—Wala, nagtalang akó! —Sabát ni P. Salvi nga pumaidalom sang iya mga matá sa pagsusi sang iya panapót.
Binuksan ang mga prasko sang limonada, pinanagtag ang mga butong agúd yadto'ng mga makagwâ sa palaligòan makainúm sang ila lab-as nga tubig kag makakaon sang ila mahumok nga unód, nga maputî pa sa gatas; ang mga lin-ay bumaton pa sang mga lugway sang mga sampaga nga ginbal-utbal-otan sing mga rosal kag ilang-ilang nga nagpahamót sang nagbunghay nila nga mga buhók. Nagpinungkò ukón nag-ilidág silá sa mga duyan, nga pinakabit sa mga sangá, ukón naglingawlingaw nga naghinampang palibot sa isá ka malapad nga bato; nga sa ibabaw siní makita ang mga baraha, mga halampangan sang ahedres, mga librito, mga sigáy kag magagming nga mga bató.
Tinudlo nila sa kura ang buaya, apang daw walâ siá magsapák kag nagtalupangod siá lamang sang sugiran siá nga ina'ng masangkad nga pilás sang sapat sinîsì ni Ibarra. Lwás sa iya indì mahimò nga makita ang bantog kag walâ makilal-i nga timoníl; nadulà na siá sang wala pa makaabót ang alpéres.
Sa katapusan gumwâ si María Clara sa palaligòán, nga ginbuylogan sang iya mga abyan nga babáe, lab-as katulad sang isa ka bulak sa iya nahauná nga aga sa pagpamuskag kon mag-idlak ang tun-og, mga kilan sang batomaidlak sa halin-ay nga mga sipad. Ang nahauna niya nga yuhom nahalad kay Crisóstomo, kag ang nahauna nga gal-um sa iya agtang sa kay P. Salví. Ini nakamutík sina kag wala sia magkasubô
Umabot ang takna sa pagkaon. Ang kura, ang koadhutor, ang alperes, ang gobernadorsilyo kag ang pila ka kapitan patí ang tenyente mayor nagpulungko sa isa ka latok nga ginpangulohan ni Ibarra. Ang mga iloy wala magpahanugot nga may lalaki nga magkaon sa latok sang mga babae nga pamatan-on.
—Karon, Albino, ayaw ka pagpatûpatò sang mga buho subong sa mga baroto, —siling ni Leon sa nangin-seminarista.
—Ano? Ano ina?—Pamangkot sang mga tigulang.
—Ang mga baroto, mga ginang, lunsay libon katulad sini nga pinggan,— paathag ni Leon.
—Jesús, katsaskero!—Pugwat ni tiya Isabel nga nagyuhom.
—May nahibal-an na ikaw, Gg. Alpéres, nahanungod sang kriminal nga sumakit kay P. Dámaso?— Pangutana ni Fr. Salví sa iya samtang sila nagakaon.
