Sa karón, ginapangabudlayán ko nga ang kabataan mahimò nga mga periko nga makasauló sang madamò nga butang nga walâ nila mahangpi ang bisán isá ka tagâ. Madamò na ang nakasauló sang mga misteryo kag sang trisáhiyo, apang ginakahangaw-an ko nga indi mapuslan ang akon mga paghimud-os sa katesismo ni P. Astete, kay ang kalabanan sang akon mga bumoluthò indi pa makakilala sing maayo sang mga pamangkot sa mga sabát kag kon anó ang kahulogan sang duhà ka butáng, Kag sa amó iní nga kahimtangan magakalamatay kitá kag amó man ang himuon sang magakalatawo, kag sa Europa hambalón nila ang kauswagan!
—Indi kitá magdulà sing paglaum! —Sabát ni Ibarra nga tumindog. —Ang tenyente mayor nakahatag sa akon sing isá ka pangagda sa pagtambong sa isá ka tinipon sa tribunal sa isá ka sinapol... Sin-o ang makapakót kon didto may isá ikáw ka sabát sa imo mga pamangkot?
Ang manunudlò tumindog man, apang lumungôlungò nga nagpakilala sang iya pagpangduhadoha, sumabát: —Makità nimo nga ina'ng bukò nga ginhambal nila sa akon manundog man nga katulad sang akon! Kag kon indi, tan-awón naton!
