—Huo, maayo sia anay, — balos sang tigulang nga babae. — Apang nagkadto sia sa Espana; ang tanan nga nagakaladto sa Espana nagabalalik nga mga erehes, siling sang mga kura.
—Ohoy! — Sabat sa iya sang bana nga nakakita sing inogsabat. — Kag ang kura; kag ang tanan nga kura, kag ang Arsobispo, kag ang Papa kag ang Birhen indi bala gikan sa Espana? Aba! Kon amo mga erehes man sila? Aba!
Maayo nga palad kay utod Puti, ang pag-abot sang isa ka suloguon nga babae nga nagdalagan, nga ginhadlukan kag nagpalangluspad, nga umutod sang baisay.
—May isa ka tawo nga binitay sa talamnan sang amon kaingod! — Siling niya nga naghapuhapo.
—Isa ka binitay! — Hambal nga may kabulong sang tanan nga puno sang kakugmat.
Ang mga babae nagpalanguros; wala sing isa nga sarang ma kahulag sa iya duog.
—Huo, ginuo, — Padayon sang suloguon nga babae nga nagpalangurog. — Nagkadto ako sa pagpanguha sing balatong... nagtulok ako sa talamnan sang amon kasiling sa pagtan-aw kon yara sia... nakita ko ang isa ka tawo nga naghabughabog; naghunahona ako anay nga si Teo, ang suloguon, nga masunson naghatag sa akon... nagpalapit ako sa pag... kuha sing mga balatong, kag nakith ko nga indi sia, kundi lain, isa ka patay; nag. .dala. .dalagan ako kag...
—Lakat tan-awon naton — siling sang tigulang nga lalaki nga tumindog; idul-ong kami . . .
—Indi ka magkadto! — Singgit sa iya ni utod Puti nga hinawiran sia sa bayu. — Mahanabo sa imo ang malaot nga palad! Binitay sia? Hand malain sa iya!
—Pabay-i ako nga magtan-aw, asawa ko; kadto ka sa tribunal, Juan, sa pagpahibalo; bast wala pa mapatay.
Kag nagkadto sia sa talamnan nga ginsunod sang suloguon nga babae, nga nagpalipod sa iya likod; ang mga babae kag si utod Puti man nagsulunod sa likod, nga puno sing kahadlok kag kabulong.
—Yara, ginuo, — siling sang suloguon nga babae nga dumulog kag gintudlo niya.
