—Anó nga batíd (perito) kag anó man nga batídbatid (peritas)! —Hambal nga may lahóg ni P. Dámaso. - Kon sin-o ang magkinahanglan sang mga batíd (peritos) isá ka tutóy (perrito): kinahanglan patig-ahán sing labí ang mga indyo, mapatindog silá sang ila kaugalingon nga mag baláy, nga indi makahibaló maghimò sang apat ka dingding kag butangán sing salóg sa ibabaw, nga iní tanán isá ka buluthòan!
Ang tanan nagtinulok kay Ibarra, apang iní, bisán nangluspad, nagpadayon sa pagsugilanon kay María Clara.
—Apang ginabilang nimo, Reberensya...
—Tan-awón nimo,— padayon sang pransiskano nga wala na pagpahambalá ang Alkalde, tan-awón nimo kon paano sang tawo naton, ang labing' lungóslungós naton, ginpatindog ang isá ka ospital nga maayo (bueno), matahúm (bonito) kag sa kubós nga bilí (y barato). Nagpatrabaho siá sing maayo kag walâ magbayad kapin sa waló ka sikapat6 ang adlaw sa mga naghalalín pa sa ibán nga mga banwa. Yadto siá makahibaló magdalá sa ila, indi katulad sang madamò nga tsiplado kag mestisilyo, nga nagpalain sa ila nga ginbayaran silá sing tatlo ukón apat ka real.
—Nagsilíng ka Reberensya nga ang ginbayad lamang niya waló ka sikapát? Indì mahimò!— Buót liwatón sang Alkalde ang dalagan sang hambalanay.
—Hùo, ginuo, kag inâ dapat nila sundon yadto'ng mga nagapakilala nga maayo silá nga mga katsilà. Nakità na, kutob nga ang Kanal sang Suez nabuksan, ang mga kalainan naghalín didto. Sadto, sang kinahanglan libuton naton ang Cabo (Cape of Good Hope) indi nag-alabót ang pilá nga malain, walâ man magkaladto didto ang ibán nga naglain!
—Apang, P. Dámaso!...
—Ikaw nakakilala na kon anó ang indyo: sa gilayón nga may diutay siá nga nahibal-an, nagapaka-doktor na. Tanán inâ nga sipunón nga nagkaladto sa Europa
—Apang, pamatìan mo Reberensya! Tublag sang Alkalde nga kinibáng sa katigdas sang amó nga mga tinagâ.
—Ang tanán matapos nga bagay matapos; —padayon ni P. Dámaso. —Ang kamót sang Diwa makità sa tungâ, kinahanglan
__________________________
(6) Waló ka sikapat —1 ka pesos, 2 ka eskudo, 5 ka pesetas, 8 ka plata real, 100 ka kwartos, 100 ka sentimos. Ginaisip sang kadamoan sa sinikapat; sa komersyo sa senintimos.
