naglanton sa iya makailila nga pyano, nga may pagkabatid nga
nakapahanumdom sa akon sa kay Galvez,4 sang mga labing' maayo nga lalantunon sa Alemania kag Italia. Kanugon nga ang
tuman kahimpit nga lin-ay tuman man ka mapailubon kag gintagò niya ang iya mga kinaadman sa katilingban nga sa iya
lamang may natigana nga mga pagdayaw. Indi ko dapat kalimtan sa pagsulat nga sa baláy sang tag-amuma pinainúm kamí
sing tsampan kag mga ilimnon nga malahalon nga madamò kag
sa labing maalwan nga nagpahayag sang batasan sang kinilala
nga pahunanan.
"Nagtambong kami sa talan-awon. Nakilala na nimo ang aton mga gumulowà nga sanday Ratía, Carvajal kag Fernandez; kamí lamang ang nakahangóp sang ila mga kinaadman, kay ang wala makatuon nga mga tumalambong walâ gid sa ila makahangóp. Sanday Chananay kag Balbino, mga maayo man bisán nga mabahùlbahól: ang ikaduhá tumig-ik nga daw pisu5 apang sa kabilugan kag sa iya maayo nga panagimuot nangin dalayawon. Ang mga indyo, labí na gid ang gobernadorsilyo, naluyag gid sang medya nga tinagalog: ining' naulihé bumag-id sang iya mga kamót kag nagsilíng sa amon nga kanugon nga walâ nila pagpaawaya ang bathara sa higante nga nagkawat sa iya, nga iní sunô sa iya kaisipán labí pa gid kuntani nga nagpatahúm, kag labí pa gid, kon ginhimò nga ang higante indi gayód malutos lwás lamang kon maigò sa pusod subong kay Ferragús nga ginsugid sa Maragtas sang Napulò kag Duhá ka Kapid. Ang labing' talahuron nga P. Fr. Dámaso, sa sinang' kaalwan sang tagipusùon nga siá ginkilala, nagbuylog man sa kaisipán sang gobernadorsilyo kag nagtugda nga sa amó nga hitabo ang bathara amó na ang makahibalo sa pagpasapó sa higante sang iya pusod kag maghatag sa iya sing kibót nga hampas.
"Tugti ako sa pagsugid sa imo nga samtang kami nagtan-aw walâ mapabay-i nga makulang ang pagkamaabiabihon sang Rothschild nga pilipinhon: mga sorbete, mga limonada, mga pabugnaw, mga dulsi, mga alák kag ibán pa nagbaha sa amon tanan nga yadto didto. Natalupangdan sing maayo kag may katarungan ang pagkawalà sang kinilala kag maalam nga pamatan-on nga si D. Juan Crisóstomo Ibarra, nga, sa nasayran na nimo, dapat magpangulo bwás sa pagpabendita sang nahauná nga bató
___________________
(4) Sa kay Galvez— Si Donya Buenaventura Galvez de Reyes, gradwada sa konserbatoryo sa Madrid, nga amó ang labing' bantog nga pyanista sang iya panahon, tungod sang indi masuay niya nga mga kinaadman sa paglanton, gani nga nahipo niya sa kabilugán ang pagpanudlo sa pyano sa bug-os nga Manila. Napatay siá sa sini nga siudad sang Marsa 20, 1916.
(5) Tumigik nga daw pisu —Ginahambal ini sa isa ka umalamba nga nagsamba sa tingog nga indi maayo ukón libagon.
