ang iya panulok sa Alkalde; sang ulihe amát siá nagkrusimano, nga walâ sing ginmitlang nga isá ka tagâ, apang, halín sa siní nga paglinóng tubtob sa iya paghulag, pinilák niya ang iya ulo sa likod, tinudlò niya ang dakû nga ganhaan nga sinìad niya ang hangin sang kilid sang iya palad, sa tuman kabuklas nga ang mga sakristan naghangóp nga ang hagyù nagkahulogán nga isá ka sugò kag tinakpan nila ang mga ganháan; ang alpéres indì mahim-ong kag nagduhadoha silá kon balá mahalín silá ukón mapabilin, apang ang mangwawali nagsugod na sa paghambal sa tingog nga mabaskog, punô kag alangay: sa wala'y duhadoha ang iya anay mayordoma nakahibaló gid magbulóng.
"Matahúm kag masanag ang halarán, masangkad ang dakû nga ganhàan, ang hangin amó ang aliling sang balàan nga tinagâ nga magakawas sa akon bibig, hanti pamati kamó sa mga igdulungog sang kalág kag sang tagipusùon agúd nga ang mga tinagâ sang Ginuo indì mahulog sa batuhón nga dutà, nga pagatuk-on sang mga pispis gikan sa impyerno, kundi magapanubò kag magapanalingsing bilang balàan nga binhi sa talamnan sang aton tinatahod kag langitnon nga P. S. Francisco! Kamo, dalagkò nga mga makasasalà, nga binilanggò sang mga moros sang kalág, nga nagapuluót sa kalalawran sang wala'y katapusan nga kabuhi sa mabakod nga mga sakayán sang unód kag sang kalibutan, kamó nga nagapas-an sang mga talikalâ sang pagpakalakás kag kaibog kag nagabugsay sa sakayán sang impyernohanon nga Satanas, magtulok dirí nga may mahamùot nga paghinulsol sa nagalwás sang mga kalág sa pagdakóp sang yawà, sa makahas nga Gideón, sa makusog nga David, sa madinalag-on nga Roldan sang Pagkakristohanon, sa langitnon nga gwardya sibil, nga labí pa kaisog sa tanan nga gwardya sibil kon tingbon, nga nagligad kag palaabuton, —(ang alpéres pumasampok sang kilay)—huo, ang Gg. Alpéres, labí nga maisog kag gamhanan, nga walâ sing pusil kundi isá lamang ka krus nga kahoy, lumutos nga may kaisog sa wala'y kamatayon nga tulisán sang kadudolman kag sa tanán nga balagubay ni Luzbel kag nakapadulà sang tanán tubtob sa katubtoban, kon ang mga kalág indi lamang di-mamalatyon! Iní nga dalayawon nga tinuga nga langitnon, iní nga makatilingala nga pinasahi nga tawo amó ang mapalaron nga Diego de Alcalá, nga, gamiton ko ang pagpaanggid-anggid, kay ang mga pagpaanggid-anggid makabulig sing maayo sa pagpahangóp sang mga -
