536NOLI ME TÁNGERE
kamatayon kag kinuha niya ang tanan nga papel. A! Si pilósopo
Tasio napatay man kag ginlubóng sa patyo sang mga insik.
—Kailo man si D. Anastacio! — Tuaw ni D. Filipo. — Kag ang iya mga tulon-an?
—Tinutdan sang mga matinùohon, nga ginpatihan nila nga sa sinâ ginlipay nila ang Diwa. Walâ malwás pati ang mga libro ni Cicerón . . . ang gobernadorsilyo walâ gid sing nahimo sa pag- pugóng sadto.
Naghipos ang duhá.
Sa amó nga tión nabatián ang masubô kag mamingaw nga ambahanon sang buang.
—Nakasayod ka kon san-o kaslon si María Clara? Na mangkot si Iday kay Sinang.
—Wala ako makahibaló, —sabát siní. — Nabaton ko ang isá niya ka sulát, apang walâ ko pagbuksi sa kahadlok nga mahibal-an ko. Kailó man si Crisóstomo!
—Silíng nila nga kon indi lang nahanungód kay Linares, binitay nila si Kapitán Tiago, anó ang mahimò ni María Clara? — Hambal ni Victoria.
Ang isá ka bata nga lalaki umagi nga nagkiángkiáng; nagdagundagon siá pakadto sa plasa, diín naghalín ang ambahanon ni Sisa. Si Basilio yadto. Nakità sang batà ang ila balay, nga walâ sing tawo kag nagubâ; sang tapos siá makapangusisà sing maayo nasayran na lamang niya nga ang iya ilóy nagbuang kag naglagaw sa banwa, nahanungód kay Crispin walâ sing makasugid.
Si Basilio nagtulón sang iya mga luhà, ginpanagitlon niya ang iya kalisód kag walâ sing pahuway naglakát siá sa pagpangità sang iya ilóy. Nakaabót siá sa banwa, namangkutanon siá nahanungod sa iya kag ang ambahanon nagpilas sang iya palamatin-an. Pinunggan sang kailó ang pagpalangurog sang iya mga tuhod kag buót siá madalagan sa pag-alay-ay sa iya mga butkon sang iya ilóy.
Binayàan sang buang ang plasa kag nagsampot siá sa atubangan sang baláy sang bag-o nga alpéres. Sa karón subong sang una may isá ka manogbantay sa ganhàan, kag isá ka ulo sang babae sa bintanà, apang indi ang Isbing, kundi isá ka pamatan-on: ang alpéres kag ang wala'y palad indi na alangay.
