—Walâ, ginùo; inâ si Elias ginsumbong na man sining karon nga nagpatupâ sang iya kamót sa isá ka pari.
—A! kag amó inâ ang timoníl?
—Amó inâ sunô sa ginsugid sa amon; nagapasimpon ka sa imo mga badù sang tawo nga malain, Gg. Ibarra.
Tinulok siá siní halín sa tiíl tubtob sa ulo kag sinabát siá nga may maligdong nga pagyagutâ:
—Indi ako dapat magsugid sa imo sang akon mga ginabuhat! Sa amon mga badu ang tanan ginabaton sing maayo, kag ikaw man nga nakaabot diri, may pulungkoan ikaw sa latok, katulad sang imo alpéres nga sang duha ka takna nga nagligad yari diri sa amon.
Kag sang mahambal niya ini tumalikod sia.
Pinilipit sang sarhento ang iya bigote kag sanglit ginbilang nga amo ang bahin nga labing' mapigaw, nagmando sia nga pangitaon sa tanan nga bahin kag sa mga kakahuyan ang timonil nga ang iya mga talandaan nadala niya sa isa ka pikas nga papel. Si D. Filipo nagsiling sa iya:
—Talupangdan nimo nga ina nga mga talandaan natingban sang siam sang napulo ka bahin sang mga tumandok; ayaw pagtikang sing indi nagakabagay!
Sa katapusan bumalik ang mga soldado nga nagsiling nga wala sila sing makita nga baroto, bisan isa ka tawo nga mapangduhadohaan; ang sarhento naggurog nga nagkibot sing pila ka taga kag lumakat sia katulad man sang iya pag-abot: sa ugali sang gwardya sibil.
Ang kinalipay amat-amat nga bumalik, nag-ulan ang mga pamangkutanon kag nagdamo ang mga hinambalhambal.
—Kon amo, sia ang Elias nga pumasaog sang alpéres sa lunang! —Siling ni Leon nga pumadalom sang iya hunahona.
—Kag ngaa nahanabo ina? Ngaa nahanabo? — Pamangkot sang iban nga nagkalabulong.
—Siling nila nga sang bulan sang Septyembre isa ka adlaw nga maulanon kaayo, nakasumalang ang alpéres sang isa ka tawo nga nagpas-an sang mga kahoy nga inoggatong. Ang dalan tama ka lunangon kag sa higad lamang may makitid nga alagyan, nga sarang maagihan sang isa ka tawo. Ginsugid nga sa baylo nga padulugon sang alpéres ang iya kabayo, pinalakat niya nga iya ginsikadsikaran samtang nagsinggit sia sa tawo nga magbalik: ini daw may diutay nga luyag sa pagbalik sa iya ginlaktan tungod sa palas-
