'ತುಳು ವ್ಯಾಕರಣ' ಪನ್ಪಿ ರಡ್ಡನೆ ಭಾಗೊಡು ಅಕ್ಷರ, ಸಂಧಿ, ಶಬ್ದ, ನಾಮ, ವಿಶೇಷಣ, ಧಾತು, ಕ್ರಿಯಾವಿಶೇಷಣ, ಕೃದಂತ-ತದ್ಧಿತಾಂತ, ಅವ್ಯಯ,ಸಮಾಸ,ತತ್ಸಮ-ತದ್ಭವ,ವಾಕ್ಯ ಪ್ರಕರಣ ಪನ್ಪಿನ ಸಂಗತಿಲೆನ್ ಬೇತೆ ಬೇತೆ ಉದಾರ್ನೆಳೆನ್ ಕೊರ್‌ದ್ ತುಳಿತ್ತ್ ದೆರ್. ಪಣಿಯಾಡಿಯೆರೆನ ವ್ಯಾಕರಣೊದ ಕಾಲೊಡ್ದ್ ಬುಕ್ಕೊದ, ಭಾಷಾವಿಜ್ಞಾನೊದ ತಿಳುವಳಿಕೆದ ಪಾಕೊ ಸಂಗತಿಳೆನ್ ಸೇರ್ಸಾದ್ ತುಳು ವ್ಯಾಕರಣದ ಬೇತೆ ಬೇತೆ ಮರ್ಗಿಲ್‌ಳೆನ್‌ ತೋಜ್‌ಪಾದ್‌ ಕೊರ್ತೆರ್.
ಶ್ರೀ ಬುಧಾನಂದರೆನ ಬೂಕುದ ಈ ಭಾಗೊಡು ತುಳು ಪಾತೆರೊದ ಮಾತಾ ಬಗೆಕ್ಕುಳು, ವ್ಯಾಕರಣೊದ ಬೇತೆ ಬೇತೆ ಸೂತ್ರೊಲು ಭಾಷಾವಿಜ್ಞಾನೊದ ತತ್ವೊಲು ಬೊಕ್ಕ ಅಯಿನ್ ಮಾತಾ ಒಟ್ಟು ಸೇರ್ಸಾದ್ ತುಳುತ್ತ ಉಳಮರ್ಗಿಲ್‌ನ್ ತೂಪುನ ಅರ್ಥಮಲ್ತೊನುನ ಶಕ್ತಿ ಓರ್ಮೆಲಾ ತೋಜುಂಡು.
ತನ್ಕುಳೆ ಬೂಕುದ ಪರಿಶಿಷ್ಟೂ ಭಾಗೊಡು ಆರ್ ರಾಶಿ ಪಾಡ್ತ್ ನ ಪರನುಡಿಲು, ಗಾದೆಲು, ಪಾಡ್ದನೊಲು ತುಳುತ್ತ ಮಲ್ಲ ತುಪ್ಪೆ. "ಕೊಂಕಣಿ ಭಾಷೆದ ಸಹಚರ್ಯೆ"
ಪನ್ಪಿನವು ತುಳು-ಕೊಂಕಣಿ ಭಾಷೆಲೆನ ಸಮ್ಮಂದೊದ ಪೊಸ ದೇಕಿನ್ ಪನ್ಪುಂಡು. ಅನುಬಂದೊಲೆಡ್ ಶ್ರೀ ಬುಧಾನಂದೆರ್ ಕೊ‌ರ್ನ ಸಂಗತಿಲ್ ದಿಂಜ ಸಂಶೋಧನೆದ ವಿಷಯೊಳು. ದ್ರಾವಿಡ ಭಾಷೆಲು, ತಮಿಳು ಸಂಸ್ಕೃತೊ ಭಾಷೆಲೊಟ್ಟಿಗೆ ತುಳುತ್ತ ಸಮ್ಮಂದೊ ಇಂಚ ಬೇತೆ ಬೇತೆ ಮರ್ಗಿಲ್‌ಲೆಡ್ದ್ ತುಳುನ್ ಅಭ್ಯಾಸ ಮಲ್ಪುನ ಬುಧಾನಂದರೆನ ಕ್ರಮೊ ಬಾರೀ ಪುಗರ್ತೆದವು. ಆರ್ ಒಟ್ಟುಮಲ್ತ್ ನ ತುಳು ಶಬ್ದೊಲೆನ ಕದಿಕೆ ಬಾರೀ ಮಲ್ಲವು. ಪೊರ್ಲುದವು. ತುಳು ಶಬ್ಬೊಲೆನ ಪೊದಿಕೆ ಕವಿಕೆಲೆನ್ ಆರ್ ಮೂಳು ರಾಶಿ ಪಾಡ್ದೆರ್,ತುಪ್ಪೆ ಕಟ್ಟ್ ದ್ ಕೊರ್ತೆರ್. ಶ್ರೀ ಬುಧಾನಂದೆರ್ ಈ ಇಡೀ ಬೂಕುಡು ಸಂಪಲ್ತಿನ ಸೊತ್ತುಳೆನ್ ದೀವೊಂದು ತುಳುಟ್ಟು ಬೋಡಾಯಿನಾತ್‌ ಬೆನ್ನಿ ಬೆನೊಲಿ.
ಇಂಚಿತ್ತಿನ ಮಾಮಲ್ಲ ಬೆನ್ನಿನ್ ಅಚ್ಚಿ ಮಲ್ಲುವ ಸಾಹಸೋ ಮಲ್ತಿನ ಡಾ.ಟಿ.ಎಂ.ರವೀಂದ್ರೆರ್ ಅಮ್ಮೆರೆನ ಸಾದಿಡೇ ಪೋವೊಂದಿಪ್ಪುನ ಸಂಶೋಧಕೆ. ಅಮ್ಮೆರ್ ತುಳುತ್ತ ಮಣ್ಣಡ್ ಬೆನ್ನಿ ಬೆಂದಿನಾರಂದ್ಂಡ್ ನ, ಮಗೆ ಡಾ.ರವೀಂದ್ರೆರ್ ನಮ್ಮ ಮಣ್ಣ್ ಕಲ್ಲ್ ಭೂಮಿಡ್ ಬೆನ್ನಿ ಬೆನ್ಪುನ ಸಂಶೋಧಕೆ, ಅರೆನ ಸಾಹಸೋ ಮಲ್ಲವು. ಶ್ರೀ ಬುಧಾನಂದೆರೆನ ತುಳುತ ಮಾಮಲ್ಲ ಬೆನ್ನಿಗ್ ತಲೆ ತಗ್ಗಾಬೆ. ಟಿ.ಎಂ.ರವೀಂದ್ರೆರೆನ ತುಳುತ್ತ ಮೋಕೆದ ಈ ಬೆನ್ನಿಗ್ ಸೊಲ್ಮೆ ಸಂದಾಬೆ. ತುಳು ಸಾಹಿತಿಲ್ ಸಂಶೋಧಕೆರ್ ಕೂಟೊದಕುಳು ಈ ಬೂಕುನು ಓದ್ ದ್ ತೂದ್, ತುಳಿತ್ತ್ ದ್ ತಂಕುಳೆನ ಅಱಪ್ರಾಯೊನ್‌ ತೆಲಿಪಾಯೆ‌ರ್ ನ ತುಳುತ್ತ ಬುಳೆಚ್ಚಿಲ್ಗ್ ಮಲ್ಲ ಸಾದಿ ತೋಜಿದ್‌ ಬರೂಂದ್ ಎನ್ನಿಬೆ.
0೯-0೫-೨೦೦೪ ______________________________________________________________
