inogpaaso, nga ang iya asó sa tión kag tión ginduhol niya lóng
sang kura, nga labí nagpakità pa gid sing kaligdong.
Amó iní ang paglakát sang prosesyon nga mahinay kag nagdulógdulóg nga ginbuylogán sang linupok sang mga bomba, mga ambahanon kag mga lalantunon sa pagtuo, sang mga banda sa músika nga nagsunod sa likód sang tagsa ka karo. Sa amó nga kautitíd, ang Hermano Mayor nagpanghatag sing mga kandila nga gindalá sang kadamban sang mga nagbuluylog sa prosesyon sa ila mga baláy nga may inogsugâ silá sa apat ka gab-i sa paghampang sang baraha. Sa hugót nga pagtùo nagluluhód ang mga tawo kon mag-agi ang karo sang Ilóy sang Diwa kag nagpalangadi sing tuman kainit sang mga Kredo kag mga Salbe. Sa atubang sang isá ka baláy nga sa iya mga bintanà, nga napunihán sing matahúm nga mga binitay, nagpamintanà ang Alkalde, sanday Kpn. Tiago, María Clara, Ibarra, pilá ka katsilà kag mga dalaga, dumulog ang karo; binatak ni P. Salvi ang iya panulok apang walâ siá magpahilúm sing bisán diutay nga makapakilala nga siá nagyaób ukón sa pagkilala sa ila: nagtadlong lamang siá, nagtadlong pa gid kag ang iya kapa nga inogmisa nahulog sa iya mga abaga nga labí nagpatahúm sa iya.
Sa dalan, sa ubós sang bintanà may isá ka pamatan-on nga babae nga mainabyanon sing pangguyahon, nga nagpanapót sing tuman kahipid, nga nagkugos sa iya mga butkon sang isá ka bata nga diutay sing panuigón. Isá siá ayhan ka nars ukón sulogùón nga manog-atipán sang batà, kay ang batà maputi kag mapulápola sing buhok, kag siá iya kayumanggi kag ang iya mga buhók labí pa kaitúm sangsa asabatse.²
Sang makita niya ang kura, inuntay sang batà ang iya magagming nga mga kamót, nagkadlaw sa sinang' pangadlaw sang batà nga walâ pag-agda sang kasubô ukón makapalain man sa ila kag nagsinggit sa tungâ sang madali nga kalinóng! Pa... pá! Papá! Papá!
Ang pamatan-on nagpalangurog, tinapnan niya gilayón sang iya kamót ang bàbà sang batà kag naghalín nga nagdalagán nga gumón ang iya panumdoman. Ang batà humibî.
Ang mga may malain nga panghunâhonà nagpinangilayay. kag ang mga katsilà nga nagtan-aw sang madali nga talan-awon
_____________________
(2) Azabache — Isa ka mineral nga bato nga tama kaitum.
