ᎪᎱᏍᏗ ᎬᏙᏗ ᏂᎨᏒᎾ ᎨᏒ ᏄᏍᏛ ᎮᎲᎢ, ᎪᏎᎯ ᎨᏒᎩ.
ᎤᎸᏃ ᎿᏉ ᎯᎠᏉ ᎢᎦᏪᏍᎩ ᎥᎨᏒᎩ; Ꮭ ᏱᏆᏚᎵᎭ ᎠᏆᏛᎪᏗᏱ ᎭᎵᏥᏙᎲᏍᎬᎢ. ᎥᏝ ᏴᏫ ᏱᏗᏥᎪᎾᏛᏘ ᎠᎩᏲᎢᏳ ᎨᏒᎢ, ᎾᏍᎩᏉ ᏰᎵᎦ ᎠᎩᏰᎸᎭ, ᎠᏗᏍᎩᏉ ᎥᎨᏒᎩ, ᎰᏩᏉ, ᎥᎩᎸ, ᎢᏳᏃ ᎨᏍᏆᏛᎦᏁᏗ ᏂᎨᏒᎾ ᎢᎨᏎᏍᏗ, Ꮭ ᏰᎵ ᏴᎨᏍᎩᏲᏍᏙᏓᏏ ᎠᏆᏓᏙᎵᏍᏙᏗᏱ ᏂᎯ ᎣᏍᏛ ᎢᏣᎵᏍᏓᏁᏗ ᎨᏒᎢ, ᎾᏍᎩᏰᏃ ᏂᎬᏯᏛᏁᎰᎢ ᏂᎦᎥ ᎠᎩᎾᏫᏱ ᎢᎬᏗᏍᎪᎢ, ᎠᏗᏍᎩ ᎨᏒ ᎵᏏ.
ᎾᏍᎩᏃ ᎠᏉᎯᏳᎭ ᎠᎦᏛᎦᏁᎸᎯᏉ ᎨᏒᎢ ᎾᏍᎩ ᏄᏍᏛ ᎠᏓᏙᎵᏍᏗᏍᎬᎢ, ᎿᏉᏰᏃ ᎵᏏ ᎤᎸ ᎤᏢᏨ ᎿᏉ ᎤᏪᏅᏒᎩ ᎤᏓᏁᏟᏴᏍᏓᏁᏒᎩ ᎾᏍᎩ ᎪᎱᏍᏗ ᎤᏛᏁᏗ ᎨᏒᎢ, ᎠᎴ ᎾᏍᏉ ᎤᏩᏒ ᎤᏍᏆᏂᎪᏙᏗᏱ ᎤᏰᎸᏅᎩ. ᎤᏣᏘ ᎠᎵᏃᎮᏗᏍᎬᎩ ᎤᏓᏅᏙᎩᎯ ᎨᏒ ᎦᏁᎢᏍᏓᏁᎲᎩ. ᎠᎴ ᎤᎸ ᎿᏉ ᎤᎴᏅᎲᎩ ᎤᏣᏛ ᎤᏓᏅᏖᏗ ᏄᎵᏍᏓᏁᎸᎩ, ᎠᎴ ᎤᏍᎦᏅᏨᎯ ᎨᏒᎢ ᎬᏂᎨᏒᎢᏳ ᏄᎵᏍᏓᏁᎲᎩ, ᎠᎴ ᎤᏣᏘ ᎠᎵᎮᎵᏤᎲᎩ ᎵᏏ ᏂᎦᎥ ᎤᎦᏌᏯᏍᏛᎢ, ᎾᏍᎩᏃ ᏅᏓᏳᎵᏍᏙᏔᏅᎩ ᎵᏏ ᎤᏣᏘ ᎤᏚᎩ ᎬᏍᎬᎩ ᎤᏓᏅᏙ ᎤᏓᏁᏟᏴᎡᎸᎢ. ᎿᏉᏃ ᎠᏆᏓᎵᎢ ᎣᎩᏁᏅ ᎣᏍᏓᎦᏔᏁᏅ ᏭᏢᎬᎢ, ᎿᏉ ᎤᏢᎩ ᎣᎩᏂᏃᏁᎸᎩ ᏂᎦᎥ ᎤᏲᎢᏳ ᎤᏰᎸᏒᎢ, ᎠᎴ ᎠᎦᎰᏍᎬ ᏄᏍᏛᏉ ᎤᎴᏂᏙᎸᎢ. ᎠᏎᏃ ᎯᎠ ᏄᏪᏒᎩ, ᎤᏚᎩᏉ ᎠᏋᎭ ᏥᎨᏳᎢ ᎥᎩᎸ ᎤᏍᏕᎵᏍᎩ ᏥᎩ ᎠᏴ ᎾᏍᏉ ᎠᎩᏍᏕᎵᏍᎩ ᎢᏳᎵᏍᏙᏗᏱ; ᎬᏂᎨᏒᎢᏳᏰᏃ ᏥᎪᏩᏘᎭ ᏥᏍᎦᎾᎯᏳ ᎨᏒᎢ, ᎠᎴ ᎠᏋᏒ ᎬᏆᎵᏍᏕᎸᏗ ᏂᎨᏒᎾ ᎨᏒ ᎬᏂᎨᏒᎢᏳ ᎾᏆᎵᏍᏓ-
