ಸಾಹಿತ್ಯವಾದ್ ಪೂರ್ಣಸ್ವರೂಪ ಪಡೆದ್ ಇತ್ತಿನ ಕಾಲೊಡು ಅಶೋಕ ಚಕ್ರವರ್ತಿ ಶಿಲಾಲೇಖಲೆನ್ ಪ್ರಾಕೃತ ಭಾಷೆಡ್, ಬ್ರಾಹ್ಮಿ, ಖರೋಷ್ಟಿ ಲಿಪಿಟ್ ಬರೆಪೆರ್ ಕಾರಣ ಜನಮಾನಿ ಆ ಶಿಲಾಲೇಖಲೆನ ವಿಷಯ ಸರಿಯಾದ್ ತೆರಿಯೊಡು ಇನ್ಪಿ ಅಪೇಕ್ಷೆಡ್ದಾವೆರ.
1.72 ಪಾಲಿ ಭಾಷೆ ಪ್ರಾಕೃತದ ಉಪಭಾಷೆದ ಲೆಕ್ಕೊ ಭಾರತದ ಪೂರ್ವಭಾಗೊಡು ಬಲತ್ತೊಂದು ಬತ್ತಿನ ಭಾಷೆ. ಪಾಲಿ ಇನ್ಪಿನಯಿಕ್ ಸರಿಯಾದ ಅರ್ಥನಿರುಕ್ತಿ ತೀರ್ಮಾನವಾತಿಜಿ. ಕೆಲೆವೆರ್ ಈ ಶಬ್ದದ ಮೂಲ ಪಾಟಲಿ, ಪಲ್ಲಿ, ಪ್ರಾಕೃತ, ಪ್ರಾಲೇಯ ಇಂದ್‌ದ್ ಪಣೊಂದು ಬತ್ತೆರ್. (ಆನಿದ ಮಗಧ ದೇಶದ ರಾಜಧಾನಿ ಪಾಟಲಿ ಪುತ್ರದ "ಪಾಟಲಿ" ಇನ್ಪಿನವು ನಸುಗೆಂಪು ಪೂಬುಡ್ಪಿನ ಒಂಜಿ ಜಾತಿದ ಮರ -ಇಂದ್ ಒಂಜಿ ಶಬ್ಧಕೋಶೊಡು ಪಣ್ತೆರ್.) ಬುದ್ಧಮತತ ಆಗಮಲು ಈ ಪಾಲಿ ಭಾಷೆಡ್ ಮೂಡ್ದ್ ಬತ್ತಾ. ಮೂಲೊಡು ಇಂದೊಂಜಿ, ಪ್ರಾಕೃತದ ತೀರಾ ಕೈತಲ್‌ದ ಭಾಷೆ ಆದಿತ್ತದ್, ಕ್ರಮೇಣ ಗ್ರಾಂಥಿಕ ಭಾಷೆ ಆದ್ ಬತ್ತ್ಂಡ್, ಬುದ್ಧಧರ್ಮದ ಜತೆಟ್ ಈ ಭಾಷೆ ಭಾರತೊನ್ ಬುಡ್ದ್ ಸಿಂಹಳೊಗು ಪೋದ್, ಸಿಂಹಳ ಭಾಷೆ ಆದ್ ಪೋಂಡು. ಅಯಿತ ಸಂಪರ್ಕ ಸಂಬಂಧ ಆರ್ವಾಚಿನ ಉತ್ತರದ ಭಾಷೆಲೆಗ್ ತಿಕ್ಕಂದೆ ಪೋಂಡು. ಈ ಭಾಷೆದ ಗ್ರಂಥಲು ಸಿಂಹಳ, ಬರ್ಮಾ, ಸಯಾಂ ದೇಶೊಲೆಡ್ ಮಾತ್ರ ಒರಿದ್ ಪಾಲಿದ ವ್ಯಾಕರಣ ರಚನೆನ್ ಆ ಗ್ರಂಥಲೆನ ಆಧಾರದ ಮಿತ್ತ್ ತೆರಿಯೊಡಾಪುಂಡು. ಈ ಭಾಷೆಡ್ ಸಂಸ್ಕೃತದ ಐ, ಔ ಸ್ವರಾಕ್ಷರಲು ಬೊಕ ಶ, ಷ ವ್ಯಂಜನಾಕ್ಷರಲೆನ್ ಬುಡ್ದ್ ಬಾಕಿ ಮಾತಾ ವರ್ಣಾಕ್ಷರಲು ಇತ್ತ ಇನ್ಪಿ ವಿಚಾರ ತೆರಿದ್ ಬರ್ಪುಂಡು. ಈ ಭಾಷೆ ಗ್ರಂಥಸ್ತವಾವನಗ ಸಂಸ್ಕೃತದ ಪ್ರಭಾವ ಇಂದೆಕ್ ಒದಗ್‌ದ್ ಬೈದ್ಂಡ್. ಸಂಸ್ಕೃತೊಡು ಚಂದ್ರಃ, ಚಂದ್ರಾ ಪಾಲಿಡ್ ಚಂದೊ ಆಂಡಾ ಸಂಸ್ಕೃತದ ರೇಫ ಪಾಲಿಡ್ ಮಾಜಿದ್ ಪೋತುಂಡು, ಉದಾ:
ದೀಘೋ ಜಾಗರತೂ ರತ್ತಿ ದೀಘಂ ಸಂತಸ್ಸಯೋಜನಂ ।
ದೀಘೊ ಬಾಲಾನಂ ಸಂಸಾರೋ ಸದ್ಧಮಂ ಆವಿಜಾನತಂ ॥
[ಅರ್ಥ: ನಿದ್ರೆ ಬರಂದಿನಾಯಗ್ ಇರ್ಲ್ ದೀರ್ಘ, ನಡಪುನಾಯಗ್ -ಯೋಜನ- ಸಾದಿ ಉದ್ದ, ಸದ್ಧರ್ಮ ತೆರಿಯಂದಿನಾಯಗ್ ಬಾಲೆಲೆಗ್, ಅಜ್ಞಾನಿಲೆಗ್ ಸಂಸಾರನೇ ದೀರ್ಘ].
ರೇಫ ಉಚ್ಚಾರ ಇತ್ತ್ಂಡ ಸಂಸ್ಕೃತದ ರೀತಿಡೇ ಉಂಡು ಪಾಲಿ ಭಾಷೆ. ಈ ಭಾಷೆ ಮುಖ್ಯವಾದ್ ಭಾರತದ ಮೂಡಾಯಿ ಭಾಗೊಡು ಇತ್ತ್‌‍ದ್ ಅಯಿತ ಸಂಪರ್ಕ ತುಳುವದ ಮಿತ್ತ್ ಇತ್ತಂಡ್ ಇನೆರೆ ಕಷ್ಟಸಾಧ್ಯ. ಆಂಡ ಮಧ್ಯಭಾಗದ ಪ್ರಾಕೃತ ಭಾಷೆ ಅಯಿತ ಅಂಗೊಲಾದಿತ್ತಿನ ಮಹಾರಾಷ್ಟ್ರ (>ಮರಾಟಿ), ಶೌರಸೇನಿ (ಆನಿದ ಮಥುರದ ಭಾಷೆ) ಅಪಭ್ರಂಶ ಇತ್ಯಾದಿಲು
55
