Page:Tain Bo Cuailnge.djvu/121

From Wikisource
Jump to navigation Jump to search
This page has been proofread.
109
TÁIN BÓ CÚAILNGE.

"Tānic buiden mār borrfadach aile isin telaich oc Sleamain Midi," or Mac Roth. "Rolāsat a nētaigi tara nais. Aṅgō didiu is tailc dond dechadar isin telaich, tromda int erfūath[1] ⁊ is mōr in gin donucsad forru, hūathmar int airmgrith rolāsad ocon toithim.[2] Fer cennremar calma caurata[3] inna hairinach ossē cichorda grainne, folt ētrom grelīath fair. Sūili buidi mōra ina chind, brat buidi co nechlaim[4] gil i faithi imbi. Scīath bēmnech co fōebar condūalach fair dianechtair, gāi slindleathan, sleg ḟota co mbrōen fola iarna crunn, ⁊ gāi a thānaisi co crū bidbud iar nāg ina lāim. Claideb bēmnech mār iarna formnu." "Cia sin, a Fergais?" or Ailill. "Nimgeb comroc comlond nā comrom in lǣch dodānic .i. Lōegaire Būadach mac Connaig maic Ilech o Impiul[5] antūaid," or Fergus.

"Tānic buiden mōr aili and didiu i Slemain Midi isin telaich," or Mac Roth. "Lōech munremar collach cāin inn airinach na buidne sin, folt dubchas fair ossē corcra gormainech, rosc ṅglas lainderda inna chind, brat odarda fochlaidi imbi, bretnas bānairgit and, dubscīath co mbūailid humæ fair, gāi sūilech co foscadaib ina lāim, lēne trebraid co ndeircindliud imbi, claideb co nimdornn diad tara ētach anechtair." "Cia sin, a Fergais?" or Ailill. "Is cor ar ugra dodānic, is tond romara bāides minglaisi, is fer trī ṅgretha, is brāth mbūabthana bidbad dodānic," or Fergus ".i. Muinremur mac Gerrcind ō Moduirn atūaid."

"Tānic buiden mōr aili ann didiu isin telaig i Sleamain Midi," or Mac Roth. "Buiden rochāin roālaind itir līn ⁊ costud ⁊ timthaidi. Is borrfadach dofarfobrit in tulaig, forrochroth in slōg an armgrith rolāsad oc teacht ind rēimme. Lōech cǣm grāta inn airinach na buidne, āillde do dāinib [47 b] a delb itir folt ⁊ rosc ⁊ hūamain, itir errud ⁊ chruth ⁊ guth ⁊ gili, itir mīad ⁊ mēit ⁊ maisi, ⁊ itir arm ⁊ ergnas ⁊ cumtach, itir dechelt ⁊ gaisced ⁊ cōri, itir feib ⁊ gāis ⁊ cenēl." "Isī a epert," ar Fergos; "is luchair dego in fer ālaind Feidlimid dadānic ann, is borrfadach caurad, is tonn anbthine bādis, is gus nād fulaṅgthar co coscraib a aile-c[h]rīchaib iar foirtib a nāmad .i. Feidlimid Cilair cētaig[6] ann."

  1. The f has been inserted later
  2. sic ms.; leg. tóchim
  3. caurita altered to caurata
  4. The dot over c seems later
  5. This was originally written impuil, altered later to impiul
  6. g inserted later on erasure