lung-ong nahanungod sa pulong, wala sia magkahadlok nga makasayop sa ila atubangan. Sa mga katsila tuhay na iya nga butang:
nakabati sia nga ginhambal ang mga pagsulondan sa pagpamulongpulong kag sa iya mga manogpamati dapat nga may isa nga
nakabutho sa kolehiyo, ayhan ang Alkalde Mayor; tungod sina
sinulat niya ang iya mga wali, ginpamadlong, ginpatahum kag
sang ulihe sinaulo kag iya ginhanas sing mga duha ka adlaw nga
nagligad.
Nasayran sang tanan nga wala sing isa sa mga tumalambong nga nakahangop sang kabilugan sang wali; tama ka saliagum kon hangpon kag ang mangwawali tama kadalum, suno sa ginsiling ni utod Rufa, gani nga ang manogpamati naghulat nga wala mag-abot ang kahigayunan sa paghibi, kag ang sinubol nga apo sang tumoluo nga tigulang bumalik sa pagtulog.
Wala’y sapayan ini nga bahin labi nga may pagkamalahalon sangsa nahauna, ayhan tungod sa pila ka manogpamati, nga makilala naton pa gid sa ulihe.
Ginsugdan niya sing “Mana utor con cristiano,” ang sumundo ang madamo nga mga tinaga nga indi malubad; naghambal sia sang kalag, sang impyerno, sang “mahar na santo pintakasi", sang makasasala nga mga indyo kag sang mga matarong nga Paring’ Pransiskano.
— Panulay! — Siling sang isa ka dimatinuohon nga taga-Manila sa iya kaupod. — Ina iya hambal na sang griego sa akon, malakat na ako.
Kag nakita niya nga natakpan ang mga ganhaan, gani nagagi sia sa sakristiya sa daku nga kinagula sang mga tawo kag sang mangwawali, nga nangluspad kag nakadulog sa tungatonga sang iya ginahambal; ang iban nagpaabot sing masakit nga mga tinaga, apang tinulok lamang sia ni P. Damaso kag pinadayon ang iya pagwali.
Pinakawas niya sa iya mga bibig ang pagpakalaot sang dagon, batok sa kakulang sang pagtahod, ang nag-amat luntad nga pagkadi-matinuohon sang mga tawo. Ini nga butang daw amo ang iya aliali gani nga pumakita nga binatyag niya kag ginmitlang niya nga may kusog kag kaathag. Naghambal sia sang mga makasasala nga wala pagkompesar, nga nagakalapatay sa mga bilanggoan nga indi makabaton sing mga sakramento, sang mga panimalay nga malain, sang mga mulomestiso nga bugalon kag
