bliko nesavanta, la severa uneso e netuchebleso di lia linguo ; ma interne li esas tote dividita, ton ni savas bone, e li reale violacas e destruktas la Fundamento, quan li simulas konservar ed adorar. Nia uneso esas altraspeca : ol ne esas ligita ad un homo o ad un libro ; ol ne esas uneso rigida e fixa, ma uneso vivanta e movebla. Ma ol mustas tamen esar uneso, tante plu yuste e strikte, ke ol ne impedas la movo e la progreso. Singlu darfas expresar sua opiniono e prizentar sua propozo. Omna ta propozi esas diskutata, unesme hike, publike, duesme en l’Akademio. L’Akademio decidas pri oli per voto, ofte per plura voti. Kompreneble, sa decidi ne povas kontentigar omna diversa o mem kontrala opinioni. Ma, se singlu darfas konservar sua opiniono e preferar ol interne a ta di l’Akademio, omni devas aceptar e sequar la decidi di l’Akademio. Nam on elektis ol nur por to ipsa, nome, por definar la komuna linguo. Ol povas erorar, segun la judiko di singlu ; ma on devas tamen sequar ol, nam nulu darfas pozar sua propra judiko super l’autoritato komune aceptita. Quon valorus autoritato, quan singlu aceptus e sequus nur se e kande ol decidus konforme lua propra opiniono ? Ol cesus existar, e l’uneso anke.
Pro ta motivi, la decidi di l’Akademio devas pozar fino a la diskuti pri singla questiono ; nam altre, on povus e devus diskutar senfine la sama questioni, ed on ne povus avancar. Or ni ne diskutas por diskutar, ma por decidar. Ni ne esas diletanti, ni ne konsideras la L.I. quale sporto o ludo, malgre la kalumnii di nia adversi. Ni ne pretendas esar neeroriva, e konseque ni ne proklamas nia verko kom netuchebla ; ni ne interdiktas a ni la yuro emendar ol, se to aparos necesa ; ma ni ne permisas a singli korektigar ol per sua privata autoritato, nam to esus, ne progreso, ma dissolvo[1].
En ica No klozesas la diskuti pri : s vice z ; l’indiko di la sexui ; la pluralo di l’adjektivi ; la nomi di instrumenti ; la geografiala nomi ; la sentempa verbala formi ; la prepoziciono an, e la vorti propozita til No 34. Konseque, ni mustas ajornar multa artikli pri la cetera questioni.
- ↑ On riprochis a ni, ke, ne aceptante artikli qui volas diskutar la decidi di l’Akademio, ni insertas artikli, qui defensas oli. To esas tamen facile komprenebla ! Ni havas la yuro e mem la devo explikar e justifikar la decidi di l’Akademio, konocigante segun bezono la motivi qui determinis oli, e respondar a la kritiki quin on povas facar pri li exter la Idisti. Nulu povas serioze postular, ke ni restez senpartia e neutra inter la decidi di l’Akademio e ti qui kritikas oli !
