— 15 —
GÅRNIR
Ene di trop pô, pinse dju ; paski c’ est come li tchanson paret mi Dadite.
(tchantant)
Dj’ inme bén do boere on ptit hûfion
Et cwand on m’ sieve li gote,
Dji n’ fwai djamåy beacôp d’ façon
Et cwand dj’ sint k’ dji halcote,
Sol côp, sins tårdjî
Et sins m’ fé priyî
Dji rboe co sacwants dmeys
Ca po roter droet
Creyez m’ i fåreut
Todi vudî l’ boteye. (ter)
(vudant) A vosse santé Lambert, metans nosse moråle a profit, nel leyans nén s’ estchåfer. (i buvèt)
DADITE
Si vosse feme ni loucaxhe nén a ses çanses, vos ndè boerîz alez vos !
GÅRNIR
Mi feme ni tént nén l’ boûsse savez e l’ måjhone ! C’ est mi !
DADITE
Nos savans bén k’ ele n’ a rén a dire.
GÅRNIR
Siya, ele pout dire tot çou k’ ele vout… cwand dji n’ so nén la ; et cwand dj’ î so, dji vs l’ a dit : dji n’ l’ aconte nén et tot kî poite li pantalon divreut djåzer come mi.
