad cödön deadanis, ed ad mesedön dünanis olik, profetanis, saludanis, ed utanis, kels dalestümons nemi olik, e smalikanis e gretikanis, ed ad päridükön utanis, kels epäridükons taledi».
19. Tän in sül tem Goda ämaifikon, e büdedastonabog in tem omik ävedon logädik; e leklärs, e vögs, e tonärs, e taladrem, e gräls mu gretiks ädavedons.

KAPIT: XII

1. Milagamal gretik pälogon len sil: vom pevilupöl me sol, dis futs ofik mun äbinon, su kap älabof kronüli stelas degtel.
2. Ägrodof ed äluvokädof, bi älabof doledis sekü motam.
3. E mal votik len sil pälogon. Ekö! drak filaredik gretik, kel älabom kapis vel e honis deg, e su kaps okik diadis vel;
4. göb omik ämotiron kildili bal stelas sila, ed äjedom onis sui taled. Drak ästanom fo vom, kel primikof ad motön, ad slugön cili, sosus pümoton.
5. Ämotof soni, kel öbälätom netis valik ko staf ferik; e cil ofik pädugom spido lü God e tron omik.
6. Vom äfugof lü däsärt, kö top piblümükon ofe fa God, ad kosidön us dü dels balmilteltummäldeg.
7. Tän in sül komip ädavedon; <Michael> e silanans omik äkomipoms ta drak, e drak i äkomipom ko silanans okik,
8. ab atans no äbinoms saidiko nämiks, e no älaboms plu topi in sül.
9. Drak gretik, snek vönik, kel panemom diab ä <Satanas>, bätodan volanefa lölik, päjedom sui taled, e silanans omik ko om.
10. Ed älilob vögi laodik in sül, kel äsagon: «Nu beat, e näm, e regän Goda obsik, e nämäd Kristusa omik ekömons; ibä kusadan svistas obsik, utan, kel äkusadom onis dü del e neit lo God obsik, pedojedom.
11. Ons ekonkerons omi dub blud Jipüla e vöd temunodas oksik; eklemons löfi pro lif oksik deadamio.
12. Fredolsöd kluo! o süls ed ols, kels stebols in ons! Vi! lü tal e lü mel! ibä diab edonikom lü ols in vut gretik, bi sevom, das labom timi te brefiki».
13. Ven drak älogom, das pidojedom sui taled, äpöjutom vomi, kel imotof soni.
14. E vome flitäms tel kvila gretik pägivons, ad flitön lü top in däsärt, kö ökosidof dü yel bal sa yels tel sa yel lafik plödü mögov sneka.
15. E snek äjedom se mud okik, sökölo po vom, vati äsä flumedi, ad koedön ketränön ofi dub flumed.
16. Ab tal äyufon vomi, ämaifükon oki, ed änüslugon flumedi, keli drak ijedom se mud okik.
17. E drak äzunikom ta vom, ed ädegolom ad krigön ta votans dafamüla ofik, sevabo ta utans, kels fölons büdedis Goda, e kipedons temunodi tefü Yesus.
18. Ästanob su sabajol mela.

KAPIT: XIII

1. Ed äloegob süikön se mel lunimi labü hons deg e kaps vel; su hons onik diads deg äbinons e su kaps onik nems blasfämik.
2. Lunim, keli älogob, äsümon ad pantär, lögs onik äsümons ad uts bera, e mud onik ad mud leona. Drak ägevom one nämi okik, troni okik e nämädi gretik.
3. Ed älogob, das bal kapas onik pivunon deidoviko, e vun deidovik onik päsaunükon. E volanef lölik ästunikon ed äsökon lunimi,
4. ed äleplekon draki, bi igivom lunime nämi, ed äleplekon i lunimi, sagölo: «Kin sümon-li ad lunim, e kin kanon-li komipön ta on»?
5. E lunime mud pägivon ad pleidülön ed ad blasfämön, e nämäd pägevon one ad dunön atosi dü muls foldegtel.
6. Tän ämaifükon mudi okik ad blasfämön ta God, dubä äslänon nemi oma, steböpi oma, ed utanis, kels stebons in sül.
7. I pädälos one ad krigön ta saludans, ed ad konkerön onis. One nämäd pägevon löpü tribüts, pöps, püks e nets valiks.
8. E lödans valik taleda oleplekons oni, sotefä nems onas no pepenetons ini buk lifa Jipüla, kel pesakrifom bü fün vola.
9. Utan, kel labon lilis, lilonöd!
10. If ek dugom fanäbis lü fanäböp, tän i om pofanäböpom; if ek deidom me gläv, tän i om mutom padeidön me gläv. Pö atos sufäl e lekred saludanes sevädikons.
11. Äloegob sükömön lunimi votik, nu se län; älabon honis tel, kels äsümons ad uts jipüla, ed äspikon, äsä drak.
12. Äduinon nämädi valik lunima balid lo on. Äkodon, das taled lölik ed utans, kels äbelödons oni, äleplekons lunimi balid, kela vun deidovik pisaunükon.
13. Äduinon milagis gretik, bi äkoedon donikön lo mens i fili se sil sui taled.
14. Äbätodon belödanis taleda dub milags, kelis äduinon lo lunim sekü fäg one pigevöl; äslüdon belödanis taleda ad mekön magoti pro lunim, kel ilabon vuni gläva ed ibleibon lifön.
15. One i fäg pigevon ad lanön magoti lunima, sodas magot lunima äprimon ad spikön, ed äkodon, das alutan, kel no äleplekon magoti lunima, pödeidon.
16. I äkodon, das valanes: e smalikanes e gretikanes, e liegikanes e pöfikanes, e lelivanes e slafanes, mäk pägivon su nam detik u su flom onas,
17. dat nek ökanonöv remön u selön, pläsif älabon mäki et, u nemi lunima, u numi nema onik.
18. Is sap zesüdon. Utan, kel labon täläkti, kalkulonöd numi lunima! ibä binon num mena, e num onik binon: mältummäldegmäl.

KAPIT: XIV

1. Älülogob, ed ekö! su bel: <Sion> Jipül ästanom, e lä om mens baltumfoldegfolmil, su floms kelas nem oma ed ut Fata omik pipenons.
2. Ed älilob se sül vögi, kel äsümon ad lenoid vatas mödik e tonära vemik; e vög, keli älilob äsümon ad ton hapas, kels päbepläyons fa hapans.
3. Äkanitons kaniti nulik lo tron, lo nims fol e lo bäldikünans. E nek äkanon lärnön kaniti, pläs mens baltumfoldegfolmil, kels pilivioremons de taled.
4. Atans binoms utans, kels no ekosädoms ko voms, ibä binoms virgiks. Binoms utans, kels sökoms Jipüli utöpo, kö golom. Peremoms se mens, binoms balidfluks pevälöl pro God e pro Jipül,
5. e se muds omsik lug no kömon; binoms neblamabiks.
6. Äloegob flitön silanani votik löpo in lutem; älabon gospuli laidüpik, keli äblinon valanes su taled, lü pöps, tribüts, püks, nets valiks.
7. Äspikon me vög laodik: «Dredolsöd demü God, stimolsöd omi! ibä düp cödetama omik ekömon. Leplekolsöd Jafali süla, e tala, e mela, e vatafonas»!
8. Silanan votik, silanan telid, äsökon oni ed äsagon: «Edofalof, edofalof jiel <Babylon> gretik, kel ebrietükof pöpis valik me vin dranäla nepuedik okik».
9. E silanan votik, silanan kilid, äsökon onis, ed äsagon me vög laodik: «If ek leplekon lunimi e magoti onik, e lüsumon mäki sui flom u sui nam okik,
10. tän odrinon vini lezuna Goda, keli no pemigöli enügifom ini köp zuna okik, e podatomon dub fil e sulfin lo silanans saludik e Jipül.
11. E smok datoma onsik olöpikon laidüpio; utans, kels leplekons lunimi e magoti onik, ni dü del ni dü neit, olabons staudi anik, igo ifi ek te elüsumon mäki nema onik».
12. Is sufäl saludanas fruton; utanas, kels kipedons büdedis Goda e lekredi in Yesus.
13. Nu älilob vögi se sül, kel äsagon: «Penolöd! Beatiks deadans binons, kels deadons denu in Söl». «Si»! Lanan sagon, «takädonsös de töbs oksik e vobods onsik okegolons ko ons»!
14. Älülogob, ed ekö! us lefog vietik ädabinon, e su lefog ek äseadom, kel äsümom ad Son mena; älabom su kap okik kroni goldik ed in nam okik fodüli japik.
15. E se tem silanan votik äkömon, kel ävokädon me vög laodik lü om, kel äseadom su lefog: «Gebolöd fodüli olik, e klopolöd! ibä klopüp ekömon, klopot taleda binon madik».
16. Tän om, kel äseadom su lefog ägebom fodüli okik su taled, e taled pädefodon.
17. Dönu silanan äkömon se tem in sül; älabon i fodüli japik.
18. E silanan votik äkömon de latar, kel älabon nämädi tefü fil, ed ävokädon me vög laodik lü silanan, kel älabon fodüli japik: «Gebolöd fodüli japik olik, e klopolöd bälemis vitida su taled! ibä bäls onik binons madiks».
19. Tän silanan ägebon fodüli okik su taled, ed äklopon vitidabälis taleda, ed äjedon onis ini vitidabälipedöm lezuna Goda.
20. Vitidabälipedöm päfuton plödü zif; e blud äseflumon se bälipedöm, jüs ärivon fränis jevodas, love spad staidas balmilmältum.

KAPIT: XV

1. Älogob täno milagamali gretik stunüköl votik in sül, sevabo silananis vel ko tomods lätik vel, ibä me ats lezun Goda püfölon lölo.
2. Nu älogob bosi, kel äsümon ad mel glätik ko fil pimigöl; su mel glätik utans ästanons, kels äbinons vikodans in komip ta lunim, magot onik, e num nema onik, ed äkipons hapis Goda.
3. Äkanitons kaniti ela <Moyses>: hidünan Goda, e kaniti Jipüla, äsagölo: «Gretiks ä stunidabiks vobods olik binons, o Söl: God! o Valanämädal! Gidiks ä veratiks vegams olik binons, o God netas!
4. Kin no dredonöv-li? o Söl! Kin no glorükonöv-li nemi olik? Ibä te ol binol saludik, e nets valik okömons ed oprostärnons lo ol, bi cödets olik esevädikons».
5. Pos atos älogob, das saludöp tabära temuna in sül pämaifükon,
6. e das silanans vel, piklotöls in linum rafinik nidik, e keles blöts pizönons dub zönüls goldik, äsetridons se saludöp, ed älabons tomodis vel.
7. E bal nimas fol ägivon silananes vel skalis goldik vel, kels äfulons me lezun Goda, kel ai lifom laidüpio.
8. Saludöp päfulükon me smok demü glor e nämäd Goda, e nek äkanon nüstepön ini saludöp, büä tomods vel silananas vel üjenons.

KAPIT: XVI

1. Tän älilob se saludöp vögi laodik, kel äsagon silananes vel: «Gololsöd e vagükolsöd skalis vel ko lezun Goda sui taled»!
2. Balid nu ägolon ed ävagükon skali sui taled. E luuks badik ä venenöfiks äsüikons pö mens, kels älabons mäki lunima, e kels äleplekons magoti.
3. Silanan telid ävagükon skali okik sui mel, ed at ävedon blud äsä ut deadana, e dabinäds liföl valik in mel ädeadons.
4. Silanan kilid ävagükon skali okik sui flumeds e vatafons, ed ats ävedons blud.
5. Tän älielob sagön silanani vatas: «Gidik binol, kel binol ed äbinol, ol: Saludal pö lonam cödeta at.
6. Bi espilons bludi saludanas e profetanas; egivol ones bludi, ad padrinön. Bläfodi at emeritons»!
7. E de latar älilob vögi, kel äsagon: «Si! o Söl: God! o Valanämädal! cödets olik binons veratiks ä gidiks»!
8. Folid ävagükon skali okik sui sol, ed one pädälos ad sufükön menis hite fila.
9. E ven mens päsufükons hite vemik, äslänons nemi Goda, kel labom nämädi tefü tomods et, e no älecenons ad stimön omi.
10. Lulid ävagükon skali okik sui tron lunima, e regän onik pädagükon; e mens äbeitons linegis oksik sekü dol.
11. Äslänons Godi süla demü dols e luuks oksiks, e no älecenons de vobods oksik.
12. Mälid ävagükon skali okik sui flumed gretik: «Euphrates>, ed on äsägikon, sodas veg äblümon pro regs, kels äkömoms se lofüd.
13. Tän äloegob kömön se mud draka, se mud lunima e se mud luprofetana, lananis neklinik kil, äsä frogis.
14. Ats binons lanans diabas, kels duinons milagis, kels segolons lü regs vola lölik, ad kobükön onis pro komip tü del gretik Goda: Valanämädal.
15. (Ekö! kömob äsä tifan. Beatiks utans binons, kels galons, e kipedons klotis oksik, dat no zigolonsös nüdiko, e logoyös jemodi onsik!)
16. E päkobükons su top, kel panemon in hebrey: <Armagedon>.
17. Velid ävagükon skali okik ini lutem, e vög laodik äkömon se saludöp süla de flan trona, kel äsagon: «Ejenos».
18. Tän ädavedons leklärastrals, tons valasotik, tonäratonäts, e taladrem gretik; taladrem so vemik ä so gretik ädavedon, äsä nog neföro ijenon, sis mens binons su taled; so mu vemöfik taladrem äbinon.
19. Zif gretik päteilon ad dils kil; zifs paganas ädofalons. E God ämemom jieli <Babylon> gretik, ed ägivom ofe ad drinön se köp labü vin lezuna vemik okik.
20. Nisuls valik äfugons, e bels änepubons.
21. In grälastom vemik grälagrans so gretiks äsä talänts äfalons se sil sui mens; e mens äslänons Godi pö grälatomod, ibä tomod at äbinon plödakösömiko vemöfik.

KAPIT: XVII

1. Tän bal silananas vel, kels äpolons skalis vel, äkömon lü ob, ed äsagon: «Gö! ojonob ole cödeti dö jinepuedan gretik, kel seadof len vats mödik,
2. ko kel regs taleda enepuedons, e dub vin nepueda, kela belödans taleda pebrietükons».
3. Tän ädugon obi tiko lü däsärt. Us älogob vomi, kel äseadof su lunim skarlataredik, fulik me nems blasfämik, labü kaps vel e hons deg.
4. Vom piklotof in klots purpurik e skarlatarediks, e pidekof me goldots, nobains jerabik e pärlats; älabof in nam okik köpi goldik, kel pifulükon me naudods e neklins nepueda ofik.
5. E su flom ofik pipenon nem müsterik: <Jiel <Babylon> gretik: mot jinepuedanas e naudodas taleda>.
6. Älogob, das vom et äbinof brietik de blud saludanas e de blud temunanas Yesusa. Ven älogob ofi, ästunob mu vemo.
7. Ab silanan äsagon obe: «Sekü kis stunol-li? Oplänob ole müsteri voma e lunima, kel polon ofi, e labon kapis vel e honis deg.
8. Lunim, keli älogol äbinon, e no binon; osükömon se gufur ed opäridikon. Belödans taleda, kelas nems no peregistarons in buk lifa de tim jafa vola, ostunons, ven logons lunimi, kel äbinon, no binon, ab obinon.
9. Is täläkt zesüdon ad suemön osi. Kaps vel binons bels vel, su kels vom seadof;
10. ons i binons regs vel. Lul omas efaloms, bal binom, e votik no nog ekömom; e ven kömom, omutom blibön dü brefüp.
11. Lunim, kel äbinon e no binon, it binon jölid, binon i bal vela; ed opäridikon.
12. I hons deg, kelis logol, binons regs; no nog dalabons regami, ab dü düp bal odagetons ko lunim nämädi as regs.
13. Atans baivögons, ed egevons lunime nämädi e nämäti oksikis.
14. Atans okrigons ta Jipül, e Jipül okonkerom onis, bi binom Söl sölas ä Reg regas, e ko om i vokäbs, väläbs e fiedikans okonkerons».
15. Äsagon i obe: «Vats, kelis elogol, len kels jinepuedan seadof, binons pöps, menamödots, nets e püks.
16. E hons deg, kelis elogol, e lunim, ohetons jinepuedani; oberavons ed onüdükons ofi; ofifidons midi ofa, ed ofefilükons ofi in fil.
17. Ibä God espiretom ladälis onsik, ad ledunön vili omik, ad binön baläliks, ed ad gevön regami onsik lunime, jüs vöds Goda pöfölons.
18. Vom, keli elogol, binof zif gretik, kel reigon regis taleda».

KAPIT: XVIII

1. Pos atos äloegob donikön se sül silanani votik, kel älabon nämädi gretik; e taled pälitükon dub glor onik.
2. Ävokädon me vög nämöfik: «Edofalof, jiel <Babylon> gretik edofalof. Evedon lödöp diabas, kipedöp milananas neklinik, kipedöp bödas neklinik e hetabikas valasotikas.
3. Bi nets valik edrinons vini zuna nepueda ofik, bi regs taleda enepuedoms ko of, e bi tedans taleda evedoms liegiks sekü lüxüöd bundanik ofik».
4. Tän älilob vögi votik se sül, kel äsagon: «Segololsöd se of, o pöp obik! dat no kompenolsös pö sinods ofik, e dat no kesufolsös tomodis ofik!
5. Ibä sinods ofik ekumons okis jü sül, e God primom ad memön negidis ofik.
6. Träitolsöd ofi, äsä eträitof votanis! Mibläfolsöd ofe teliko utosi, kelosi edunof! Gifolsöd ini köp ofik teliki uta, keli egivof ad padrinön votanes!
7. Ma mafäd ejuitof glori e lüxüödi, sufükolsöd ofi datome e lüge! Ibä ninälo sagof: Seadob is as jireg, no binob jiviudan, e no sevob lügodi.
8. Demü atos ün del bal tomods ofik okömons: dead, lügod, faem, e pofefilükof dub fil; ibä God, kel emicödetom ofi, binom Söl nämik.
9. Tän regs taleda, kels enepuedoms ko of, ed ejuitoms lüxüödi, odrenoms ed olügodoms demü of, ven oloegoms löpikön smoki fefilikama ofik.
10. Obleiboms stanön fagoto dredü datom ofik, ed osagoms: «Vi! vi! lü ol, o zif gretik! o zif: <Babylon> nämädik, ibä ünü düp bal micödet olik peledunon.
11. I tedans odrenoms ed olügodoms demü of, bi nek oremom plu lodotis omsik,
12. lodotis golda, largenta, nobainas, pärlatas, linumastofa feinik, purpura, sadina, skarlataredina, boada benosmelik valasotik, vioracanas, yegas boada jerabik, kuprina, fera e maboina,
13. kirfata, pitas, benosmelotas, mira, boväla, vina, leüla, vuitameila feinik, grena, bubas, jipas, jevodas, vabas, slafanas e menas.
14. Gaenods, kelis iledesirol, penegetons fa ol, dins nidik e magifiks päperons fa ol, e no plu pogetuvons».
15. Tedans canas at, kels evedoms liegiks me of, obleiboms stanön fagoto dredü datom ofa,
16. ed osagons: «Vi! vi! lü zif gretik et! kel pikloton me linumastof feinik, purpurik e skarlataredik, pidekon me goldots, nobains e pärlats; ibä ünü düp bal lieg valik at pedistukon».
17. Stirans e vejolnafans, melans e mens so mödiks votiks, kels laboms vobodis oksik su mel, ästanoms fagoto,
18. ed ävokädoms, ven älogoms smoki lefila ofik: «Zif kinik äsümon-li ad zif gretik at»?
19. Äjedüloms püfi ini kaps oksik, ed ävokädoms drenölo e yamölo: «Vi! vi! lü zif gretik! dub divs kela valans evedons liegiks, kels älabons nafis su mel; ibä ünü düp bal pedistukon.
20. Fredolsöd dö on! o sül! o saludans! o paostolans! o profetans! bi God eledunom tefü of micödeti olsik»!
21. Nu silanan nämik ätovon stoni äs mülaston so gretiki, ed äjedon oni ini mel, äsagölo: «Leigoso zif gretik: <Babylon> podojedon, e no plu potuvon dönu.
22. Pläyot hapanas, musigalas, flutanas e trompetanas no plu polilon in ol; plägan nonik lekana anik potuvon plu in ol; e noid müla no plu polilon in ol;
23. lit nonik litikipiana plu ostralon in ol; vög higama e jigama no plu polilon in ol; ibä tedans olik äbinoms gretikans taleda, bi dub magiv olik nets valik päbätodons,
24. ed in on blud patuvon de profetans, saludans e valans, kels pepugons su taled».

KAPIT: XIX

1. Pos atos älilob äsä toni laodik dabinädamödota gretik in sül, kel äsagon: «Haleluyö! beat e glor e näm dutons lü God obsik,
2. ibä cödets omik binons veratiks ä gidiks. Emicödetom ga jinepuedani gretik, kel erübükof taledi me nepued okik, ed evinditom ofe bludi dünanas okik».
3. E dönu äsagons: «Haleluyö! smok ofik löpikon laidüpio».
4. Tän bäldikünans teldegfol e nims fol äprostärnons ed äleplekons Godi, kel äseadom su tron, äsagölo: «So binosös! Haleluyö»!
5. E de tron äkömon vög, kel äsagon: «Ols valik! dünans omik, kels dredols demü om, e smalikans e gretikans! lelobolsöd Godi obsik»!
6. Tän älilob noidi äsä uti menamödota numik, äsä uti vatas mödik, äsä uti tonäratonätas nämöfik, kel äsagon: «Haleluyö! ibä Söl: God: Valanämädal evedom reg.
7. Fredobsöd e yubobsöd! stimobsöd omi; ibä mated Jipüla ekömon; jigam omik eblümükof oki;
8. ofe pedälos ad klotön oki me linumastof feinik klinik nidik»; ibä linumastof feinik at binon duns gidik saludanas.
9. Äsagon obe: «Penolöd: Beatiks utans binons, kels pevokons ad matedafided Jipüla». I äsagon obe: «Ats binons vöds veratik Goda».
10. Tän äprostärnob foi on ad leplekön oni. Ab äsagon obe: «Prüdö! No dunolöd atosi! Binob kedünan ola e svistas olik, kels labols temunodi tefü Yesus. Leplekolöd Godi»! Ibä temunod tefü Yesus binon binäl profetama».
11. Nu älogob, das sül äbinon maifik, ed ekö! jevod vietik ädabinon, ed utan, kel äseadom su on pänemom fiedikan ä veratikan; ocödom ed okomipom gido;
12. logs omik äbinons äs flam fila, e su kap okik äpolom diadis mödik. Älabom nemi pipenöl, keli nek äsevon, pläsif om it.
13. Piklotom in klot ini blud piblunöl. Pänemom Vöd Goda.
14. Milits sülik äsökons omi su jevods vietik, piklotons me linumastof feinik vietik klinik.
15. Se mud omik gläv japik äkömon, ad flapön me on netis. Obälätom onis ko staf ferik; ed om it ofutom vitidabälipedömi vina lezuna Goda: Valanämädal.
16. Su klot okik e su küid okik älabom nemi pipenöl: Reg regas ä Söl sölas.
17. Nu äloegob stanön in sol silanani, kel ävokädon me vög laodik lü böds valik, kels äflitons löpiko in lutem: «Kömolsöd isio! kobikolsöd lü fided gretik Goda,
18. ad fidön midi regas, lebüdanas militik, nämädanas, jevodas e bemonitanas onas, lelivanas e slafanas valikas, smalikanas e gretikanas».
19. Tän älogob lunimi e regis taleda e militis onas ikobikölas ad krigön ta om, kel äseadom su jevod e ta milit omik.
20. Ab lunim päfanom, e ko om luprofetan, kel iduinom lo on milagis, dub kels ibätodom utanis, kels ilüsumons mäki lunima, ed ileplekons magoti onik. Bofiks päjedons lifiko ini fiv sulfina filöl.
21. E votans pädeidons dub gläv, kel äkömon se mud oma, kel äseadom su jevod, e böds valik päsatükons me mid onsik.

KAPIT: XX

1. Nu äloegob donikön silanani se sül; älabon in nam okik kiki gufura e jäni gretik.
2. Ägleipon draki, sneki vönik, sevabo diabi, eli <satanas>; äjänädon omi pro yels mil,
3. ed äjedon omi ini gufur, keli äfärmükon ed äsnilon sus om; dat no plu öbätodom netis, jüs yels mil üpasetikons; pos tim at omutom palibükön dü brefüp.
4. Älogob tronis, ed utanes, kels äseadoms su ons, cöd päkomiton; ed älogob lananis utanas, kels pisäkapons demü temunod onsik tefü Yesus e demü vöd Goda, ed utanas, kels no ileplekons lunimi, ni magoti onik, e no ilüsumons sui flom e sui nam oksiks mäki; ed älifons ed äreigons ko Yesus dü yels mil.
5. Deadans retik no olelifikons, büä yels mil upasetikons. Atos binon lelifikam balid.
6. Beatiks ä saludiks utans binons, kels kompenons pö lelifikam balid; tefü ons dead telid no labon nämädi; ab obinons kultans de God e de Kristus, ed obinons ko om regs dü yels mil et.
7. Pos pasetikam yelas mil et diab postadükom libio se fanäböp okik;
8. osegolom ad bätodön netis in gulöps fol taleda, eli <Gog> ed eli <Magog>, ad kobükön onis krigio; num onas binon so gretik äsä sab mela.
9. Oseagolons love taled lölik, ed ozüons leseatöpi saludanas e zifi palöföl; ab täno fil donikon de God se sül, e konsumon onis.
10. Diab, kel ebätodom onis, päjedom ini fiv fila e sulfina, kö lunim e luprofetan binons, e potomons dü del e neit, ai e laidüpio.
11. Nu älogob troni vietik gretik, ed omi, kel äseadom su on, e lo kel tal e sül äfugons, sodas top onsik no plu pätuvon.
12. Äloegob stanön deadanis, smalikis e gretikis, lo tron, e buks pämaifükons. I buk votik pämaifükon, sevabo buk lifa, e deadans päcödetons bai utos, kelos pipenon ini buks, ma vobods onsik.
13. Mel ägivon deadanis, kels äbinons in on; e dead e disvol ägivons deadanis, kels äbinons in ons, e valikans päcödetons, alikans ma vobods oksik.
14. Tän dead e disvol päjedons ini fiv fila. Atos, sevabo fiv fila, binon dead telid.
15. If plakoy, das ek no peregistaron ini buk lifa, tän pajedon ini fiv fila.

KAPIT: XXI

1. Tän älogob süli nulik e tali nulik; ibä sül balid e tal balid imogolons, e mel no plu ädabinon.
2. Äloegob donikön de God se sül zifi saludik, eli <Hierosolyma> nulik, piblümüköl äsä jigam, kel pedekof pro himatan okik.
3. E de tron älilob vögi laodik, kel äsagon: «Ekö! tänad Goda binon lä mens; olödom zänodü ons, ed ons obinons pöp omik; God it obinom lä ons,
4. ed okluinom drenis valik de logs onsik. Dead no plu odabinon, ni lügod, ni drenam, ni töb. Ibä dins büik epasetikons».
5. Ed om, kel äseadom su tron äsagom: «Ekö! nululob vali». I äsagom: «Penetolöd! ibä ats binons vöds konfidovik ä veratiks».
6. Äsagom obe: «Ejenos. Binob el <alpha> ed el <omega>, prim e fin. Ogivob glato soafölane ad drinön se fon vata liföl.
7. Utan, kel ovikodon, ogeron vali at. Ed ob obinob pro on God, ed on pro ob son.
8. E tefü dredöfans, nenlekredans, midunans, sasenans, nepuedans, magivans, lugodikultans e lugans valik, fät onas obinon: fiv fila e sulfina. Atos binon dead telid».
9. Nu bal silananas vel, kels älabons skalis vel me tomods lätik pifulükölis, äkömon lü ob ed äsagon: «Gö! ojonob ole jigami, jimatani Jipüla».
10. Tän ädugon obi tiko sui bel gretik geilik, ed äjonon obe zifi saludik: <Hierosolyma> ädoniköli de God se sül,
11. pädeköli me glor Goda. Nid onik äsümon ad ut stoina mu jerabiküna: yaspid äs kristad dulitamovik.
12. Älabon möni gretik geilik, labü leyans degtel, e su leyans et silanans degtel äbinons; su leyans i nems pipenons, ats äbinons nems tribütas degtel cilas Yisraeläna.
13. In flan lofüdik leyans kil, in flan nolüdik leyans kil, in flan sulüdik leyans kil, ed in flan vesüdik leyans kil ädabinons.
14. E mön zifa älabon stababumädis degtel, e su ats äbinons nems degtel paostolanas degtel Jipüla.
15. Utan, kel äspikon ko ob, älabon mafamastafi goldik ad mafön zifi e leyanis e möni onikis.
16. Zif nu ätopon us as kvad; lunot e vidot ona äleigons. Ämafon zifi me mafamastaf, mafot äbinon: staids degtelmil. Lunot e vidot e geilot ona äbinons leigiks.
17. Ämafon i möni onik, mafot äbinon: louns baltumfoldegfol, ma mafäd mena, kelos binon i ma mafäd silanana.
18. Jaläd möna onik äbinon yaspid, e zif äbinon gold rafinik, kel äsümon ad kristad rafinik. Stababumäds möna zifa pidekons me stoins jerabik valasotik. Stababumäd balid äbinon de yaspid; telid de safiroin; kilid de galzed; folid de smaragoin;
19. lulid de sardonig; mälid de sard; velid de krüsolit; jölid de beriloin; zülid de topad; degid de krüsoprad; degbalid de hüasoin; degtelid de maetüt.
20. Leyans degtel äbinons pärlats degtel; leyan alik äbinädon me pärlat bal, e piad zifa äbinon gold rafinik äsä glät dulogamovik.
21. In on no älogob temi; ibä Söl: God, Valanämädal, binom tem onik, ed i Jipül.
22. Zif no neodon, das sol u mun litükon oni, ibä glor Goda litükon oni, e Jipül binom litikipian onik.
23. E nets ozigolons in lit ona; e regs taleda oblinons glori e stimi oksikis lü on.
24. Leyans onik no pofärmükons dü del, (ibä neit no obinon us);
25. ed oblinoy glori e stimi netas lü on.
26. Alutos, kelos binon nesaludik; alutan, kel midunon u kel lugon, no okömon ini on; ab te utans, kels peregistarons ini buk lifa Jipüla.

KAPIT: XXII

1. Äjonon i obe flumedi vata liföl, lämpik äs kristad, kel äsüikon se tron Goda e Jipüla.
2. In zänod piada, e su jols bofik flumeda, bim lifa äbinon, kel prodon degtelna flukis: ün mul alik prodi oka; e bleds bima dünons ad saunükön pöpis.
3. Bos pemaleditöl no plu odabinon. In zif et tron Goda e Jipüla obinon, e dünans omik odünons omi,
4. ed ologons logodi omik; e nem oma obinon su flom onas.
5. Neit no plu odabinon us; no oneodons liti litikipiana ni sola; ibä Söl: God ostralom love ons; ed oreigons ai laidüpio.
6. Äsagon obe: «Ats binons vöds konfidovik ä veratiks; Söl: God lananas profetanas elesedom silanani omik ad jonön dünanes okik utosi, kelos muton jenön suno.
7. Ed ekö! okömob suno». Beatiks utans binons, kels kipedons vödis profetama buka at.
8. Ob: <Ioannes> binob utan, kel älilob ed älogob atosi. E ven ililob ed ilogob atosi, äprostärnob foi futs silanana, kel äjonon obe atosi.
9. Ab äsagon obe: «Prüdö! No dunolöd atosi! Binob kedünan ola, svistas olik, profetanas ed utanas, kels kipedons vödis buka at. Leplekolöd Godi»!
10. Tän äsagon obe: «No snilolöd vödis profetama buka at! Ibä tim binon nilik.
11. Utan, kel binon negidik, blebonöd fovo negidik! Utan, kel binon sinik, blebonöd fovo sinik! Utan, kel binon gidik, fovonöd ad dunön vobodis gidik! Utan, kel binon saludik, fovonöd ad saludön!
12. Ekö! okömob suno. Mesedi, keli ogivob, labob lä ob – ad bläfön alane, ma vobod onik.
13. Binob el <alpha> ed el <omega>, balid e lätik, prim e fin».
14. Beatiks utans binons, kels lavons klotis oksik, dat labonsös gitäti ad gebädön bimi lifa, ed ad nügolön ini zif da leyans!
15. Plödo obinons dogs, magivans, nepuedans, sasenans, lugodikultans, ed alutan, kel löfon e spikon lugi.
16. «Ob: Yesus elesedob silanani obik ad temunön oles dinis at tefü komots. Ob binob vul e sprotan de <David>, binob gödastel nidik».
17. Lanal e jigam sagons: «<Kömolöd!> Utan, kel lilon osi, sagonöd: <Kömolöd>! Utan, kel soafon, kömonöd! ed alutan, kel desiron atosi, sumonöd glato de vat lifa»!
18. Sagob valanes, kels lilons vödis profetama buka at: If ek läükon bosi lü atos, tän God osufükon one tomodis, kels pebepenons in buk at;
19. ed if ek desumon bosi de vöds profetama buka at, tän God odesumom one dilodi onik bima lifa e zifa saludik.
20. Om, kel temunom atosi, sagom: «Si! kömob suno». So binosöd! Kömolöd, o Söl: Yesus!
21. Benäd Söla: Yesus Kristus binonöd lü ols valik!

---------- oOo ----------

Ninädalised