Nakilala nila nga ang bangkay iya sang dalág nga tawo nga nagtindog sa luyó sang aliling.
—Isumbong ang manunudlò sang trabaho! —Amó ang nahauná nga nabungát sang Alkalde.
Inusisà nila ang bangkay, binutáng nila ang ila kamót sa iya dughan, apang ang tagipusùon walâ na pagpitík. Natumbahan siá sang kahoy sa ulo kag ang dugo nagkawas sa mga buhò sang iya ilóng, bàbà kag mga dulonggan. Nakità nila sa iya liog ang mga lagúb nga makatilingala: apát ka lupyak nga madalum sa isá ka pihák kag isá man sa pihák nga daw labí kadalum: sa pagtulok sinâ mapatihan nga ang isá ka kamót nga puthaw daw nagkuga sa iya subong sang malagbà nga kukó.
Ang mga pari nangibulahan sing mainit sa pamatan-on, nga ila kinumosta. Ang pransiskano nga mapailubon, nga amó ang nangin-kalág nga balaan kay P. Dámaso, naghambal nga may luhà ang iya mga matá:
—Matarong ang Diwa, ang Diwa maayo!
—Kon akó magpanumdom nga sang nagligad nga mga tinión didto akó! Siling sang isá sang mga alagad kay Ibarra.— Silíng ko! Kon akó abi ang naulihé, Jesus!
—Magapalanindog ang akon mga buhók!—silíng sang isá nga kulokalbuhon.
—Kag maayo nga sa imo inâ nahanabò kag indì sa akon!— Nagkurog nga humambal ang isá ka tigulang.
—Don Pascual!— May kakunyag nga hambal sang pilá ka katsilà.
—Mga ginuo, ginahambal ko inâ kay ang pamatan-on wala mapatay; kon wala akó matumbahí, mapatay akó sa pagpanumdom lamang sinâ.
Apang si Ibarra malayo na nga naghisayod sang kahimtangan ni María Clara.
—Ini nga hitabô indi dapat mangínsablag sa pagpadayon sang pandot, Gg. Ibarra! - Hambal sang Alkalde.— Dayawon ang Diwa! Ang napatáy indì isá ka parì, indì katsilà!Dapat pangalipayan ang imo pagkalwás! Dumdumón mo kon napilpilán ka sang bató!
—May mga tiliman-an, may mga tiliman-an! —Hambal sang eskribano. —Nahambal ko na ina. Si Gg. Ibarra wala sing luyag nga magpanaog. Nakità ko na ina!
