nga malipayon naglapsanay paagi sa ila mga kalimutáw, ang tinagâ mahinay, matig-a, maluya, katulad sang magahod nga daghob
sang dagùob sa masilaw nga kasanag kag sa kaabtik sang kilát:
nagsaysay sang balatyagon nga nasayran na, isá ka kaisipan nga nahangpan na, kag kon iní gingamit tungód nga ang handum sang
tagipusùon nga nagagahúm sa bug-os nga lawas kag punô sing kalipay, maluyag nga ang bug-os nga lawas nga tawhanon sa tanán
niya nga kagamhanan sa unód kag sa panumdoman magpatuháw
sang binalaybay sang kahimayàan nga ginaamba sang ka.ág. Sa
pamangkutanon sang gugma sa isá ka panulok nga nagasilak kag
nagabantay, walâ sing mga sabát ang pulong: nagasabát ang yuhóm, ang halók ukón ang pagginhawa.
Kag sang ulihe, sang ang magkahagugma, nga lumikáw sa plumero ni tiyà Isabel nga nagpatap-ok sang yab-ok, nagkadto sa palahanhanan sa paghambalanay sing hilway, sa tungâ sang magagmay nga mga arko sang mga balagon, anó ang ila ginsugilanon sa mga hutikhotik nga kamó nagapalangurog, mga mapulá nga bulak sang cabello de angel? Isugid ninyo nga kamó may mga kaamyon sa inyo mga pungango kag mga duág sa inyo mga bibig; ikaw, harupoy, nga magtuón ka sang pinasahi nga mga ambahanon sa likúm sang madulóm nga kagab-ihon sa mga tinagò sang aton lin-ay nga kabukiran; isugid, mga silak sang adlaw, masilaw nga danyag sang Wala'y Katubtoban sa dutà, nga amó lamang ang butang nga dî-lawasnon sa kalibutan nga lawasnon, isugid, ninyo, nga akó lamang ang makahibaló maghatag sing kasaysayan nga binuang!
Apang sanglit indi man ninyo luyag nga himuòn inâ, ako na lamang ang maghimulat.
Tagumnon sadto ang langit: lab-as nga dupoydupoy, nga walâ sing kahamót sang bulak, nagtay-og sang mga dahon kag mga bulak sang mga balagon, nag-uyog-uyog ang mga cabellos de angel, ang mga tanúm nga pinakabit, ang mga isda nga kaging kag mga lámpara gikan sa China. Ang gahod sang bugsay, nga ginbugsay sa malubog nga tubig sang subâ, ang paglabay sang mga karwahe kag mga karo sa taytay sang Binondo maathag nga nagdangat sa ila, apang walâ nila mabati ang ginkumod sang tiyà:
—Maayo, dirâ bantayán kamó sang tanan nga kaingod, — silíng niya.
Sa pamunò walâ silá sing ginhambal kundi mga binuang, yana'ng matam-is nga mga binuang nga katulad sang mga gin
