saghoe ta' mambhoe èsarèng, dhǎddhi èkakan ban ampassa sakalè.
Bi' orèng Maloekoe, saghoe, sè ella bhersè, kennèng èola ana-bǎrna; bădă sè ètadjhin bi' ghoelă, bădă sè èkaghăbăj tadjhin soep; pyè tjè' njamanna tja'na orèng è dissa. Bădă polè sè èola èkaghabǎj djhǎdjhăn. Paghǎbajjǎ ghămpang bhai. Pakakassa tjoma eppan bǎto, otabă băto pèppè' doewǎ mègghi'. Bilă eppan otabă băto djǎrèja èangghoejǎ, èpanasè ghǎlloe. San ella panas, adhoenanna djhǎdjhăn èpamaso' ka dalem eppan, otabǎ èsèlèn ka băto sè pèppè' djǎrèja, ladjhoe ètjèttjè'è bato sè sèttongnga. È dalem 5 mennèt tanto ella massa', pas èkakan ghi' nga'-anga', tjè' nè'matta.
Kalamon saghoe djărèja ètaroa abit, opama èkasangoa èntar djhălăn abit, kodhoe èdjhemmor ghalloe èpatje kerrèngnga, ladjhoe ètengkessè ghan 20 mègghi'. Saghoe sè èpabărijă kennèng ètaro kongsè pan-bărămpan taon.
