— 12 —
SINNE III
POREA — GÅRNIR — DADITE
POREA
On l’ dit tot costé todi.
GÅRNIR
On l’ pout bén dire ossu, li colebire di m’ cuzén c’ est seur li meyeuse k’ i n’ åye di lådje et d’ lon !
DADITE (a pårt)
Waye, vos l’ cial vinou so ses colons asteure ! Seur k’ i n’ est nén co evoye !
GÅRNIR
Savez vs bén ki Djôzef a dedja vindou ene cope d’ oûs, des oûs savez, cwarante et céncwante francs !
POREA
Oho !
GÅRNIR
C’ est onk ki wangne des çanses, valet, avou ses colons, ci-la ! — Tén ! Dadite est rintrêye ! Et vos n’ dijhez rén, vos Dadite ?
DADITE (ristindant)
Dji n’ so nén si ptite surmint ki po n’ nén s’ aporçure di mi cwand dji so cial ! Il est vraiy ki cwand vos djåzez d’ colons, vos n’ oyez pus rén et vos n’ veyez pus personne !
GÅRNIR
Alez vs mi kerler so mes colons asteure ?
DADITE (vivmint)
K’ a dj’ dju d’ keure di vos colons don mi !
