ಕಲ್ಪುನಕಲೆಗ್ ಅರ್ಥನೇ ಆವಂದಿನವು, ನಂತ್ರದ ಚೋಸರ್(Chaucer) ಕಾಲದ ಇಂಗ್ಲೀಷ್ ( ಕ್ರಿ ಶ ೧೪-೧೫ ಶತಮಾನೊಡು) ಈ ಭಾಷೆದ ಆಯನ ಕಾವ್ಯಲೆನ್ ಓದದ್ ಅರ್ಥ ಗ್ರಹಿಪರೆಗ್, ಪ್ರತ್ಯೇಕ ಕೋಶದ ಅಗತ್ಯವುಂಡು. ನಂತರದ ಕಾಲೊಡು ಬಡ್ಡಿ, ಸ್ಪೆನ್ಸರ್, ಶೇಕ್ಸ್‌ಪಿಯರ್, ಕವಿಲೆನ ಕಾಲೊಡು ಇಂಗ್ಲೀಷ್ ಕಾವ್ಯ ಸಮೃದ್ಧಿಯಾಂಡಲಾ, ಶೇಕ್ಸ್‌ಪಿಯರನ ಇಂಗ್ಲೀಷ್ ಪದನ ಅರ್ಥ ತೆರಿಪಾವರೆ ಟಿಪ್ಪಣಿದ ಅಗತ್ಯಲಾ ಬೋಡಾಂಡ್. ಆಧುನಿಕ ಇಂಗ್ಲೀಷ್ ಭಾಷೆ ಅಮೇರಿಕಾದ ಸಂಯುಕ್ತ ಸಂಸ್ಥಾನಲೆಡ್, ಮಾರ್ಕ್ ಟೈನನ "ಹಕಲ್ಬರಿ ಫಿನ್"ಡ್, ಅಯಿತವೇ ಸ್ವರೂಪ ಪಡೆತ್ತ್ಂಡ್.
ಉಚ್ಚಾರ, ಧಾಟಿ, ಶಬ್ದ ಸಂಕಲನೆ ಬೇತೆ ಬೇತೆ ಸ್ವರೂಪ ಪಡೆತ್ತ್‌ದ್, ಮೂಲ
ವ್ಯಾಕರಣ ಮಾತ್ರ ದಿಂಜ ಪಗರಂದೆ ಇತ್ತದ್‌, ಈ ರಚನೆದ ಭಾಷೆ ಚರಿತ್ರೆದ ಕಾಲವಾದ್ ಸುಮಾರಾದ್ ಕಾಲನಿರ್ಣಯ ಮಳ್ಪೆರೆ ಸಾಧ್ಯವಾಂಡಲಾ, ಸರಿಯಾದ ಭಾಷೆ ಎವ್ವು ಇಸ್ವಿಡ್ ಆರಂಭವಾಂಡ್‌ ಇಂದ್ದ್ ತೆರಿಯೆರೆ ಆವಂದ್.
ಅಂಚನೇ ಕನ್ನಡ ಭಾಷೆದ ಪರಿಚಯದ ನಂಕ್ ತೆರಿದುಂಡು. ಕವಿರಾಜಮಾರ್ಗನೇ ಪ್ರಬುದ್ಧ ಭಾಷೆ, ಲಕ್ಷಣಗ್ರಂಥವಾದಿಪ್ಪುನಗ ಬೇತೆ ಸಾಹಿತ್ಯೊಲು ರಚಿತವಾದುಪ್ಪೊಡು ಇನ್ಪಿನವಾಂಡಲಾ ಸಾಹಿತ್ಯೊಲು ತಿಕ್ಕಂದೆ, ಕನ್ನಡ ನುಡಿತ ಉಗಮ ಏಪಗ ಇಂದ್ದ್ ಪಣೇರೆ ಕಷ್ಟವಾದುಂಡು. ಪ್ರಖ್ಯಾತ ಜೈನಕವಿಲು ಪಂಪ ರನ್ನೆರೆನ ಕಾಲೊಡು "ಹಳೆಗನ್ನಡ” ಇನ್ಪಿ ಪುದರ್ ಪಡೆತ್ತ್‌ದ್, ಸುಮಾರಾದ್ ಕ್ರಿ.ಶ. ೧೫ನೇ ಶತಮಾನೊಡು ನಡುಗನ್ನಡ-ಪುಸಗನ್ನಡ ಇನ್ಪಿ ಪುದರ್ ಪಡೆತ್ತ್ಂಡಲಾ, ಆತ ಪರತ್‌ ಏಪ, ಪೊಸತ್ ಏಪ ಇನ್ಪಿ ಕಾಲನಿರ್ಧಾರದ ಮಿತ್ತ್ ಇತ್ತೆಲಾ ಚರ್ಚೆ ಉಂಡು. ಅಂಚನೇ ಪರತ್‌ ಇನ್ಪಿ ಪದ ಮುಗಿದ್ ಪೋತಿನ ಜಬ್ಬಾತಿನ ಭಾಷೆಲಾ ಅತ್ತ್. ಅಯಿತ ಕಾಲಕಾಲದ ಮಾರ್ಪಾಟ್ ಏಪಏಪ ಆಂಡ್, ಏತ್ಮಟ್ಟದ ಬದಲಾವಣೆ ಆಂಡ್ ಇನ್ಪಿನವೇ ಮಲ್ಲ ಶೋಧನೆದ ವಿಷಯವಾವು. ಆಂಡಲಾ ಈತನೇ ಇಸ್ವಿಡ್ ಮಾರ್ಪಾಟ ವಾಂಡ್‌ ಇನ್ಪಿ ವಿಷಯ ಚರ್ಚಾಸ್ಪದವಾದೇ ಒರಿಯು.
ಸಾಹಿತ್ಯದಾಂತಿನ ತುಳುವದ ಆರಂಭದ ಕಾಲನಿರ್ಣಯ ನನಲಾ ದಿಂಜ ಕಷ್ಟದವು. ದೇಶಿ ಶಬ್ದಲೆನ್ ಉಚ್ಚಾರದ ಮಿತ್ತೆ ಈ ರಡ್ಡ್ ಭಾಷೆಲು ಸುಮಾರಾದ್ ಕ್ರಿ.ಪೂ. ಮೂಜನೇ ಶತಮಾನೊಡ್ದ್ ಇಂಚಿ ಉತ್ಪತ್ತಿ ಆದುಪ್ಪೆರೆ ಸಾಧ್ಯ ಇಂದ್ದ್ ಸ್ಥೂಲರೂಪೊಡು ಪಣೊಲಿ. ಕನ್ನಡೊಗು ಬ್ರಾಹ್ಮಲಿಪಿತ ಬರವಣಿಗೆದ ಸೌಕರ್ಯ ಸುಮಾರಾದ್ ಕ್ರಿಶ್ಚಿಯನ್ ಯುಗಾರಂಭೋಡು ತಿಕ್ಕ್‌ದ್, ಕ್ರಿ ಶ ೪೫೦ ಡ್ ಕನ್ನಡ ಶಿಲಾಲೇಖನದ ಭಾಷೆ ಆಯಿನವು ತೋಚಿದ್ ಬರ್ಪುಂಡು.
ತುಳು ಪಾತೆರೊ
