—Ang napatáy isá man lamang ka indyo!
— Magpadayon ang pandot! Ang músika! Ang kasubô indì makapabanhaw sa patáy! Kapitán, hiwaton dirí ang mga pagpangusisà... Pakarión ang direktorsilyo! (3) ... Bilanggùón ang manunudlò sang trabaho!
—Bilanggùón siá!
—Bilanggùón! Oy! músika, músika! Bilanggùón ang manunudlò!
—Gg. Alkalde,—sabát nga may kaligdong ni Ibarra, — kon ang kasubô indi makapabanhaw sang patay, labí na gid nga matigayon ina sa pagpabilanggò sang isá ka tawo nga ang iya sala walâ naton mahibal-i. Ginatindugán ko ang iya pagkatawo kag ginapangayo ko ang iya kahilwayan labí na gid sa siní nga mga adlaw . .
—Maayo! Maayo! Apang indì pag-ipasulit sa iya!
Naglibot ang tanán nga sarì sang hinambalhambal. Ang kaisipán sa milagro butáng nga ginkasugtanan na. Si Fr. Salví, wala'y sapayán, daw nalipay diutay nahanungód sa milagro, nga sa isá ka santos sang iya kumboyahan kag sang iya parokya ginpahanungód.
Wala man makulang ang isá nga nagsugpon nga nakakità nga nanaog sa kutkot, samtang ang tanan naghinugpaas sang isá ka dagway nga nagsuót sang panapton nga maitúm katulad sang ila sang mga pransiskano. Walâ sing duhádoha: amó man yadto si S. Diego. Natalupangdan man nila nga si Ibarra nakasimba kag ang dalag nga tawo walâ; masanag subong sang silak sang adlaw.
—Nakità mo? Indi ka maluyag magsimba! --Siling sang isá ka ilóy sa iya anák. —Kon wala ko ikaw paghanuta sa pagpilit sa imo, karón dal-on man ikaw sa balay-banwa katulad sinâ, sa kariton!
Sa pagkamatuod ang dalág nga tawo ukón ang iya bangkay nga naputós sa isá ka baníg, dinalá sa balay-banwa.
Si Ibarra dumalagan sa iya balay sa pag-ilis sing panapton.
—Malain nga pagpanugod, hm! —Siling ni tigulang Tasio nga naglakát.
______________________
(3) Direktorsilyo— Amé ini ang pagtawag sang tawo nga sa munisipyo sang mga tumandok nagauyat sang hilikutón sang isá ke sekretaryo. Ang pangulohan sang banwa natapoan sang isá ka gobernadorsilyo ukón kapitán, isá ka nahauna nga tenyente. . . kag sang isá nga ginatawag nga direktorsilya.
