kità nila siá nga nanaog sa karwahe sa atubangan sang diutay
nga baláy sang iya kahagugma kag naghatag man dayon sing
katahurán sa parì, nga nagkadto man sa amó nga balay.
Nahanungod kay Sisa kag sang iya mga anák walâ sing may nagsapák.
Kon karón makadto kitá sa balay ni María Clara, isá ka matahúm nga pugad sa tungâ sang mga naranghita kag mga ilang ilang,1 makità pa naton ang duhá ka pamatan-on nga nagagawa sa isa ka gawahan nga nag-atubang sa linaw. Ginlandungán ini sang kabulakan kag mga balagon nga nagkulupô sa mga kawayan kag mga alambre nga nagpaalisngaw sing diutay nga kahamót.
Ang ila mga bibig nagkíbot sing mga tinagà nga labí kalulot sangsa kinulaskolas sang mga dahon kag labí kaamyon sangsa dupoydupoy nga napun-an sing mga kahamót nga nagtugób sa lagwerta. Taknà yadto nga ang mga kataw sang linaw. nga nagpanginpulós sang mga landong sang madasig nga pagtakóp sang kasisidmon. nagginuwà sa ibabaw sang mga hanulhanol sang ila malipayon nga magagmay nga mga ulo sa pagdayaw kag pagyaób sa ila mga ambahanon sang naghinunod nga adlaw. Ginsugid nga ang ila mga mata kag mga buhók tagumnon, nga napurongan sang mga tanúm sa tubig nga may mga bulak nga puti kag pulá; ginsugid nga kon kis-a ginpagwâ sang maputi nga mga bukál ang ila natabas sing matahúm nga mga lawas nga labí pa ka putî sangsa mga bukál, kag kon humil-ob sing bug-os ang kagab-ihon sugdan nila ang ila langitnon nga mga hampang kag mapabatî silá sang mga tunog nga katinga lahan katulad sang naghalín sa mga eólikang arpa,² ginsugid man . . . apang mabalik kitá sa aton mga pamatan-on kag pamatian naton ang katapusan sang ila sugilanon. Si Ibarra nagsiling kay María Clara:
—Bwás sa aga sa wala pa magpamanagbanag, matuman ang imo handum. Karón nga gab-i ihandà ko ang tanán agúd walâ sing makulang.
—Gani nga sulatán ko ang akon mga abyan nga kababa-
____________________
(1) Ilang Ilang— Amó ini ang bulak sa mga bulak nga malayunhon, nga ginakuhaan sang nabantugán kaaya nga pahamót.
(2) Eolika—Arpa na ginagamit sang mga taga-Eólia.
