ᏓᏅᏖ ᎾᏍᎩ ᏱᏝ ᎠᏆᏓᏅᏙᎩ. ᎳᏫᏅ, ᎦᏙ ᏓᎦᏛᏁᎵ? ᎤᏣᏘ Ꮙ ᏥᏍᎦᎾᎯᏳ. ᏥᏍᎦᎢᎭ ᏨᏍᎩᏃᎢᏕᎪ ᏱᏮᏥᎶᎢ ᎨᎵᎭ — ᏱᏚᏳᎪᏗᏉ ᎠᏗᎾ ᎾᎿ ᏱᏩᎩᎶᏒ. Ꮀ ᏝᏉ, ᎳᏫᏅ, ᎿᏉ ᎠᏎ ᎠᏆᎴᎾᎸᎯ.” “ᎥᏝ ᎨᎵ, ᏍᎩᎾᏝᎢ,” ᎤᏛᏁ ᎠᏧᏣ, “ᏥᏌ ᎦᎶᏁᏛ ᏰᎵᏉ ᏱᏣᏍᏕᎸ.” “ᎥᏝ, ᎳᏫᏅ, ᎥᏝ ᎤᏍᏗᎤᏅ ᏱᏥᎪᏩᏘ ᏳᏓᏴᎳᏔ ᎥᎩᏍᏕᎸᏗᏱ. ᏂᎦᎡᏉ ᏥᏍᎦᎾᎯᏳ ᎨᏎᎢ! ᎦᏙᏉ ᏛᏆᎵᏍᏓᏁᎵ” ᎤᎾᏫ ᏅᏯ ᎢᎬᏍᏓᏯ ᎤᏪᏓᏬᏤᎢ, ᎠᏧᏣᏃ ᎠᎦᏔᎲ ᎬᏂᎨᏒ ᏄᏩᏁᎴ ᏂᎦᎥ ᎤᏪᎵᎯᏍᏗ ᎤᏓᏅᏛᎢ — ᎾᏍᎩᏃ ᎠᏧᏣ ᏂᎦᎥ ᎢᎬᏩᏛᏁᏗ ᎨᏒ ᎠᏟᏂᎬᏁᎮ ᎠᎦᎵᏍᏓᏗᏍᎨᎢ, ᎠᏎᏃ ᎤᏄᎸᎲᏍᎨᏉ.
ᏌᏉ ᏄᎵᏍᏔᏁ ᏑᎾᎴ ᎤᏴᎵᎸᏉ ᎠᏧᏣ , ᎯᎠ ᏄᏪᏎ ᎤᏁᏤ ᏄᎬᏫᏳᏌᏕᎩ, “ᎳᏫᏅ, Ꮀ ᎦᏓᏅᏖᏍᎬᎩ ᎪᏪᎵ ᎤᏁᎳᏅᎯ ᎤᏤᎵᎦ.” ᏥᎦᏔᎭ ᎠᏗᎾ ᎥᏝ ᎠᏂ ᎢᎸᎯᏢ ᏱᎦᎾ --- ᏫᏣᏲᎦᎾᏗ ᎢᎬᏱᏗᏢ ᏥᏳᎯ ᎪᎱᏍᏗ ᎠᎾᏛᏁᎯ ᎦᏁᏌᎢ ᏚᏅᏴᎢ.” ᎠᏧᏣ ᏭᎾᏩᏛᎮ ᎪᏪᎵ , ᎠᏲᎢᏍᎩᏃ ᎠᏍᎦᏯ ᎤᎪᎲ ᏗᎦᏂᏒ ᏚᏠᏱᎴ ᏂᎦᎥ ᎠᎵᎮᎵᎬᎢ, ᎠᎴ ᎯᎠ ᏄᏪᏎᎴ ᎠᏧᏣ, “Ꭷ, ᎳᏫᏅ, ᏰᎵᏉ ᎾᏍᎩ, ᏰᎵᏉ ᎾᏍᎩ — ᏓᏍᎩᎪᎵᏰᎵᏉᏃ, ᎠᎴ ᏂᎪᎯᎸᎾᏉ ᏓᎦᏙᎴᎣᏏ ᎩᎶ ᎠᏴ ᏥᏂᏥᏍᎦᎿ ᎢᏯᏍᎦᎾ ᎦᏰᏥᏍᏕᎸᏗ ᎨᏒᎢ, ᎠᎴ ᎢᏳᏛᏁᏗᏱ ᎠᏥᏍᏕᎸᏗ ᏓᎦVᎴᎣᏏ. ᎿᏉ ᎠᏗᎾ ᎠᏉ ᎯᎲᎦ ᎦᏁᏌᎢ ᎠᏋᏴᎢ, ᎠᎴ ᏍᎩᎪᎵᏱᏏ ᎾᏍᎩ Ꮎ ᎦᎸᏉᏗ ᎪᏪᎵ.” “ᎭᏢᏃ ᏓᏥᎪᎵᏰᎢ ᏍᎩᎾᏝᎢ.” “ᎥᏝ ᏱᏥᎦᏔᎭ, ᎳᏫᏅ — ᎥᏝ ᎢᎸᎯ Ᏻ ᏯᎩᎪᎵᏰᎣ
