Page:Tain Bo Cuailnge.djvu/79

From Wikisource
Jump to navigation Jump to search
This page has been proofread.
67
TÁIN BÓ CÚAILNGE

Teōra lā ⁊ teōra naidchi bāi Cūchulaind ina chotlod. Bá dethbirn ém ce robái do mét in chotulta bói do mét na hascísi. Ón lúan iar samain sainrud cosin cétain iar nimolg nī rochotail Cūchulaind frisin résin, acht mad mani chotlad fithisin mbic fria gāi iar medōn midlái ⁊ a chend fora. dord ⁊ a dord ima gāi ⁊ a gāi fora glún, acht ic slaidi ⁊ ic slechtad ⁊ ic airlech ⁊ ic esorcain cethri nollchóiced nÉrend frisin rēsin. Is andsin focherd in lǽch síde lossa ⁊ lubi íci ⁊ slánsēn i cnedaib ⁊ i créchtaib, i nāladaib ⁊ i nilgonaib [78 b] Conculaind, co tērnó Cúchulaind ina chotlud cen ráthugud dó etir.

Isí sein trá amser i llotár in macrad atuáid ō Emain Macha, tri cōicait mac rīg do Ultaib im Follamain mac Conchobair, ⁊ dosberat teóra catha dona slúagaib, co torchratar a tri comlín leó, ⁊ torc[h]ratár in macrad dano acht Fallamain mac Conchobair. Bágais Fallamain ná ragad ar cúlu co hEmain co bruinni mbrātha ⁊ betha, co mberad cend Ailella leiss cosin mind óir bói úaso. Nīrbo réid remiseom anísin, úair dofairthetár dā mac Bethe maic Báin, dā mac mumne[1] ⁊ aite do Ailill, ⁊ rodgonsat co torchair leó. Conid aided na macraide Ulad insin ⁊ Fallamna maic Conchobair.

Cūchulaind immorro bái ina súantairthim cotulta co cend teóra láa ⁊ teóra naidchi hicond ferta i lLergaib. Atracht Cūchulaind iarsin asa chotlud ⁊ dobert láim dara agid ⁊ dorigni rothmúal corcra o mulluch co talmain. Ocus ba nert leiss a menma, ⁊ tíasad i nóenach i tochim bandáil i cormthtech i prímóenach do prīmóenaigib Ērenn. "Cia fot atúsa isin chotludsa innossi, a óclāich?" ar Cūchulaind. "Tri lá ⁊ tri aidchi," for int óclǽch. "Ronmairgsea deside" or Cūchulaind. "Cid de ón?" or int óclæch. "Na slóig cen [ḟ]ōpairt frisin ré sin," ar Cūchulaind. "Ní filetsom ón ōm etir" or int óclǽch. "Cest, cia aránic?" ar Cūchulaind. "Lotar in macrad antuáid ō Emain Macha, tri cōecait mac im Follomain mac Conc[h]obair do maccaib ríg Ulad, ⁊ dobertsat teóra catha dona slūagaib ri hed na trí lá ⁊ na trí naidchi hitāisiu it chotlud innossa, ⁊ torc[h]ratár a tri comn leó ⁊ torchratár in macrad acht Follomain mac Conc[h]obair. Bágais Follomain co mbērad cend Ailella, ⁊ nīrbo rēid dósom ón, ar romarbad." "Apraind

  1. leg. mumme

F 2