diganan sa tubig, labhanan, pangisdaan, agianan ug hangtud imnanan, kon hihunahunaan sa Insik nga mangangalos. Angay
hibaloan nga niining dapita sa balangay diin daghang mangagi
ug ang kagahub makabungog, sa gilay-ong hapit mousa ka kilo
metro, usa day taytayang kahoy, ug kining taytayana sulod sa
tibuok tuig mao gihapon ang iyang kahimtang: ang kaputol guba
ug ang kaputol dili kaagian. Sa mga bulan nga ting-init, ang
mga kabayong mangagi niining taytayana mopahimulos pag-ambak sa tubig sa sapa, sa dakung kahikurat sa sumasakay nga magaduka sulod sa salakyanan kun magapalandong sa mga kauswagan sa atong panahon.
Ang balay nga atong gihisgotan hamubo dag tindog ug may pagkahiwi. Dili kami makapasalig kinsay tagsala niini: ang panday ba nga nagatukod nga wala kaayo makaalinggat, kun, nahiwi ba tungud sa mga linog ug bagyo. Usa ka halapad nga hagdan nga binakbakan ug may mga tukod sa pasamanos nga pinintalan ug lunhaw, gikan sa silong, nga sinalgan ug baldosang sinaw, napadulong sa itaas. Sa masigkakilid sa hagdan adunay mga tanum ug mga masitasan nga gipahiluna ug mga tungtonganang gikan sa Tsina nga nabulit sa daghang mga dibuho sa nagkalainlaing mga bulok.
Sanglit wala may nagabantay sa ganghaan ni mga suluguon nga magasusi kon kita dinapit ba, manaka lamang kita, ¡oh magbabasa, higala kun kaaway!, kon ugaling madani ikaw sa mga honi sa orkista, sa kahayag sa mga suga kun sa hinagtik ba sa mga pinggan ug kubyertos ug buut ka motan-aw unsa ang mga tapok-tapok didto sa ginatawag “Mutya sa Sidlakan”. Aron dili na ako mahago kaayo, buut ko unti nga dili na lamang hubiton ang kahimtang sa balay, ugaling kay kini hinungdanon uyarnut, kay kita ugod sama man sa mga pawikan: ang atong bili magaagad sa bili sa atong kabhang. Tungud niini ug sa uban pang mga hiyas, ang mga molupyo sa Pilipinas sama da usab sa mga pawikan. — Inigsaka, mahitungha kita dayon sa usa ka lawak nga halapad nga ginganlan didtog “kayda”, ambut ngano, ug nga ning gabhiona gigawing kan-anan ug lawak alang sa orkista. Sa taliwala, usa ka hataas nga talad nga dinayandayanan pag-ayo daw nakapatulo sa laway sa mga samokan nga dukirok ug nakapakitbi sa atay sa mga dalagang manggiulawon nga sulod sa duha ka takna makig-uban sa laing mga tawo nga adunay mga sulti ug
