Sa naghinapus ang bulan sa Oktubre, si Don Santiago de los Santos, nga naila uyamut sa angga, nga Kapitan Tiyago, mihatag usa ka panihapon nga, bisan niadto lamang hapona niya ipahibao, supak sa iyang nabatasan, mao nay ginahisgotan sa Binondo ug sa ubang mga balangay hangtud sa Intramuros. Niadtong panahona si Kapitan Tiago ginaila nga tawong dill maantigong modaginot kon magkombira, ug hibaloan sa tanan nga ang ganghaan sa iyang balay. sama sa iyang lungsod, binuksan kanunay alang kang bisan kinsa, gawas sa patigayon ug sa mga hunahunang binag-o.
Sama sa kilat, ang balita mikaylap pag-usa sa kalibutan sa mga libud-suroy ug mga lagong gibuhi ni Bathala, ug, inaghat sa iyang walay sukod nga kaluoy, iyang gipasanay sa Manila. Pipila nangitag pintal alang sa ilang mga sapin, ang uban mga butonis ug korbata, ug ang tanan nanaglibug ang ulo kon unsaon nila pagyukbo sa tagbalay, nianang yukbo nga makisanduroton, aron ingnon nga sila karaang mga higala ug, kon ugaling makagayon, pagpangayog pasaylo nga wala sila mahisayd pag-abut.
Kining panihapona didto idulot sa usa ka balay nga nahimutang sa dalan Anloague, ug, sanglit wala man kami mahinumdom sa iyang isip, hubiton namo ang iyang panagway aron siya hiilhan gihapon, kon ugaling wala man maguba sa mga linog. Dili kami motuo nga gipaguba sa tag-iya, kay didtong mga dapita masabug nga kanang buhata pangakuhon lamang ni Bathaa kun sa Kinaiyahan; kinsa may gikasabutan ug ang Kagamhanan paggama daghang mga buluhaton nga sama niini ug kahimtang . . . Maoy usa ka balay nga may gidak-on, samag panagway sa ubang mga balay didto, nahitarok sa dapit nga duol sa usa ka sanga sa suba sa Pasig, nga ginatawag sapa sa Binondo. Sama sa ubang mga suba sa Manila, kadtong sapaa gigawing kaligoanan, dalig-
