Palsa dai iagri
Palsa dai iagri.
Ne n' oste palsé tö sot cösc gran lën?
Al é pa n post ch' an se stá pa dër bën.
Te cunti val' stories, mo empü' por monü,
ci ne i él a n te iagher döt cant sozedü.
- Mineste mo tö ch' i la lasci empü massa taié?
Na na, i m' an feji ma morvëia. –
N iade palsâi iu sön munt tal bun cialt
y sora ca jorel n variö dër alalt;
al jora deficio rodunt jö da me,
s' apëia mio cian y s' al porta con se.
Iu salti atira con man en tal slop,
mosöri avisa y tiri do n bot.
Morvëia grandiosa, le variö toma a tera
deperpo che le cian spo s' an jora en malora.
Mia vedla m' á n iade motü te rucsoch
na pücia y n ziger y smalz n bel toch
y ëra dijea: "No tan te scrödié,
cösta é la marëna por te da misdé."
Canch' i marnâ spo sönsom a munt,
jorel n corf ca da me bel rodunt,
m' aroba la pücia, mo le smalz lascel sté,
porcí che le smalz ea zentrifughé.
N iade êi sté a ciamurc sön chi crëps,
les bales roades, n bel bëch vën alerch.
ci poi iu fá sën, o tan dal malan!
Iu ciarii le slop con struzn d' Al Plan.
Al vën dampró spo y stá dër bël chit
a zirca cion' vari y ciara ca fit.
Tla bocia ti tochi cösc strozun de pan,
atira él sté mort le ciamurc spo da fan.