Page:Tain Bo Cuailnge.djvu/100

From Wikisource
Jump to navigation Jump to search
This page has been proofread.
88
TÁIN BÓ CÚAILNGE

fīr, a gilla, nocho cūalaid Cūchulaind deglōech deigfer do thīachtain ina agaid cosinndiu[1] for Tāin Bō Cūailnge, ⁊ in thrāth adchūalaid forācaib in āth." "Mōr in līach Cūchulaind do ēcnach ina fēgmais,[2] dāig in cumain latsu intan tucsabair in cath do Germān Garbglas ūas eochairimlib mara Toirrīan? Roḟācbaiseo [38a] do c[h]laideb oc na slūagaib, corob ē Cūchulaind romarb cēt lœ̄ch ica rochtain ⁊ tucastair dait hē, ⁊ in cumain lat ca rabamar an aidchi sin?" ar in gilla. "Nād fedar,[3]" or Fer Diadh[4]. "Do thig rechtairi Scāthaigi," or in gilla, "⁊ dochōdaisiu co soindim sogenda remond isin teach ar tūs. Dobert int aithech bēim dond nǣl trebennach dait hi midbach do droma, co tarlaic irchor dit dar in dorus imach. Tānic Cūchulaind isteach ⁊ dobert bēim da c[h]laidiub dond naithech, co nderna dā nordain de. Misi robo rechtaire dāib eret robadbair[5] isin baili. Da mbad in lāsin, nī epertha co mbadad ferr do lœ̄ch annā Cūchulaind." "Ēcōir i ndernais a gilla," for Fer Diad, "dāig nī ticfaind ar amus in chomlaind dambad ar tus adbertha frim. Cid nāch srengai feirtsi in charpait fom[6] thāib ⁊ mo ḟogaimen fom chind co rocodlaind collēic?" "Monūar," for in gilla, "is cotlad troch sin ar cind aigi ⁊ cūanart sund." "Ced ōn, a gilla? nāch tūalaing tusu forairi[7] ⁊ forcomēt dam?" "Isam tūalaing" or in gilla, "acht mina thīstar a nēllaib aa nǣr do t' indsaigid, nā ticfaider anair nā 'nīar dot' indsaigid cen rabad cen rāthugud." Rosrengtha fertsi a charpait fo thōeb ⁊ a ḟogaimen fo chenn, ⁊ cid ed nī rochotail a becc.

Dāla Conculaind doberar ar aird." Maith, a mo p[h]opa a Lāig, geib na heocho ⁊ indill in carbat, matā Fer Diad ac ar nirrnaidi, is fada lais." Atracht in gilla ⁊ rogab na hecho ⁊ roindill in carpat. Cindis Cūchulaind ina charpat, ⁊ tāngadar rempo do indsaighid[8] an ātha. Imthusa gilla Ḟir Diad, nīrbo chīan dō oc forairi co cūala chucu culgairi in charpait Robāi ic dūscud a thigernai ⁊ dorigni in lāid:

"Rocluiniur cul carpait
dar druiṅg nālaind nargaid,
is fūath fir co farpairt
ūas dreich charpait crūaid:

  1. d added later above
  2. fe added later above
  3. f added later above
  4. Aspiration later
  5. d later over a
  6. After a letter has been erased, and a stroke added connecting and thaib.
  7. Between r and a an f has been added later
  8. saigh added below later