ᏓᏳᎶᏒ ᎯᎠ ᏄᏪᏒᎩ; ᎯᎠ ᏥᏄᏍᏗ ᏥᏗᎪᏩᏘᎭ ᎤᏟ ᏂᎦᎥ ᎠᎵᎮᎵᏍᏗ ᎨᏒᎢ ᎡᏍᎦᏉ ᎤᏲ ᎠᏓᏅᏓᏗᏍᏗ ᎨᏒᎢ. ᎡᏗᎨᏳᎢ ᎵᏏ ᎥᏝ ᏳᏜᏏᏛᎭ ᎾᏍᎩᏉ ᏄᏍᏛ ᎤᏙᎴᎰᏒᎢ. ᎤᏲ ᎬᏩᏓᏅᏓᏗᏍᏗ ᎨᏒ ᎿᏉ ᎤᎶᎯᏐᏁᎸᏉᏃ. ᎾᏍᎩᏉᎧ ᎨᎵ ᎾᏍᏉ ᏄᏍᏗ ᏂᎯ ᎭᏓᏅᏖᏍᎬᎢ, ᎠᏉᏎᎸᎩ.
ᎯᎠᏃ ᎾᎩᏪᏒᎩ. ᏂᎦᎥ ᎠᏆᏙᎴᎰᏒᎢ ᎠᎴ ᎠᎩᎪᎲᎢ ᎠᎴ ᎠᏆᏛᎦᏅᎢ ᎥᏝ ᎤᏍᏗᎩᏛᎤᏅ ᎬᏆᏜᏏᏛᎡᏗ ᏱᏂᎦᎵᏍᏗᎭ, ᎠᏰᎸᎢᏍᎩᏂᏃᏅ ᎠᏂᏉ ᎠᏓᏂᏯᏍᎦ, ᎠᏎᏃ ᎤᏓᏅᏙ ᎿᏉ ᎤᏍᏕᎵᏍᎩ ᏧᏬᎸ ᏫᏄᏛᏅ ᏦᏒᎢ. ᎠᏏᏰᏃ ᎠᏂᏉ ᏤᎲᎢ ᎤᎨᏳᎯᏳ ᎨᏒ ᎾᏍᎩ, ᎾᎿᏃ ᎿᏉ ᎠᎦᎵᎡᎵᏍᏗᎭ ᎣᏍᏛ ᎠᏓᏅᏓᏗᏍᏗ ᎨᏒᎢ ᎡᎲ ᎠᎦᏘᏂᏗᏢ ᎠᎵᏍᏆᏗᏍᎩ ᏂᎨᏒᎾ, ᎠᏆᏛᏅᎩ.
ᎤᏥᏃ ᎠᏠᏱᎲᎩ ᎠᎴ ᎿᏉ ᎯᎠ ᏄᏪᏒᎩ; ᎤᏁᎳᏅᎯ ᏩᎩᏙᎵᎩ , ᎤᏪᏙᎵᏍᏗ ᏩᏆᏓᏅᏓᏓ ᏥᎦᏴᎵᎨ Ꮀ ᎿᏉ ᏗᎩᎨᏓᏅᏥᏕᎾᏉ ᎤᏲ ᎠᏆᏓᏅᏛᎢ ᎠᎴ ᏥᎦᏴᎵᎨᎢᏴᎢ. ᎦᏙᏉᏍᎩ ᏓᎦᏛᏁᎵ! ᎵᏏ ᎠᏋᏕᏨ. ᎠᎩᏲᎱᎯᏎᎸ ᎠᏇᏥ. ᎠᏇᏥ! ᎥᏝ ᎿᏉ ᏔᎵᏁ ᏴᎦᎬᎪᏩᏛ! ᏣᏁᎳᏅᎯ, ᏍᎩᏙᎵᎩᏳᏉ ᎨᏎᏍᏗ ᏥᏍᎦᎾᎢ! ᎤᏛᏅᎩ.
ᎯᎠᏃ ᏅᏥᏪᏎᎸᎩ; Ꮎ ᎤᎵᏍᏆᎸᏗ ᏣᏓᏙᎵᏍᏓ, ᏗᎩᎾᏓᎨᏳᎯ, ᎾᏍᎩ ᏫᏙᏛᏍᏓᏠᎯᏍᏔᏂᎵ. ᎾᏍᎩ ᎯᎠ ᎾᏂᏪᏍᎬ ᏧᎦᏴᎳᏥᎶᏛ ᎦᎸᏗᏳ ᏗᎨᏒ ᏫᏚᎾᏘᏃᎸᎯ ᎢᎩ. ᎾᎿ ᏭᏘᏃᎸ ᏂᎯ ᏤᏥ, ᎠᎴ ᎤᏚᎩᏉ ᎾᏍᏉ ᎠᏋᎭ ᎾᎿ ᎢᏴᏛ ᎾᏍᎩ ᏂᎯ ᏫᏣᎧᏂᎯᏍᏗᏱ. ᎠᏎ ᎥᏝ ᏂᏙᏓᏳᎨᎯᏓᏍᏗ ᏱᎩ ᎾᏂᎥ ᏫᎬᏩᎷᏤᎯ ᎨᏒᎢ.
