Page:Tain Bo Cuailnge.djvu/78

From Wikisource
Jump to navigation Jump to search
This page has been validated.
66
Táin Bó Cúailnge

asa brágít co rorecratár bánánaig ⁊ boccánaig ⁊ geniti glinni ⁊ demna aeóir re úathgráin na gáre dosbertatár ar aird. Cordasmesc ind Némain forsind slóg. Dollotár i narmgrith cethri chóiced Érend im rennaib a sleg ⁊ a narm fodessin, co nerbaltatár cēt lǽch díb do úathbas ⁊ cridenes ar lár in dúnaid ⁊ in longpairt in naidchisin.

Dia mbái Lǽg and, conacca ní, in nóenfer dar fíartharsna in dúnaid fer nÉrend anairtūaid cach ndíriuch ina. dochum. "Ōenfer sund chucund innossa a Chúcán," or Lǽg. "Cinnas [78 a] fir andsin?" or Cūchulaind. "Nī hansa; fer cáin mór and dano berrád lethan laiss, folt casbude fair, brat ūanide i forcipol immi, cassán gelairgit isin brot ūassa bruinne, lēne de sról ríg fo dergindliud do dergór i cústul fri gelc[h]nes co glúnib dó, dubscíath co calathbúali findruni fair, sleg cóicrind ina láim, foga fogablaigi inna farrad. Ingnad ém reb ⁊ ābairt ⁊ adabair dogní, acht ní saig nech fair ⁊ nī saigseom for nech, feib nachasfaiced nech hé." "Is fīr sin, a daltān," forse; "cia dom chārtib síthcairesa séin dom airchisechtsa, dáig ar bīth foretatársom int imned már inamḟuilsea m'óenur i nagid cethri nollchóiced nÉrend ar Tāin Bó Cūalṅgi don chursa." Ba fír ém dó Choinchulaind anní hísin. Anadránic int óclǽch airm i mbói Cúchulaind, argládais ⁊ airchississ de. "Ferda sin, a Chúchulaind," arse. "Ní mór side etir," for Cúchulaind. "Dabérsa dano cobair dait," ar int óclǽch. "Cía tāisiu eter?" or Cūchulaind. "Iss messe do athair a ssídib .i. Lug mac Ethlend." "It tromda dano na fuli formsa, ba héim dam mo íc." "Cotailsiu sin bic, a Chūchulaind" or int óclǽch, "do thromthort[h]im cotulta hicond ferta Lerga co cend teóra láa ⁊ teóra naidchi, ⁊ fífatsa forsna slógaib in nairetsin." Canaid a chéle ferdord dó. Contuli friss. Conaccæ nách crēcht and; ropo glan. Is and asbert Lug:

[1]-[2]"Atrái a maic mórUlad[3] fót sláncréchtaib curetha[4] fri náimtiu fer mell darath móradaig todonathar dia ferragaib sligethar slúaig immenard nerethar fortacht[5] a síd sóerfudut[6] issin mruig ar conathaib cotanmuin arfucherthar fóchiallathar óengillæ arclith ar búáib báifedæ slig delb silsa ríut. Ní fil leó do nertsægul fer do baraind bruthaigte[7] co niurt for do lochtnāmtib cingith carpat comglinni is iarsin átrái, átrái[8] a. m."

  1. In marg. éti loga inso sís
  2. Also in H. 2. 17 fo. 349a
  3. mhoiruladh H
  4. cuirethar H.
  5. neretar fortecht H.
  6. sǽrforughud H.
  7. bruthaighthi H.
  8. iarsin nethatrai atrai H.