dunâ nga kinaalam nakahatag siá kuntani sing kadayawan sa iya
pungsod.
Ang músika sumulód sa banwa nga naglanton sang masadya nga mga martsa, nga ginsunód sang kabataan nga nagpalanapót sing gisión kag ang kautód sang ila mga lawas walâ sing tabón; nga nagsuot sang bayù sang iya utod, ang isá sang mga dilargo sang iya amáy. Sa gilayón nga matapos ang lanton sang músika, masauló na nila, ila na gin-igung-igong, ginpanihól nila sa tumalagsa nga paningog, sunô na sa ila luyag.
Sa karón nag-inabút-abot na sa mga karomata, mga kalesa ukón mga karwahe ang mga himatâ, mga abyan, mga walâ makilal-i, ang mga tahur nga dalá ang labing maayo nila nga mga hinigtan, nga may mga pinuyo nga bulawan, nga handa sa pagpasimpalád sang ila mga manggad sa ibabaw sang tapete nga lunhaw ukón sa sulód man sang rueda sang bulangán.
—Ang alpéres may kalim-an ka pesos tagsa ka gab-i! — Kíbo! sang putot kag matambok nga tawo sa dulonggan sang mga bag-o nag-abót. —Si kpn. Tiago maabót kag mabutáng sing bangka. si Kpn. Joaquin may dalá nga napuló kag waló ka libo. May hampang nga liam-pó; si insik Carlos mabutáng sinâ nga may pahunán nga napulo ka libo. Gikan sa Tanauan, Lipa kag Batangas subong man gikan sa Sta. Cruz³ nag-alabót ang dalagkò nga mga manogtayâ. Magadakô iní! Magadakô iní! Apang inúm kamó sing tsokolate. Karón nga tuig indi kitá pagpanitan ni kapitan Tiago subong sang una: walâ siá makahinguyang kapin sa tatlo ka misa sa pagpasalamat kag akó may isá ka mutyà sang kakaw. Kag maanuano man ang panimalay?
Maayo, maayo man! Salamat!— Sabát sang mga dumulòaw. —Kag si P. Dámaso?
—Si P. Dámaso mawali sa aga kag mahampang sa amon kon gab-i.
—Maayo pa, maayo pa! Kon amó walâ sing maskin anó nga katalagman!
—Hilway, hilway kitá! Si insik Carlos mawagwag man! Kag ang tawo nga matambok naghagyò sang iya mga tudlò nga subong sang nag-isip sang madamò nga pilak.
_______________
(3) Santa Cruz— Ang mga ngalan sang mga santos naluyagan gid sa Filipinas. Ngalan ini nga gingamit sa isa sang mga pulo kag sang madamo nga kabanwahanan nga ang tagdala amó ang mga katsila diin nila pinaluntad ang ila kagamhanan. Ang mga ngalan man sang ibán nga mga santos nga masami ginagamit amó ang mga masunod: San Juan, San José, Jesús, María: Santa Ana, Santa Catalina, Santa Bárbara kbp.
