"Tānic buiden aili and didiu isin telaich i Sleamain Midi," ar Mac Roth, "nā hūaiti trīcha cēt ergal an[1] riam. Lōech mōr calma odarda cōir comendaisc inna hairinach, folt dubchas fair, cromrosc odarda[2] nadard ina chind, fer tarbga tailc garb, brat glas imbi co ndelc argaid ara dōit, lēne gel culpatach i custul imbi, claideb iarna ṡlīasaid, dercscīath co mbūaili chaladargait fair, tresemnech slindlethan ina lāim." "Cia sin, a Ḟergais?" or Ailill. "Is lonnbruth barand, is lāimnid cach catha, is būaid cech ergaile dadānic ann; Connad mac Mornai o Challaind andsain," or Fergus.
"Tānic buiden aili ann didiu isin telaig oc Slemin Midi," or Mac Roth. "Is tōichim slūaig ar mēit. Tōiseach fil in airinach na buidne sin, nī coimdig lǣch bad chāime itir delb ⁊ timthach ⁊ decelt. Folt tobach dergbuidi fair, gnūis chōir corcra chutromæ. Aged fochǣl forlethan, beōil derga thanaidi, dēt nīamda. nēmonnda, guth glan[3] gleōrda, cuinsiu chāin corcarda chumdachtach.[4] Āilldem do delbaib dōine. Brat corcra hi forcibul imbi, bretnais fo al-lānecor de ōr hūasa bānbruindib, cūarscīath co tūagmīlib illdathacha co cobroth aircid hūasa clīu. Gāi fota fǣbarglas la foga fēig fobartach ina lāim, claideb ōrduirn ōir fora muin, lēne [5]culpatach co ndergindled imbi i custul." "Cia sin, a Ḟergais?" or Ailill. "Roḟetamar immorro," or Fergus. "is leth gliad ēm," orsē, "dandānic and, is clāriud comlaind, is lonnbruth ārchon; Rochaid mac Faithemain ō Brig Dumæ far cliamain insin rofōi la far ninginsi .i. la Findabair."
"Tānic buiden aile and didiu isin telaich i Sleamain Midi," or Mac Roth. "Lōech oircnech remarsliastach mōr inn airinach na buidne sin. Bec nāch remithir fer cach mball de. Aṅgō is fer co talmain" olsē. [48 a] "Folt dub fair, gnūis chnedach corcarda lais, rosc mbrecht nērard ina chind, fer ān athlom samlaid co ṅgrāin ⁊ erūath connocaib dafil coṅgraim adamra itir ētach ⁊ arm ⁊ ēcosc ⁊ āni ⁊ erred; conocaib co comrom niad co naṅglonnaib samnæ, co mmīad imtholton, co saidig tar comlond do briusiud for forlond co mbaraind for bidbadu, co nimthecht for ilchrīcha ecraidi cen chomēirgi. Nī gō is tailcc doroachtar
